Fota Depositphotos.com
Na pieršy pohlad moža padacca, što hrošy ŭžo i tak zbolšaha virtualnyja, bo takija płaciežnyja dadatki, jak Apple Pay u ZŠA ci WeChat u Kitai, źmianšajuć nieabchodnaść u kupiurach. Adnak heta ŭsiaho tolki elektronnyja srodki pieramiaščeńnia hrošaj. Stvareńnie ličbavaj valuty, u svaju čarhu, aznačaje toje, što Kitaj pieratvoryć zakonny płaciežny srodak u kampjutarny kod, tłumačyć The Wall Street Journal.
Kryptavaluty, naprykład bitkojn, užo źjaŭlajucca prykmietaj ličbavaj budučyni dla hrošaj, choć dadzienaja kryptavaluta isnuje pa-za hłabalnaj finansavaj sistemaj i nie źjaŭlajecca zakonnym płaciežnym srodkam, jak najaŭnyja hrošy, što vypuskajuć urady krain.
Kitajskaja viersija ličbavaj valuty, adnak, kantralujecca centralnym bankam krainy, jaki budzie vypuskać novyja elektronnyja hrošy. Heta daść kiraŭnictvu Kitaja novyja instrumienty dla kantrolu nie tolki ekanomiki krainy, ale i naroda.
Takim čynam ličbavy juań nie budzie mieć hałoŭnaj pieravahi bitkojna — ananimnaści dla karystalnika.
Bolš za toje, Kitaj stvaraje ličbavy juań tak, kab jon byŭ pryviazany da mižnarodnaj finansavaj sistemy, dzie hałoŭnuju rolu z časoŭ Druhoj suśvietnaj vajny adyhryvaje dalar ZŠA.
«Kab abaranić naš valutny suvierenitet i zakonny valutny status, my musim płanavać usio zahadzia», — adznačaje Mu Čančuń (Mu Changchun), kiraŭnik prajekta pa stvareńni ličbavaha juania.
Dalar značna apiaredžvaje ŭsie inšyja valuty dla vykarystańnia ŭ mižnarodnych valutnych tarhach. Pa apošnich źviestkach Banka mižnarodnych raźlikaŭ, dalar vykarystoŭvajecca na 88%, u toj čas jak juań — usiaho na 4%.
Na dumku ekanamistaŭ, ličbavizacyja juania nie zrobić jaho kankurentam dalaru ŭ bankaŭskich pieravodach.
Ale ŭ svajoj novaj formie juań moža mieć padtrymku ŭ biednych krainach, bo heta dało b mahčymaść ludziam pieravodzić svaje hrošy na mižnarodny ŭzrovień. A navat abmiežavanaje vykarystańnie kitajskaj valuty za miažoj moža pasłabić udar amierykanskich sankcyj, jakija ŭsio čaściej prymianiajucca suprać Kitaja. Tamu ŭviadzieńnie ličbavaha juania moža pahražać dalaru ŭ doŭhaterminovaj pierśpiektyvie.
Ličbavy juań znachodzicca ŭ kibierprastory, i ŭładalnik maje dostup da jaho na mabilnym telefonie. Kab jaho patracić, nie abaviazkova mieć dostup da internetu.
Ličbavy juań z vyjavaj Maa Czeduna źjaŭlajecca na ekranie, a raspłacicca im možna z dapamohaj mabilnaha dadatku ad centralnaha banka Kitaja, jaki spampavali ŭžo bolš za 100 tysiač čałaviek. Ličbavy juań u Kitai ŭžo prymajuć kaviarni Starbucks i McDonald's.
U toj ža čas ličbavyja hrošy dazvalajuć uradu adsočvać raschody ludziej u režymie realnaha času, a taksama vyjaŭlać złačynnuju dziejnaść. Z dapamohaj ličbavaha juania tatalitarnaja dziaržava zmoža jašče macniej kantralavać kožny krok čałavieka, zaścierahajuć krytyki.
Letaś u Kitai naziraŭsia značny rost nakapleńniaŭ najaŭnych hrošaj, što śviedčyć pra zaniepakojenaść žycharoŭ tym, što ŭłady praź finansavuju sistemu adsočvajuć kožnuju apieracyju.
Kitajski ŭrad adznačaje, što ličbavy juań budzie cyrkulavać razam z banknotami i manietami na praciahu niekatoraha času, ale ekśpierty dapuskajuć, što Piekin budzie dabivacca pieravodu ŭsich raźlikaŭ u ličbavy farmat.
