Siońnia ŭ Vašynhtonie Śviatłana Cichanoŭskaja praviała pieramovy ź dziaržsakratarom ZŠA Entani Blinkienam, namieśnikam dziaržsakratara Viktoryjaj Nułand i daradcam Dziarždepartamienta ZŠA Derekam Šole. Jany abmierkavali incydent z Ryanair, represii suprać hramadzianskaj supolnaści i miedyja, nielehalnuju mihracyju ŭ Litvu.
Na sustrečy Cichanoŭskaja zaklikała ZŠA:
— Pryniać pakiet ekstranaj dapamohi dla biełaruskich niezaležnych ŚMI, Youtube-prajektaŭ, Telegram-kanałaŭ, žurnalisckich rasśledavańniaŭ. Pašyryć dapamohu hramadzianskaj supolnaści, represavanym i pryvatnamu biznesu ŭ Biełarusi, palitviaźniam i ich siemjam. Pavialičyć kolkaść stypiendyjalnych prahram dla padtrymki studentaŭ i daśledčykaŭ;
— Dać sihnał Rasii, što padpisanyja kantrakty i damovy nie buduć pryznanyja jurydyčna i anulujucca: «Rasija moža ihrać kanstruktyŭnuju rolu ŭ vyrašeńni kryzisu ŭ Biełarusi — dyjałoham i udziełam u kanfierencyi pa temie Biełarusi»;
— Uzmacnić razam z partniorami palityčny i ekanamičny cisk na biełaruskija ŭłady;
— Akazać dypłamatyčnuju padtrymku biełaruskim demakratyčnym siłam u inšych krainach;
— Pryniać aktyŭny ŭdzieł u arhanizacyi i praviadzieńni kanfierencyi vysokaha ŭzroŭniu pa vyrašeńni kryzisu ŭ Biełarusi.
Dziaržsakratar pryniaŭ Cichanoŭskuju ŭ pryjomnaj zale Dziarždepartamienta, sustreča doŭžyłasia hadzinu. Blinkien skazaŭ, što jon u pastajannym kantakcie ź Biełym domam i prezidentam Bajdenam — i jany abmiarkoŭvajuć biełaruskaje pytańnie.
