Palityčny ahladalnik Arciom Šrajbman sa skiepsisam stavicca da vykazvańnia jeŭrakamisara:
«Nie dumaju, što słovy jeŭrakamisara realizujucca. Chutčej za ŭsio, jana nie pahłyblałasia ŭ detali biełaruska-jeŭrapiejskich adnosin i dała standartny ŭ takich vypadkach adkaz: kali adniekul idzie mihracyjnaja prablema, to treba rabić bolš žorstkimi vizavyja patrabavańni. Amal upeŭnieny, što vykazvańnie budzie chutka asprečana albo pra jaho zabuduć».
Šrajbman źviartaje ŭvahu, što kali biełarusy pazbaviacca mahčymaści atrymać jeŭrapiejskija vizy, to heta nijak nie adabjecca na patokach mihrantaŭ ź Blizkaha Uschodu praź biełaruskuju terytoryju.
Ź im zhodny i palityčny ahladalnik Alaksandr Kłaskoŭski:
«Kali vykazvańnie padadziena ŭ ŚMI karektna, heta vyklikaje ździŭleńnie. Jakoje dačynieńnie da vizavaj mihracyi maje nielehalnaja mihracyja?»
Kłaskoŭski padkreślivaje, što ŭ biełarusaŭ i tak abmiežavanyja mahčymaści dla padarožžaŭ. Jon miarkuje, što heta mierkavańnie tolki adnoj jeŭrakamisarki: «Dumaju, na ŭzroŭni ES jano nie budzie pryniataje».
Dyrektar Instytuta palityčnych daśledavańniaŭ «Palityčnaja śfiera» Andrej Kazakievič razhladaje hetuju zajavu jak tolki adnu z mahčymych reakcyj Jeŭrapiejskaha Sajuza na mihracyjny kryzis. I nahadvaje, što jeŭrapiejskija čynoŭniki ŭžo rabili zajavu na hety kont. Tak, u červieni aficyjny Minsk zajaviŭ, što pačaŭ «realizacyju pracedury spynieńnia dziejańnia» pahadnieńnia pra readmisii ź ES. Što heta takoje? Biełaruś abaviazvajecca prymać nazad svaich hramadzian, kali ŭ ich niama prava znachodzicca ŭ ES, abo hramadzian trecich krain, jakija ŭjechali ŭ ES praź Biełaruś. Pahadnieńnie pra readmisiju źjaŭlałasia ŭmovaj pahadnieńnia ab spraščeńnie vydačy vizaŭ (jano i praduhledžavała, što biełarusy buduć płacić za ich nie 80 jeŭra, a 35).
Jak nahadvaje Kazakievič, u červieni 2021-ha Jeŭrapiejski Sajuz paćvierdziŭ, što prypynieńnie pahadnieńnia ab readmisii nie aznačaje aŭtamatyčnaj prypynieńnia vizavaha pahadnieńnia.
«Spadziajusia, što pieršaja reakcyja bolš adpaviadaje palitycy Jeŭrapiejskaha Sajuza ŭ dačynieńni da Biełarusi», — kaža ekśpiert.
Andrej Kazakievič miarkuje, što pazicyja jeŭrakamisara Iłvy Jochansan, vykazanaja zaraz, nie ŭzhodnienaja z bolš šyrokaj palityčnaj supolnaściu ES.
«Naturalna, budziem nazirać za padziejami ŭ dynamicy, ale mnie zdajecca, nie apraŭdana pierakładać adkaznaść za hety kryzis na biełarusaŭ. Biełaruskija ŭłady vykarystoŭvajuć jaho ŭ svaich metach. Tym bolš, što hetyja ŭłady nie pryznajucca z boku ES u jakaści lehitymnych», — dadaje Kazakievič.
Palityčny ahladalnik Vadzim Mažejka miarkuje, što zajavu Jochansan «ciažka nazvać heta niejak inačaj, jak poŭnaje hłupstva»:
«Nielehały na miažy Litvy, zhodna sa źviestkami jaje pamiežnaha kamiteta — heta hramadzianie Iraku, Konha dy Kamieruna, jakija nie majuć nie toje što šenhienskich vizaŭ, a časam navat i pašpartoŭ. Spynieńnie vydačy vizaŭ hramadzianam Biełarusi anijak nie paŭpłyvaje na hetuju situacyju, adno što ŭskładnić žyćcio prostym ludziam, jakim treba ŭ Jeŭrasajuz, u tym liku, pa humanitarnych pryčynach. Tamu pakarać biełarusaŭ za mihracyjny kryzis, stvorany ŭładami, — heta niejkaja łohika «bambić Varoniež».
Mažejka upeŭnieny, što ŭ vyniku hetaje rašeńnie pryniata nie budzie, jeŭrapiejskija krainy praciahnuć vydaču vizaŭ biełarusam, «u tym liku dziakujučy advakacyi ofisa Cichanoŭskaj».
