Fota z partała then24.com
Hałoŭny kinaahlad śvietu viartajecca na bulvar Kruazet: siońnia ŭ francuzskich Kanach adkryvajecca 74-y Kanski kinafiestyval. Letaś praz epidemijałahičnuju situacyju jon byŭ admienieny. Sioleta ž, choć i z abmiežavańniami, dyrekcyja ładzić publičnyja pakazy, arhanizoŭvaje čyrvonyja darožki i zaprašaje zornych haściej.
U prahramie fiestyvalu bolš za šeśćdziasiat kinakarcin, ź jakich dvaccać čatyry ŭdzielničajuć u konkursie. Niekatoryja ź ich publika čakaje z pazaminułaha hoda. Naprykład, miuzikł «Anet» francuzskaha režysiora Leosa Karaksa, što siońnia stanie filmam adkryćcia.
Kanski kinafiestyval taksama pakaža stužki Uesa Andersena, Mii Chansen-Love, Bruna Dziumona, Ildzika Eńjedzi, Ashara Farchadzi. Z ruskamoŭnych aŭtaraŭ u prahramu trapili Siarhiej Łaźnica, Kirył Siarebranikaŭ, Alaksiej Hierman-małodšy.
Letaś fiestyval choć i byŭ admienieny, dyrekcyja tym nie mienš abviaściła prahramu z bolš jak piacidziesiaci karcin. Taja nie mahła być pakazanaja całkam na Błakitnym bierazie, ale mierkavałasia, što adabranyja filmy razyducca pa inšych fiestyvalach i ŭ kinaprakacie z paznakaj «Kany-2020». Da minułaha hoda kinaahlad admianiaŭsia tolki adnojčy — u 1939-m, u 1968 hodzie studenckija chvalavańni spynili jaho ŭ pracesie.
Staršynioj žury Asnoŭnaha konkursu sioleta źjaŭlajecca amierykanski režysior Spajk Li — jaho možna ŭbačyć na postary festu. A śpiecyjalnym hościem cyrymonii adkryćcia stanie Pon Džun-cho — aŭtar filma «Parazity», jaki atrymaŭ «Załatuju palmavuju halinu» na apošnim Kanskim kinafiestyvali, a paśla ŭchapiŭ adrazu čatyry «Oskary».
Kanski kinafiestyval prachodzić z 6 da 17 lipienia.
