«ES i ZŠA buduć vymušany ŭstupić u pieramovy dziela razradki napružańnia»
Palitołah Valeryj Karbalevič u svaim tełhieram-kanale adznačaje, što Łukašenka jašče ź vieraśnia paŭtaraŭ, što zachodnija susiedzi Biełarusi chočuć vajny i rychtujucca da jaje. Ale kali raniej biełaruskija čynoŭniki ŭzhadvali pra jaje z prymietnikam «hibrydnaja» i «infarmacyjnaja», to zaraz situacyja moža pryvieści da realnaha siłavoha kanfliktu na biełaruska-litoŭskaj miažy.
«Takoje raźvićcio padziej vyhadnaje Łukašenku, — ličyć ekśpiert. — Jamu ciapier niama čaho hublać. Bo ŭžo ŭsio zhublena. Siłavy kanflikt, pavodle jaho łohiki, napužaje Zachad. Tam ubačać, što majuć spravu z čałaviekam biez tarmazoŭ, jaki zahnany ŭ kut i moža pajści na lubyja dziejańni. I takim čynam, pad pahrozaj łakalnaj vajny ES i ZŠA buduć vymušany ŭstupić u pieramovy dziela razradki napružańnia, to-bok šantažom, štučnym mihranckim kryzisam prymusić Zachad sastupić. Bo tam ža ŭsie palityki «bieź jajec». Łukašenka idzie va-bank, padvyšaje staŭki.
Ź inšaha boku, madel «krepaści ŭ abłozie» — idealny miechanizm utrymańnia ŭłady. I maleńkaja vajna tolki macuje hety vobraz, stvaraje mahčymaść dadatkovaj mabilizacyi dziaržaŭnaha aparatu, uzmacnieńnia represij suprać «piataj kałony» ŭ tyle».
Analityk dadaje, što z hetaj łohiki idzie i «małazrazumieły najezd na Ukrainu biez zaŭvažnych padstaŭ»:
«Vidać, kali stvarać vobraz «krepaści ŭ abłozie», to vorahi pavinny być z usich bakoŭ, ci choć by z troch. Z pazicyi ŭtrymańnia ŭłady siłavy kanflikt Łukašenku vyhadny. Ale vajna dakładna nie vyhadnaja biełaruskamu narodu. Tak što ŭ płanie mabilizacyi hramadskaj padtrymki tut jon nie pažnie łaŭraŭ».
Mihracyjny kryzis dapamoža damovicca z Rasijaj i pry nieabchodnaści ŭvieści nadzvyčajnaje stanovišča
Palityčny ahladalnik Andrej Jelisiejeŭ taksama ličyć, što Łukašenku vyhadny kanflikt ź Litvoj. Na jaho dumku, vybuchaniebiaśpiečnaja situacyja na miažy nie vyhladaje čymści dziŭnym i chutčej była pytańniem času.
«Biełaruski bok inśpiravaŭ haručuju situacyju ŭ vyniku hrubaha, ale davoli kreatyŭnaha vykarystańnia mihracyjnaj karty, - piša Jelisiejeŭ na svajoj staroncy ŭ Fejsbuku. - I rasijskuju prapahandu nakont «fašysckaj ci nacysckaj» Litvy adyhrali, i pasprabavali nackavać na Litvu isłamistaŭ. A hałoŭnaje - stvaryli svajo apisańnie ŭsioj hetaj historyi, u jakoj Biełaruś źjaŭlajecca niavinnaj achviaraj «kalarovaj revalucyi» i zachodniaj «hibrydnaj vajny». Maŭlaŭ, paśla takoj ahresii Biełaruś prosta skazała «chopić» i vyrašyła nie marnavać čas i resursy na abaronu čužych miežaŭ. A ŭ vyniku varožaja kraina pačała zabivać mirnych mihrantaŭ i zapałochvać ich strełami pa-nad hałovami ŭ bok Biełarusi».
Pa mierkavańni Jelisiejeva, Łukašenku vyhadna mieć u zapasie takuju napružanaść, jakaja b dazvoliła ledź nie ŭ luby momant inicyjavać jašče bolš abvostranuju situacyju. Jon tłumačyć, što dla hetaha isnuje dźvie pryčyny. Adna ź ich — faktar rasijskaj padstrachoŭki.
«Bližejšyja miesiacy — pieryjad kulminacyi pieramoŭ z Rasijaj pa novamu intehracyjnamu paktu, padpisańnie jakoha budzie pradavacca za pryznańnie Kramlom novaj kanstytucyi. U vypadku surjoznaj ŭnutrypalityčnaj destabilizacyi ŭ hety pieryjad apošnim kozyram Łukašenki budzie pryciahnieńnie Rasii. Albo, pa mienšaj miery, pahroza pryciahnieńnia Rasii. Vydumanaja abo inśpiravanaja pamiežnaja eskałacyja jak vydatnaja nahoda dla adčajnaj sproby vykarystoŭvać rasijskuju kartu i advieści miedyjapaviestku ŭ bok».
Druhoj pryčynaj palitołah nazyvaje fiktyŭnuju padstavu dla ŭviadzieńnia nadzvyčajnaha abo vajennaha stanovišča.
«Biełaruskim uładam vielmi nie z ruki budzie pryznacca ŭ finansavych pravałach i surjoznym efiekcie zachodnich sankcyj. Statystyčnyja dadzienyja pa asnoŭnych handlovych katehoryjach zasakrecili, tamu vonkavym naziralnikam składana sudzić ab terminach nabližeńnia mahčymaha finansavaha abvału. Ale biełaruskija-to ŭłady hetymi dadzienymi vałodajuć. I ŭ krytyčny momant im moža być praściej apraŭdać zamarozku ŭkładaŭ u bankach i prypynieńnie inšych bankaŭskich apieracyj nie maštabnymi finansavymi prablemami z-za svajoj palityki, a uviadzieńniem nadzvyčajnaha ci vajennaha stanovišča ŭ suviazi z «litoŭskaj pravakacyjaj ci ahresijaj», — dadaje Andrej Jelisiejeŭ.
