Pravaabaronca Aleś Bialacki. Fota: Siarhiej Hryc
Staršynia Pravaabarončaha centra «Viasna» Aleś Bialacki dziaviataha krasavika byŭ vyklikany na dopyt u Centralny aparat Śledčaha kamiteta ŭ jakaści śviedki pa kryminalnaj spravie.
Śledčyja dziejańni pravodziacca ŭ miežach kryminalnaj spravy, zaviedzienaj pavodle častki 2 artykuła 342 Kryminalnaha kodeksa — navučańnie ci inšaja padrychtoŭka asob dla ŭdziełu ŭ hrupavych dziejańniach, jakija hruba parušajuć hramadski paradak.
Śledčaja SK Konanava pryznačyła dopyt paŭtorna, na 10-ju hadzinu ranicy paśla taho, jak pravaabaronca 7 krasavika zajaviŭ patrabavańnie zhodna z art. 21 Kodeksa pra viadzieńnie dopytu i pratakołu pa-biełarusku.
Dopyt praciahvaŭsia bolej za čatyry hadziny. Usie pracesualnyja dakumienty — pratakoł, pravy śviedki, pytańni padčas dopytu i navat padpiska ab nierazhałošvańni — byli pradstaŭlenyja Alesiu pa-biełarusku.
Paśla dopytu Aleś Bialacki zajaviŭ:
«Na žal, biełaruskaja mova dopytu nie moža vypravić najvialikšaj niespraviadlivaści — zaviadzieńnie kryminalnaj spravy suprać siabroŭ Pravaabarončaha centra «Viasna» i praviadzieńnie dziasiatkaŭ pieratrusaŭ i dopytaŭ pa hetaj spravie. Maje siabry, pravaabaroncy ŭžo miesiacy jak niezakonna ŭtrymlivajucca ŭ turmie. A sama kryminalnaja sprava maje jaŭny palityčny padtekst».