Historyja Alaksandra Šatrova ŭ mnohim pakazalna trahičnaja.
Upieršyniu ŭ žyćci schadziŭšy na vybary i prahałasavaŭšy, jak ličać u kalektyvie, za Cichanoŭskuju, jon užo praź niekalki miesiacaŭ trapiŭ pad sankcyi jak vorah demakratyi.
Napeŭna, niekali šyrokim kołam stanie viadoma pra vartyja pavahi ŭčynki hetaha čałavieka ŭ dni pačatku nacyjanalnaj katastrofy 2020-ha, ale dakładna paźniej: siadzieńnie na špahacie pamiž dvuma ahniami pakul nie spryjaje ščyravańniu.
Alaksandr Šatroŭ
Sam jon ros u Rasii i akazaŭsia ŭ Biełarusi ŭ 2003-m hodzie, adkryŭšy tut nievialikuju kampaniju UTL. Maci Šatrova z Rahačova, jana ŭžo pamierła, baćka taksama. Jon, darečy, pracavaŭ u KDB.
Sam «Sinezis», jaki taksama trapiŭ pad sankcyi i staŭ nahodaj dla piersanalnych abmiežavańniaŭ, uźnik u 2007-m hodzie.
Kampanija zajmajecca prahramami dla kiravańnia masavymi akcyjami (zajmałasia hetym na Jeŭrapiejskich hulniach u Minsku), štučnym intelektam i sistemami kantrolu hramadskaj biaśpieki.
Samy skandalny pradukt — Kipod.
Mierkavałasia, što sistema abjadnaje kamiery pa ŭsioj krainie, i ŭ ahulnym videapatoku možna budzie vyjaŭlać asob, jakija znachodziacca ŭ vyšuku.
Zacikaŭlenyja — dziaržaŭnyja siłavyja orhany.
Sam pa sabie Kipod naŭrad ci moža być rascenieny jak represiŭnaja sistema — heta pradukt dla idealnaha śvietu, dzie karystalnikam prahrama patrebna dla abarony zakonnaści, a nie dla palityčnych represij. Takija sistemy dziejničajuć u demakratyčnych krainach, jakija (pakul jašče) navat bolš nasyčanyja kamierami, čym Biełaruś.
U našaj ža realnaści paŭstała pytańnie, chto i dla čaho vykarystoŭvaje sistemu.
Tak, viadoma, što palitźniavolenaha Mikałaja Dziadka vyličyli z dapamohaj Kipod.
A kaho jašče? Niekali daviedajemsia.
Ci prynios Kipod Šatrovu hrošy? Naŭrad ci.
Los i kampanii, i sistemy trahičny. U ideale mierkavałasia, što, staŭšy apierataram sistemy, «Sinezis» (ciapier u naźvie apieratara hetaha słova niama i kampanija nazyvajecca «24ch7 Panoptes») raspracuje pradukt, da jakoha buduć padklučanyja sotni tysiač kamier pa ŭsioj krainie, u vyniku čaho apieratar budzie mieć hrošy ad abanientaŭ, a siłaviki — infarmacyju.
Ale ŭ realnaści akazałasia tak, što dziaržava nie zmahła zabiaśpiečyć padklučeńnie navat svaich abjektaŭ: kamiery darahija, abanienckaja płata taksama. Nu jaki vykankam ci škoła pačnuć padklučać sistemu, kali i na bolš važnaje hrošy nie zaŭsiody jość?
Z pryvatnikam historyja takaja ž: navošta na pustym miescy stvarać dadatkovuju hrafu vydatkaŭ bieź vidavočnaj ułasnaj vyhady? Tak i nie pryžyłosia.
Moža być, dziaržava b niejak i mahła «paspryjać» ukaranieńniu sistemy, naprykład, zrabiŭšy jaje padklučeńnie takim ža abaviazkovym dla pradpryjemstvaŭ, jak i najaŭnaść pažarnaha apaviaščalnika, ale niešta nie atrymałasia: moža być, nie apošniaje značeńnie tut mieła źmiena kiraŭnictva AAC.
Unutranyja intryhi dziaržaŭnych instytucyj, jakija nie razumieli, čamu prava pierśpiektyŭnaha zarobku addadziena pryvatniku, pryviali da taho, što ŭ pačatku hoda prava być techničnym apierataram sistemy hramadskaha manitorynhu pieradali «Biełtelekamu».
U vyniku «24ch7 Panoptes» sa svaim Kipod bałansuje na miažy bankructva — zatračanyja na raspracoŭku hrošy nikoli nie buduć adbityja, bo kamiery nie padklučanyja. Pa našaj infarmacyi, miesiačnaja vyručka składaje kala 90 tysiač rubloŭ, miesiačnyja vydatki — kala 180 tysiač rubloŭ.
Niaspłačanych kredytaŭ — na 3,7 miljona rubloŭ.
U vyniku kampanii zastajecca abo bankrucicca, abo niejkim čynam sprabavać viarnuć hrošy ŭ dziaržavy, supracoŭnictva ź jakoj nie ŭdałosia. Da taho ž viartać hrošy pryjdziecca i Alaksieju Aleksinu, jaki niekali ŭvachodziŭ u «Sinezis» jak čysty inviestar, ale, nie atrymaŭšy čakanaha prybytku, prosić častku inviestycyj nazad.
Čytajcie taksama. Raspracoŭščyk nacyjanalnaj sistemy videanazirańnia: U Biełaruś trapiŭ vypadkova. Zabaraniaju biełaruskuju movu ŭ čatach
