U subotu 13 sakavika zatrymali mastačku Lizavietu Hančarovu razam ź jaje baćkam. U Centralnym RUUSie na ich skłali pratakoły pa art. 24.23 KaAP, a potym da suda adpravili ŭ CIP na Akreścina.
Siońnia ich spravy razhladaŭ sudździa Centralnaha rajona Dźmitryj Karsiuk. Spačatku sud razhledzieŭ spravu šmatdzietnaha baćki Alaksandra Hančarova, paviedamlaje spring96.org.
Zhodna z pratakołam, jon «u 8.15 na vuł. Mielnikajte, 13 braŭ udzieł u pikietavańni u hrupie piaci čałaviek». Pa słovach Alaksandra, u tuju ranicu jon prachodziŭ praz administracyju Centralnaha rajona, ale ŭdziełu ŭ akcyi nie prymaŭ. Dačku Lizavietu ŭbačyŭ nasuprać Administracyi. U niejki momant usie pačali biehčy, a Alaksandr pačuŭ, jak supracoŭniki pačali kryčać, što buduć stralać pa nahach. U vyniku ich usich zatrymali.
U materyjałach spravy jość fotazdymak udzielnikaŭ akcyi nasuprać Administracyi. Śviedka-milicyjant na sudzie skazaŭ, što słužbu nios razam z supracoŭnikami AMAPa, jon ža i padaŭ sudu fatahrafiju z udzielnikami «masavaha mierapryjemstva». Jon rastłumačyŭ, što naziraŭ, jak udzielniki stali ŭ łancužok i zatrymańni pačalisia adrazu, jak tolki tyja pačali kryčać «Žyvie Biełaruś». Hetak ža śviedka śćviardžaje, što Alaksandr prymaŭ udzieł razam sa svajoj dačkoj, «jakaja lubić heta dziejańnie zdymać na telefon». Śviedka raspavioŭ i pra namiery ŭdzielnikaŭ: «U ich byli vielizarnyja ściahi i raściažki, ź jakimi jany chacieli chutka zrabić fatahrafii dla destruktyŭnych i ekstremisckich telehram-kanałaŭ».
Alaksandr dapamahaje svaim pažyłym baćkam, tamu sudździa Karsiuk trojčy ŭdakładniaŭ, jakim čynam Alaksandr im dapamahaje.
U vyniku sudździa adpraviŭ Alaksandra na 15 sutak aryštu.
Pavodle pratakoła, Lizavieta, jak i jaje baćka, brała ŭdzieł u pikietavańni ŭ hrupie piaci čałaviek. Mastačka patłumačyła, što prachodziła mima i ŭbačyła ludziej kala budynka.
Jana paličyła heta cikavym i pryhožym, i vyrašyła sfatahrafavać. Ale nie paśpieła, bo pačałosia zatrymańnie. Spałochaŭšysia, jana pačała ŭciakać, ale ŭpała, tamu nieviadomyja pačali ciahnuć jaje pa asfalcie. Dziaŭčyna zajaviła, što padčas zatrymańnia jaje dušyli i zapluščvali joj vočy. Siłaviki nie pradstavilisia i niekalki razoŭ jaje kidali na ziamlu, pakul ciahnuli ŭ mikraaŭtobus. Sa słovaŭ Lizaviety, zatrymlivali jaje kala piaci čałaviek u ciomnym adzieńni biez apaznavalnych znakaŭ. Sudździa Karsiuk pakazaŭ fatahrafiju, kab jana apaznała ŭdzielnikaŭ akcyi. Advakat źviarnuŭ uvahu na toje, što na fatahrafii nie ŭkazana ni data, ni čas, ni miesca, ni krynica.
Sa słovaŭ śviedki-milicyjanta, zatrymlivali Hančarovu supracoŭniki AMAPa. Jon śćviardžaje, što ludzi stali ŭ łancužok z raściažkami i pačali vykrykvać łozunhi, kab źniać heta na kamieru. Śviedka «Ivanoŭ» śćviardžaje, što Lizavieta asabista trymała ściah.
— Čamu dla piaci dalikatnych dziaŭčat było pryciahnuta stolki supracoŭnikaŭ milicyi?
— Pytańnie źniata.
Pa słovach śviedki, jon pradstaviŭsia i pakazaŭ paśviedčańnie, ale «ŭdzielniki vyrašyli paspaborničać u biehu i prajhrali». Śviedka paraiŭ udzielnikam «nie sa ściahami fatahrafavacca, a biehać ranicaj». Padčas dopytu śviedka błytaŭsia ŭ svaich pakazańniach. Jon śćviardžaŭ, što zatrymlivaŭ dziaŭčynu tolki adzin supracoŭnik AMAPa i supravadziŭ jaje da mikraaŭtobusa, choć jana i nie chacieła iści za im.
Sudździa Karsiuk adchiliŭ usie chadajnictvy i pytańni advakata, jakija tyčacca piśmovych materyjałaŭ spravy, jakija havorać ab pamyłkach u spravie. U vyniku Lizavietu pryznali vinavataj pa art. 24.23 KaAP i aryštavali na 15 sutak.
