Alaksandr Murachoŭski admaŭlaje, što Navalny atručany. Fota Asašyejted pres
Ministr achovy zdaroŭja Omskaj vobłaści Alaksandr Murachoŭski prapaŭ bieź viestak padčas palavańnia, pišuć miascovyja ŚMI.
7 maja jon pajechaŭ na kvadracykle ŭ les u Balšavukaŭskim rajonie dyj źnik.
Znajšli jaho tolki praz dva dni — žyvym.
Alaksandr Murachoŭski ŭznačaliŭ Ministerstva achovy zdaroŭja Omskaj vobłaści ŭ listapadzie 2020 hoda. Da hetaha jon byŭ hałoŭnym doktaram balnicy chutkaj miedycynskaj dapamohi №1 u Omsku, kudy ŭ žniŭni 2020-ha paśla atručeńnia dastavili antykarupcyjnaha błohiera Alaksieja Navalnaha.
Lekary Omskaj balnicy, u tym liku i Murachoŭski, nastojvali na tym, što ŭ Navalnaha simptomaŭ atručeńnia niama. Kali siamji ŭdałosia vyvieźci Navalnaha ŭ Niamieččynu, tam u jaho kryvi vyjavili atrutnaje rečyva «Navičok».
Namieśnik hałoŭnaha doktara Omskaj balnicy Siarhiej Maksimišyn pamior u lutym u 55 hadoŭ ad sardečnaha prystupu. Heta zdaryłasia praz 6 miesiacaŭ paśla atručeńnia Navalnaha. U sakaviku pamior jašče adzin lekar, jaki pracavaŭ u hetaj balnicy padčas špitalizacyi Navalnaha — zahadčyk adździaleńnia traŭmatałohii i artapiedyi Rustam Ahišaŭ. Pryčynaj śmierci 62-hadovaha miedyka byli nazvanyja nastupstvy insultu, pieraniesienaha ŭ śniežni 2020 hoda, praz 4 miesiacy paśla epizodu z Navalnym.
