Departamient statystyki Litvy štodnia abnaŭlaje statystyku pa kolkaści nielehalnych mihrantaŭ. Tak, z pačatku hoda bolšaść uciekačoŭ — hramadzianie Iraka. Ich zafiksavana 2555 čałaviek. Na druhim miescy — Konha (191 čałaviek), na trecim — Kamierun (129 čałaviek). Čaćviortaje i piataje miesca ŭ Siryi (124 čałavieki) i Irana (91).
Jak raskazvali irakskim žurnalistam turystyčnyja kampanii i kantrabandysty, što pierakidvajuć mihrantaŭ u Biełaruś, arhanizacyja pajezdki na samalocie, jak praviła, kaštuje $15—30 tysiač. Siudy ŭvachodziać zarobki «arhanizataraŭ turaŭ», pieraloty i servisnyja zbory, žyćcio ŭ haścinicach, ekskursii i abaviazkovy zakład.
Da $108 tysiač aeraportu i €6000 «Biełaeranavihacyi»
Pačniom ź nievialikich hrošaj. Kali tolki samaloty ź mihrantami ŭvachodziać u pavietranuju prastoru našaj krainy, adrazu ž uklučajecca ličylnik «Biełaeranavihacyi». Za kožnyja 100 kiłamietraŭ pavietranych šlachoŭ hetaja arhanizacyja biare 43 jeŭra (takija staŭki zafiksavanyja ŭ pałažeńni ab servisnych zborach).
Da hetaha tydnia «Irakskija avijalinii» vykonvali pa dva rejsy na tydzień: adzin z Bahdada, druhi z Sulejmanii. Taksama dvojčy na tydzień u Minsk z Bahdada lataje kampanija FlyBagdad. Jak vyznačyŭ padčas rasśledavańnia irakski žurnalist Karejem Batanie, na samaloty mienavita hetych avijakampanij zvyčajna kuplajuć bilety ŭciekačy.
Jak praviła, kampanii adpraŭlajuć Boeing 737-800 vahoj 79 ton (ad jaje zaležyć śpiecyjalny kaeficyjent). To-bok za adzin rejs kampanija płacić Biełarusi 189 jeŭra. Takim čynam, za dva apošnija miesiacy irakskija avijarejsy prynieśli «Biełaeranavihacyi» kala 6048 jeŭra.
U najbližejšy čas heta ličba vyraście. Litaralna z hetaha tydnia kampanija «Irakskija avijalinii» pavialičvaje kolkaść rejsaŭ da piaci na tydzień. I jana budzie płacić «Biełaeranavihacyi» dadatkova kala 2268 jeŭra na miesiac.
Jašče ad 15 da 30 dalaraŭ servisnaha zboru z kožnaha avijabileta biare Nacyjanalny aeraport «Minsk». Kali dapuścić, što ŭsie 3643 uciekačy dabiralisia da Biełarusi na samalocie, to tolki za košt biletaŭ jany pakinuli ŭ aeraporcie ad $54 da $108 tysiač.
Ad $84 tysiač haścinicam
Irakski žurnalist Karejem Batanie vyśvietliŭ u turystyčnych ahienctvach Iraka, što jość ceły śpis haścinic, u jakich pa damoŭlenaści biełaruskaha i irakskaha ŭradaŭ zasialajuć takich zamiežnikaŭ. Heta «Płanieta», «Spadarožnik», Minsk Hotel, a taksama Crown Plaza i Marriott.
Košty na biudžetnyja dvuchmiascovyja numary za noč startujuć ad $22 u «Spadarožniku», $40 u «Płaniecie» da $88 u hateli «Minsk», $99 u Crown Plaza, $161 u Marriott.
Kali ŭziać navat samy tanny varyjant — «Spadarožnik», — pamnožyć na 2555 uciekačoŭ ź Iraka, to za sutki haścinica zarabiła b $28 tysiač.
Užo ŭ Litvie mihranty kazali litoŭskim žurnalistam, što, jak praviła, žyli ŭ Minsku minimum troje sutak. U takim vypadku minimalnaja suma pavialičvajecca da $84 tysiač.
Realna jana moža być našmat bolšaj, bo dakładna nieviadoma, kolki ŭciekačoŭ žyli ŭ jakich haścinicach.
Kala $7,6 miljona za toje, što nie viernucca ŭ Irak
I samaja cikavaja reč, u paraŭnańni ź jakoj astatnija sumy padaducca nie takimi ŭžo i vysokimi. Irakskija turapieratary raskazali litoŭskaj telekampanii LRT, što kožny hramadzianin Iraka, jaki adpraŭlajecca pa turystyčnaj vizie ŭ Biełaruś, pavinien pakinuć svojeasablivy «zakład» u $3000.
Hetuju infarmacyju irakskim žurnalistam paćvierdziŭ Miejer Sachiebran — uładalnik adnaho z turystyčnych apierataraŭ. Pa jaho słovach, kali čałaviek nie viartajecca nazad u Biełaruś, to hety zakład zastajecca ŭ krainie. Jakoj arhanizacyi iduć hetyja hrošy, Sachiebran nie ŭdakładniŭ. Jak i astatnija irakskija arhanizatary turaŭ u Biełaruś, ź jakimi pahavaryli žurnalisty litoŭskaj telekampanii LRT. Adnak usie jany paćvierdzili, što isnujuć anałahičnyja damoŭlenaści ź biełaruskim bokam.
A ciapier ličym. Niachaj z 2555 mihrantaŭ «zakład» pakinuła tolki pałova, to-bok 1264 čałavieki. Heta jak minimum $3,8 miljona. Kali ž zapłacili ŭsie, to suma vyrastaje da $7,6 miljona.
Kali padličyć usie vyšejpieraličanyja traty irakcaŭ, to ahulnaja suma, jakuju jany pakinuli ŭ Biełarusi, składzie ad $4 miljonaŭ da $7,8 miljona za dva miesiacy. Dla paraŭnańnia, čysty prybytak Minskaha traktarnaha zavoda za ceły 2020 hod skłaŭ kala $3,3 miljona.
