Fota Depositphotos.com
Niadaŭna Aŭstralija zajaviła, što źbirajecca ŭvieści pieršy ŭ śviecie zakon, jaki abaviazvaje technałahičnych hihantaŭ Facebook i Google płacić nacyjanalnym ŚMI za publikacyju spasyłak na ich materyjały na svaich płatformach. Facebook i Google, u svaju čarhu, adchilajuć hetu prapanovu. Kampanija Microsoft zajaviła, što ZŠA varta ŭziać prykład z Aŭstralii, kab technałahičnyja kampanii pačali dzialicca dachodami z amierykanskimi ŚMI.
Heta daloka nie pieršy vypadak, kali Microsoft umiešvajecca ŭ sprečki, što ŭźnikajuć u kankurentaŭ. Asabliva kali havorka idzie pra haliny, dzie ŭ kankurentaŭ jość pieravaha pierad karparacyjaj. Pošukavaja sistema ad Microsoft Bing značna adstaje ad Google pa doli rynku. Raniej karparacyja zaklikała ŭrad da bolšaha kantrolu nad technałohijaj raspaznavańnia tvaru, a letaś padtrymała raspracoŭščyka videahulniaŭ u sprečcy z Apple nakont płaty ŭ App Store, paviedamlaje The Wall Street Journal.
Aŭstralijskaja prapanova ciapier razhladajecca parłamienckim kamitetam. Kali zakon budzie pryniaty, to vierahodna, što inšyja krainy piarojmuć hety prykład, što pryviadzie da hłabalnaj transfarmacyi adnosin pamiž technałahičnymi kampanijami i nacyjanalnymi ŚMI.
«Złučanyja Štaty pavinny padtrymać prapanovu Aŭstralii, jakaja ŭmacoŭvaje demakratyju šlacham patrabavańnia ad technałahičnych kampanij padtrymki svabodnaj presy», — napisaŭ Bred Śmit u svaim błohu na minułym tydni.
Administracyja Trampa pieršapačatkova vystupiła suprać hetaj prapanovy, bo zakon pierš za ŭsio budzie ŭpłyvać na dźvie bujnyja amierykanskija kampanii. Adnak Bred Śmit zaklikaje administracyju Bajdena pierahledzieć heta rašeńnie.
«Urešcie, što drennaha ŭ tym, kab kampiensavać niezaležnym miedyja toje, što atrymlivajuć technałahičnyja kampanii za ich kantent?» — napisaŭ Bred Śmit. Choć Aŭstralija nie płanuje na pieršych etapach prymianiać zakon da Microsoft, prezident adznačyŭ, što kampanija hatova ŭziać na siabie novyja abaviazacielstvy i pačać dzialicca dachodami z navinnymi arhanizacyjami.
Kiraŭniki Google zajavili, što prapanovu Aŭstralii treba zvuzić i prymianić da novaha praduktu pad nazvaj News Showcase, a nie da vynikaŭ pošukavaj sistemy. News Showcase — heta panel navin, jakija źjaŭlajucca ŭ servisach Google, pry hetym kampanija płacić vydańniam za hetyja naviny.
Na hetym tydni kampanija Google zapuściła News Showcase u Vialikabrytanii i Arhiencinie, a raniej i ŭ Aŭstralii, dzie, pa słovach kampanii, na novaj płatformie zarehistravałasia ŭžo 7 vydańniaŭ. Na hety prajekt kampanija vyłučyła $1 miljard, kab hłabalna raspaŭsiudžvać News Showcase na praciahu nastupnych troch hadoŭ.
Rašeńnie Aŭstralii, a anałahičnyja zachady abmiarkoŭvajucca i ŭ inšych krainach, pradyktavanaje žadańniem padtrymać. ŚMI ŭ svajoj raznastajnaści heta apora demakratyi i hramadskaha kantrolu. Pieraciakańnie rekłamnych dachodaŭ pary hłabalnych technałahičnych hihantaŭ abiaskroŭlivaje ŚMI finansava, asłablaje ich, tady jak Huhł, Fejsbuk i padobnyja atrymlivajuć amal manapolnaje stanovišča na suśvietnych rynkach.
Biełaruskija ŚMI sutykajucca z toj samaj prablemaj: rekłama sychodzić u instahram, fejsbuk i na inšyja takija płatformy.
