Fota z taho samaha kalidora suda, dasłali smarhoncy dla tut.by.
Historyja pačałasia 18 lutaha. U toj dzień u Smarhonskim rajonnym sudzie vynosiŭsia prysud pa kryminalnaj spravie suprać Rusłana Valuka i Iryny Markavaj. Ich vinavacili pa artykule «Paklop», maŭlaŭ, jany raspaŭsiudžvali ŭ Smarhoni ulotki, jakija abražali milicyju. Raniej pa hetym artykule da dvuch z pałovaj hadoŭ chimii byŭ asudžany redaktar «Novaj haziety Smarhoni» Ramuald Ułan.
U vyniku Valuk atrymaŭ dva hady chimii, a Markava — dva hady chatniaj chimii. Kali prysud užo byŭ vyniesieny, to na kalidory suda niechta vyhuknuŭ «Žyvie Biełaruś», niekatoryja adkazali na heta «Žyvie». U toj samy čas u susiednim zale adbyvaŭsia razhlad kryminalnaj spravy na čale sa staršyńkaj Smarhonskaha suda Ludmiłaj Piatrovaj.
Kali Piatrova pačuła vyhuki, to vyjšła z zały, pačała kazać, što heta niepavaha da suda, pahražała vyklikać milicyju. Sama Piatrova stała la turnikieta i nikoha nie vypuskała z pamiaškańnia. Tady častka ludziej prosta adčynili vokny i stali adtul vyskokvać na śnieh. Cikava, što toje akno znachodzicca prosta nasuprać rajonnaj milicyi.
Čytajcie taksama:
U Smarhoni paśla abviaščeńnia prysudu vyklikali AMAP i nikoha z prysutnych nie vypuskajuć
Ramuald Ułan raskazvaje, što taksama byŭ na vyniasieńni prysudu, ale padziei ŭ kalidory ŭžo nie zaśpieŭ, bo śpiašaŭsia na pracu, tamu syšoŭ raniej. «U toj samy dzień dapytali vosiem čałaviek, ale zatrymali tolki adnaho. Na nastupny dzień, u piatnicu, zatrymali čatyroch čałaviek, u tym liku i mianie, — kaža spadar Ułan. — Nas pratrymali ŭ izalatary da paniadziełka, a ŭžo potym sudździa Bołandź adpraviŭ usie pratakoły na dapracoŭku, a ludziej vyzvalili».
Aproč Ułana, na sutki trapili Jaŭhien Novikaŭ, Illa Pietunoŭ, Ludmiła Sulžyckaja. A voś Siarhieju Traju pašancavała mieniej — jon adsiedzieŭ 5 sutak.
Čytajcie taksama:
Idzie abłava na smarhonskich aktyvistaŭ. Napiaredadni ŭ sudzie chtości vyhuknuŭ «Žyvie Biełaruś!»
Pakul zatrymanyja znachodzilisia ŭ izalatary, była zaviedzienaja kryminalnaja sprava pa artykule «Chulihanstva». Siarod padazravanych — usie tyja ludzi, jakija znachodzilisia na vyniasieńni prysudu Valuku i Markavaj.
Viałasia videazdymka pracesu, tamu z padazravanymi prablem niama, a voś razhladzieć na videa, chto mienavita kryčaŭ «Žyvie Biełaruś» nie atrymlivajecca, videa kiepskaj jakaści.
«Cisnuć vielmi mocna, mnie kažuć, što chimijaj nie abydziecca, naprykład», — kaža Ramuald Ułan. Jahonaja apielacyja budzie razhledžana ŭ Hrodnie 11 sakavika, kali jana nie skasuje pakarańnie, to redaktaru daviadziecca adpravicca na chimiju.
Zatrymańni ŭ Smarhoni praciahvajucca, zatrymanaja maci dvaich niepaŭnaletnich dziaciej Nina Šyš, paplečniki spadziajucca, što jaje adpuściać na volu.
