«U adpaviednaści z rasparadžeńniami ŭrada Upraŭleńnie hramadzianskaj avijacyi Iraka abjaŭlaje ab prypynieńni ŭsich rejsaŭ ź Iraka ŭ Miensk z avijakampanijaj «Irakskija avijalinii» abo inšymi nacyjanalnymi pieravozčykami da dalejšaha paviedamleńnia», — havorycca ŭ dakumiencie.
«Rejsy ź Biełarusi buduć dazvolenyja tolki dla viartańnia irakskich hramadzian, — havorycca ŭ zajavie irakskaha viedamstva. — Hetyja samaloty buduć vylatać ź Iraka biez pasažyraŭ».
Nahadajem, 5 žniŭnia «Irakskija avijalinii» paviedamili ab prypynieńni rejsaŭ u Miensk na tydzień.
Z Bahdada ŭ Minsk latali avijakampanii Iraqi Airways (čatyry razy na tydzień) i FlyBaghdad (dvojčy na tydzień). Raniej paviedamlałasia, što ŭ žniŭni rejsy ŭ Minsk buduć adpraŭlacca nie tolki z Bahdada, ale i jašče z Basry, Erbila i Sulejmanii.
Litva i inšyja krainy Jeŭrasajuza abvinavačvali Minsk u faktyčnaj arhanizacyi nielehalnaj mihracyi irakcaŭ u ES. Kab spynić heta, litoŭskija pamiežniki z dapamohaj jeŭrapiejskaj pamiežnaj słužby «Fronteks» pačali vypravadžvać mihrantaŭ ź biełaruskimi vizami tymi ž ściežkami, jakija jany pryjšli. A paralelna jeŭrapiejskaja dypłamatyja pravodziła pieramovy z uładami Iraka.
Jeŭrapiejcy ličać biaźvizavy ŭjezd u Biełaruś «z metaju vakcynacyi», niadaŭna ŭviedzieny biełaruskimi ŭładami dla siami dziasiatkaŭ krain, pieravažna Treciaha śvietu, šyrmaj dla nielehalnaj mihracyi, bo ŭzrovień vakcynacyi ŭ samoj Biełarusi adzin z najnižejšych u Jeŭropie.
