U śniežni milicyja zajaviła, što złaviła administratara telehram-kanału «Karatieli Biełarusi». Im akazaŭsia 15-hadovy žychar Lubani (Mienskaja vobłaść) Ivan. Padletku pahražała specškoła, tamu jon źjechaŭ ź Biełarusi. Pra toje, jak heta adbyvałasia, jon raskazaŭ Svabodzie.
15-hadovy Ivan ciapier asvojvajecca za miažoj. Dahetul nie adyšoŭ ad stresu, tamu nia choča fatahrafavacca. Jon pakul nie adčuvaje siabie ŭ poŭnaj biaśpiecy i nie raskazvaje, chto jamu dapamoh uciačy i jak heta adbyłosia.
Pa infarmacyi MUS, padletak zrabiŭ kłon kanału «Karatieli Biełarusi» i publikavaŭ tam dadzienyja pra milicyjantaŭ.
«Kanfidencyjnyja źviestki pradstaŭlalisia karystalnikami i bralisia ź inšych kanałaŭ. Aperatyŭniki vyznačyli, što chłopiec administravaŭ i inšyja destruktyŭnyja resursy», — napisała viedamstva.
Zatrymany padletak pryznavaŭsia na kameru, što ŭ telehram-kanale zaklikaŭ da radykalnych dziejańniaŭ.
Ciapier Ivan za miažoj. Planuje vučycca ŭ inšaj krainie. Kaža, što jamu ciažka ŭzhadvać tyja padziei, śniacca kašmary.
«Ja naziraŭ za žnivieńskimi padziejami, chacieŭ niejak padtrymać ludziej. Ale što ja moh u svaje 15, dy jašče ŭ Lubani? Na telehram-kanale, jaki ciapier nielha nazyvać, ja ŭbačyŭ spasyłku na kanał «Karatieli Biełarusi», mnie jon spadabaŭsia, i ja vyrašyŭ jaho skapiravać. Potym ja całkam pierajmaŭ jaho», — kaža Ivan.
Jon ličyć, što «deanon» — heta metad niehvałtoŭnaha supracivu, jaki adpaviadaje mirnamu charaktaru pratestaŭ u Biełarusi.
«Siłavikoŭ prosta padviarhajuć hramadzkamu hańbavańniu praz «deanon». I heta prosta psychalahičnaja zbroja, kab strymlivać siłavikoŭ u budučyni. U dziaržavy — zbroja, vadamioty, aryšty, štrafy i hvałt. A mnie što rabić? Zabiaśpiečanaja dziaržavaj ananimnaść dazvalaje milicyjantam prajaŭlać žorstkaść, jakaja nia maje ničoha ahulnaha z zakonam, prymianiać hvałt da niazhodnych», — tłumačyć padletak.
Ivan kaža, što na momant zatrymańnia jon byŭ adličany ź liceju, jaho papiaredžvali, što mohuć być pytańni z boku inspekcyi pa spravach niepaŭnaletnich. Inspektar pa spravach niepaŭnaletnich pryjechaŭ da jaho dachaty.
«Jon zaprasiŭ mianie sieści ŭ aŭtamabil. Było choładna, tamu ja ničoha takoha nie padazravaŭ. Ale na mianie ŭ mašynie nakinuŭsia supracoŭnik AMAP i pačaŭ krucić ruki z pytańniem: «Viedaješ, za što ty zatrymany?». Potym padjechali jašče dźvie mašyny, ź ich vyjšła čałaviek vosiem, niedzie siem supracoŭnikaŭ AMAP i adzin z HUBAZiK. Jany paviali mianie ŭ dom, pačali pytacca ŭ taty pra mianie, maju dziejnaść. Pašancavała, što tata byŭ ni pry čym. Jany prahledzieli jahony telefon, ale ničoha nie znajšli, kryčali na jaho. Mianie bili, ale nia mocna, tolki hubu raźbili», — raskazvaje padletak.
Paśla pieratrusu jaho z tatam vazili ŭ Miensk na dopyt.
«Mianie raspytvali pra telehram-kanał. Kali supracoŭnik HUBAZiK ubačyŭ u mianie ŭ kanale «Śpis supracoŭnikaŭ HUBAZiK», skazaŭ spynić mašynu kala lesu. U asnoŭnym mianie pytali pra tych, z kim ja pierapisvajusia ŭ telehramie, chto administratar i kolki mnie zapłacili», — kaža Ivan.
Paśla dopytu jaho adpuścili. Padletak apasaŭsia, što jaho pasadziać u turmu.
«Adnak śledčy skazaŭ, kab ja nie chvalavaŭsia, bo ja nibyta śviedka pa spravie ab abrazie milicyjanta», — kaža padletak.
Ivan kaža, što jahonyja blizkija atrymlivali pahrozy.
Jak udałosia ŭciačy ź Biełarusi? «Byli dobryja ludzi, jakija dapamahli. Ale jak mienavita, ja nie skažu».
Na pytańnie, ci sumuje pa siabrach i pa domu, padletak dasłaŭ emodzi, jakija płačuć.
Jahonaja maci Eleanora pierajmajecca za syna, jaki adzin žyvie za miažoj. Ale i nia choča, kab jon trapiŭ u biełaruskuju specškołu.
«Jon razumny, šmat čytaje. Što jaho vyklučyli ź liceju — dyk heta jany zrabili zadniaj dataj. Dyj nie padabałasia jamu ŭ licei. Ivan kazaŭ, što tam niama takich vykładčykaŭ, kab zacikavili pradmietam. Kaniečnie, mnie sumna i ciažka, što tak atrymałasia. Ale, spadziajusia, Ivan atrymaje dobruju adukacyju, znojdzie siabie. Doma jamu nie dali b žyćcia, heta 100%. I ciapier jašče milicyjanty kružlajuć vakoł, pytajucca ŭ znajomych: «Ci viarnuŭsia Ivan?», niešta vyviedvajuć… Doma jon nia byŭ by ŭ biaśpiecy», — kaža maci.
U kastryčniku milicyja zatrymała 15-hadovaha administratara telehram-kanału «Dannyje karatielej Biełarusi» Dźmitryja z Dobrušu (Homielskaja vobłaść). U lutym jaho nakiravali ŭ specškołu na dva hady.
Čytajcie taksama:
HUBAZiK złaviŭ 15-hadovaha administratara «Karnikaŭ Biełarusi». I nie zmoža jaho pakarać
15-hadovy stvaralnik «Karnikaŭ Biełarusi», jakoha zatrymlivali 7 amapaŭcaŭ, cudam vyjechaŭ z krainy i daŭ pieršaje intervju
