Zajaŭlajem: «Naša Niva» — niezaležnaje ŚMI, u svajoj pracy my zaŭsiody kiravalisia zakonam i žurnalisckimi standartami, my nikoli nie płacili hierojam publikacyj, nie schilali ich da anijakich dziejańniaŭ, my abjektyŭna aśviatlali toje, što adbyvajecca ŭ Biełarusi i za miažoj.
Praktyka dopytu hierojaŭ publikacyj u Biełarusi nie novaja. Z takim samym padychodam niadaŭna sutyknułasia žurnalistka «Biełsatu» Valaryna Kustava, jakaja aścierahajučysia palityčnaha pieraśledu, była vymušanaja źjechać ź Biełarusi. Hierojami jaje žurnalisckich materyjałaŭ adrazu ž zacikavilisia siłaviki. Jak raspaviadała Valaryna, ich schilali da pryznańniaŭ, što žurnalistka davała im hrošy za intervju. Paźniej «pryznalnyja» apoviedy źjavilisia ŭ prapahandysckich ŚMI i telehram-kanałach.
Padobna, što tym ža šlacham siłaviki iduć zaraz pa spravie našaniŭcaŭ. Ad imia redakcyi zajaŭlajem: «Naša Niva» nikoli nie płaciła hierojam publikacyj i nie vymušała ich zajmać tuju ci inšuju palityčnuju pazicyju, vydańnie nie źjaŭlajecca palityčnym hulcom, naša zadača — praŭdziva aśviatlać padziei ŭ krainie i za miažoj.
8 lipienia ŭ našym pamiaškańni prajšoŭ pieratrus, siłaviki zabrali techniku, dakumienty, niekatoruju majomaść sapsavali. Paśla hetaha pamiaškańnie było apiačatanaje. Siońnia, 15 lipienia, siłaviki znoŭ pryjšli tudy.
Nahadajem, tydzień tamu byli zatrymanyja hałoŭny redaktar NN Jahor Marcinovič, hałoŭny redaktar časopisaŭ «Naša historyja», «Dudu» i «Aściarožna: dzieci!» Andrej Dyńko, kiraŭnik adździeła rekłamy i markietynhu Andrej Skurko, hałoŭny buchhałtar Volha Rakovič. Usie jany prachodziać padazravanymi pa č. 1 art. 342 KK (arhanizacyja ci padrychtoŭka dziejańniaŭ, jakija hruba parušajuć hramadski paradak, abo aktyŭny ŭdzieł u ich). Pa hetym artykule asudžanyja mnohija ŭdzielniki akcyj, što prachodzili da i paśla vybaraŭ u Biełarusi, pravaabaroncy ličać taki pieraśled palityčna matyvavanym.
Adznačym, što zakon «Ab ŚMI», zakon «Ab masavych mierapryjemstvach» dazvalaje žurnalistam aśviatlać masavyja mierapryjemstvy, niezaležna ad taho, sankcyjanavanyja jany ci nie. Pravaabaroncy pryznali zatrymanych našaniŭcaŭ palitviaźniami.
