U niadzielu Bi-bi-si paviedamiła, što adzin z žycharoŭ hrafstva Kient znajšoŭ na aŭtobusnym prypynku pačak pramokłych ad daždžu sakretnych papier. Jon pieradaŭ svaju znachodku Bi-bi-si, žurnalisty jakoj častkova raspaviali pra ich źmiest.
U adnym pakiecie dakumientaŭ abmiarkoŭvajecca, u pryvatnaści, imaviernaja reakcyja Rasii na prachod eśminca praz vody pablizu ŭźbiarežža Kryma.
Inšaja častka dakumientaŭ źmiaščaje abmierkavańnie płana mahčymaj vajennaj prysutnaści Vialikabrytanii ŭ Afhanistanie paśla zaviaršeńnia tam apieracyi NATA pad kiraŭnictvam ZŠA.
U paniadziełak namieśnik ministra abarony Vialikabrytanii Džeremi Kuin zajaviŭ deputatam parłamienta, što ŭ incydencie, imavierna, vinavaty vysokapastaŭleny supracoŭnik urada, jaki časova pazbaŭleny dostupu da sakretnych materyjałaŭ.
«Na minułym tydni vysokapastaŭleny supracoŭnik zhubiŭ zasakrečanyja dakumienty Ministerstva abarony. Hety supracoŭnik sam paviedamiŭ pra heta, — zajaviŭ Kuin u Pałacie hramadaŭ. — Padobna, što heta było zroblena pamyłkova. Ja nie chaču pra niešta kazać da źjaŭleńnia vynikaŭ rasśledavańnia, ale heta padobna na pamyłku, dapuščanuju hetym čałaviekam».
«Mnie vielmi prykra, što taki incydent mieŭ miesca, jaho rasśledavańnie budzie praviedziena samym pilnym čynam», — dadaŭ namieśnik ministra.
Jon pryznaŭ, što na častcy dakumientaŭ značyŭsia hryf «sakretna, tolki dla čytańnia brytanskimi supracoŭnikami» («Secret UK Eyes Only»).
Kuin taksama paviedamiŭ, što pakiet dakumientaŭ užo viernuty ŭradu, i ciapier jaho supracoŭniki praviarajuć, ci ŭsie zhublenyja papiery na miescy.
Pa słovach čynoŭnika, padčas rasśledavańnia buduć taksama vyvučacca abstaviny, pry jakich źmiest dakumientaŭ akazaŭsia apublikavany, i toje, jakim čynam ułady adreahavali na incydent. Akramia taho, pierahledziać i ahulny paradak abarotu dakumientaŭ z sakretnymi źviestkami.
Deputaty spytali namieśnika ministra, ci majuć namier ułady rasśledavać mahčymaje parušeńnie supracoŭnikami Bi-bi-si zakonaŭ ab abaronie dziaržaŭnaj tajamnicy pry publikacyi sakretnych źviestak.
«U idealnym śviecie, dzie vykonvajucca ŭsie praviły, takija dakumienty nie pavinny byli patrapić tudy, dzie jany apynulisia. Tak što całkam vidavočna, što pieršapačatkovaja pamyłka mienavita ŭ hetym», — adkazaŭ Kuin.
Jon dadaŭ, što ŭ padobnych vypadkach ludzi pavinny pieradavać svaje znachodki palicyi. «Choć, zrazumieła, ja b chacieŭ, kab Bi-bi-si ich adrazu nam addała i pra ich nie raspaviadała, u ich taksama jość svaja praca. I ja pryznaju, što jany pavodzili siabie adkazna i viarnuli dakumienty ŭ Ministerstva», — skazaŭ čynoŭnik.
Sakretnyja dakumienty Minabarony Brytanii z płanami eśminca «Defiender» u Čornym mory znajšli na aŭtobusnym prypynku
