Videa kanfliktu niadaŭna źjaviłasia ŭ siecivie. Na im bačna, jak Karpaŭ zachodzić u lift, za im sprabuje ŭvajści Kaŭryhin z žonkaj i dziećmi. Paśla, mierkavana, niejkaj razmovy z susiedam (videa biez huku), Kaŭryhin niekalki razoŭ bje Karpava.
U toj ža dzień Karpaŭ napisaŭ zajavu ŭ milicyju. Jon atrymaŭ čerapna-mazhavuju traŭmu.
Zavodzić spravu ab chulihanstvie suprać Kaŭryhina nie stali. Ale zaviali lahčejšuju, za naniasieńnie lohkich cialesnych paškodžańniaŭ.
Pasiadžeńnie prajšło ŭ sudzie Pieršamajskaha rajona. Razhladaje spravu sudździa Maksim Trusievič, sumna viadomy svajoj žorstkaściu prysudaŭ pa administratyŭkach.
Abvinavačany Siarhiej Kaŭryhin — taksama asoba viadomaja. Jon adzin z arhanizataraŭ akcyj u padtrymku Łukašenki. Zvyčajna Kaŭryhin (ź vialikim kryžom u rukach) uznačalvaje praŭładnyja šeści razam sa śpiavakom Cimuram Prachinym i eks-śpiecnazaŭcam Siarhiejem Paźniakom.
Praŭda, nichto ź ich nie pryjšoŭ u sud, kab padtrymać svajho paplečnika.
Na sudzie ŭ jakaści śviedki vystupiła žonka Kaŭryhina. Žančyna raspaviała, što ŭ toj viečar 18 kastryčnika jany z mužam i dziećmi viartalisia dadomu, śpiašalisia. Pierad imi ŭ lift zajšoŭ susied (Siarhiej Karpaŭ) i pasprabavaŭ zakryć dźviery. Kaŭryhin prytrymaŭ dźviery lifta. I pačaŭsia kanflikt.
«Susied chacieŭ pieraškodzić tamu, kab my ŭvajšli ŭ lift, heta było zaŭvažna. Muž prasiŭ jaho adyści, toj adkazvaŭ: čaho? U vyniku pierajšli na pavyšany ton razmovy, susied maciukaŭsia, aburaŭsia, maŭlaŭ, čaho ja budu tabie i tvajoj siamji sastupać?» — raspaviała Kaciaryna Kaŭryhina.
Pa jaje słovach, u niejki momant Karpaŭ skazaŭ: «A nie pajšli b vy?» Heta aburyła jaje muža, toj zahadaŭ siamji vychodzić ź lifta. Žančyna paviarnułasia da dziaciej i samoha źbićcia nie bačyła, ale ŭpeŭnienaja, što kanflikt spravakavaŭ sam Karpaŭ.
«U nas źjaviŭsia damavy čat, dzie abmiarkoŭvajuć palityku. Ja tam nie siadžu, ale mnie raskazali, što ŭ tym čacie pačali ckavać i vyśmiejvać majho muža, maŭlaŭ, jon padtrymlivaje režym i ładzić šeści ŭ padtrymku ŭłady», — skazała Kaciaryna Kaŭryhina.
Jana nastojvała, što kanflikt u lifcie mieŭ pad saboju palityčny składnik. Maŭlaŭ, raniej Karpaŭ vitaŭsia z Kaŭryhinymi, ale apošnim časam pierastaŭ. A za niekalki dzion da bojki jon demanstratyŭna nie pajechaŭ na adnym lifcie ź jaje mužam.
Videa hetaj demanstratyŭnaj niepajezdki navat pahladzieli na sudzie.
Akramia taho, Kaŭryhin i jaho advakatka paprasili pravieści paŭtornuju miedycynskuju ekśpiertyzu traŭm źbitaha susieda i dałučyć da spravy razdrukoŭku paviedamleńniaŭ z taho samaha damavoha čata, dzie, pa vyrazu Kaŭryhina, «stasujucca hetyja revalucyjaniery». Hetyja chadajnictvy sudździa Trusievič nie zadavoliŭ.
Paciarpieły Siarhiej Karpaŭ u razmovie z «Našaj Nivaj» abvierh palityčny składnik kanfliktu.
«U tym lifcie sapraŭdy nie było miesca, kab uvajšli jašče dvoje darosłych z čatyrma dziećmi. Piersanalna ja nie maju nijakaha niehatyŭnaha staŭleńnia da Kaŭryhina, pra toje, što jon arhanizuje niejkija šeści, ja ŭvohule nie viedaŭ», — skazaŭ Karpaŭ.
Na pasiadžeńni jon paprasiŭ spahnać z Kaŭryhina kampiensacyju za sudovyja i miedycynskija vydatki, a taksama kampiensavać maralnuju škodu. Ahułam — trochi bolš za 4000 rubloŭ.
Kaŭryhin svaju vinu nie pryznaŭ. Jon paviedamiŭ, što dachod jaho siamji z čatyrma dziećmi składajecca ź jaho nievialikaha zarobku i hrašovaj dapamohi na dziaciej. Kaŭryhin zapeŭniŭ, što zarablaje ŭsiaho tolki 400 rubloŭ (choć maje darahoje aŭto BMW X6, na čym akcentavaŭ uvahu advakat paciarpiełaha).
Siarhiej Kaŭryhin u sudzie
Ale ž u svaim apošnim słovie Kaŭryhin paviedamiŭ, što štraf jon hatovy spłacić całkam.
Advakat paciarpiełaha paprasiŭ sud nie pryznačać Kaŭryhinu štraf — bo toj sam kaža, što maje mizerny zarobak, tamu ad hrašovych prablem u siamji mohuć paciarpieć dzieci. Praz čaćviarych dziaciej abvinavačanaha nie varta i karać aryštam, padkreśliŭ advakat. Na jaho dumku, adekvatnaje pakarańnie — 240 hadzin hramadskich prac.
Prysud abvieściać 26 sakavika ŭ 10:20. Siarhieju Kaŭryhinu pahražaje štraf, vypraŭlenčyja ci hramadskija pracy na termin da hoda albo aryšt.
