«…Vam nadakučyła padychodzić rankam da palicy i bačyć na joj ŭsialakija-roznyja škarpetki, ź jakich u nivodnaj niama pary?Vam abrydła, usio ž pajšoŭšy na hiešeft z sumleńniem dy naciahnuŭšy čornuju i čyrvonuju, marmytać u haściach niešta kštałtu: «U vas takaja ŭtulnaja vitalnia, možna, ja lepiej pastaju tut?» … I Vam, amal vypchnutamu ŭ haścioŭniu, abrydła histeryčna kryčać haspadaram: «Pahladzicie ŭ vakno, pahladzicie ŭ vakno — tam latajučy Pamidoraŭ!», kab tymčasam lichamankava skinuć boty i chutkastrelna ŭpliščycca ŭ pieršyja-lepšyja tapki 23-ha pamieru?...
Zazirnuła sonca i ŭ Vaša akonca! My prapanujem Vam revalucyjny pradukt, jaki pryniasie Vam dušeŭny spakoj: heta absalutna fantastyčny, unikalny
nabor «Adnolkavyja škarpetki»©!
U hetym całkam nievierahodnym nabory Vy znojdziecie identyčnyja, tojesnyja, tyja samyja, -Božački, nazyvajcie jak chočacie! — adnym słovam, dźvie absalutna adnolkavyja škarpetki. Tolki padumajcie: dva škarpetkavyja asobniki, jakija admysłova dla Vas vynajšli najviadomyja navukoŭcy, vykarystoŭvajučy najnoŭšyja farbavalnyja i vymiaralnyja technałohii, jakija anichto nie adroźnić ni pa kolery, ni pa pamiery.
Spažyviec: «Nieziamnaja asałoda! Viadoma, ja i raniej padazravaŭ, što nasić škarpetki - kajf: jany tak pryjemna ablahajuć nohu, u ich hetak utulna. Ale ź ciaham času vyśvietliŭ, što nie ŭsie škarpetki adnolkavyja. Reč u tym, što ja — pijanist i ŭ mianie niama času hladzieć za nahami. (Biahučy podpis: Leapold Švahier, pijanist). Nie tak daŭno, vystupajučy pierad publikaj, pačaŭ zaŭvažać, što žančyny advaročvajuć ad mianie pozirk i navat paśmichajucca. Ja nie moh zrazumieć, u čym prablema: prarech zašpileny, parezaŭ ad haleńnia niama. Ja pazbyŭsia snu, pačaŭ zazirać u butelku. Pakul adnojčy siabar nie paraiŭ nabyć nabor «Adnolkavyja škarpetki»©. Majo žyćcio cudoŭna pieramianiłasia: žančyny na kancertach znoŭ pazirajuć u moj bok, a da mianie viarnułasia ŭpeŭnienaść. Nie pavierycie: ja navat dazvalaju sabie ciapier rezacca pry haleńni i nie zašpilvać prarech. Mała taho: čaściakom apranaju pad frak šorty».
Mužčyna ŭ biełym chałacie z prabirkaj u ruce na tle chimičnaj łabaratoryi: «My praviali sacyjałahičnyja apytańnie 5 tysiač čałaviek i 5 tysiač šympanze va ŭsim śviecie, i nichto ź ich nie adroźniŭ dvuch asobnikaŭ z naboru «Adnołkavyja škarpetki»©. Nivodnaja žyvaja istota! 100-pracentny vynik. Heta fantastyka! Ja, jak sacyjołah i ŭładalnik dźviuch darosłych noh, raju vykarystoŭvać u jakaści škarpetak tolki nabor «Adnolkavyja škarpetki»©!
Hołas za kadram: «I heta jašče nie ŭsio! Akramia dvuch škarpetkavych asobnikaŭ na luby pamier i koler absalutna zadarma my vyšlem na Vaš adras hlancavanuju kardonku, jakuju pryjemna razryvać, kali Vam zachočacca ŭpieršyniu atrymać asałodu ad Vašaha nabora «Adnolkavyja škarpetki»©. Advarotny bok taje kardonki možna vykarystać taksama ŭ jakaści kardonki-dla-napisańnia-čaho-niebudź-na-joj. I heta jašče nie ŭsio: My dašlom Vam stopracentovuju kapronavuju nitku, jakaja złučaje dva škarpetkavyja asobniki razam….
…I navat heta jašče nia ŭsio! Kali Vam zachočacca čahości niaźviedanaha, Vy možacie absalutna lohka i chutka pamianiać škarpetki z nahi na nahu, bo našyja škarpetkavyja asobniki vyštukavanyja całkam uzajemazamianialnymi i daskanała prymajuć formu luboha stupaka, na jaki nasoŭvajucca».
Mužčyna ŭ havajskaj kašuli: «Zdurnieć možna!»
Spažyŭčycha: «Raniej moj muž z žacham čakaŭ kanca prańnia, kab znoŭ nie daličycca niekalkich svaich upadabanak. Ale ciapier, kali ja nabyła 50 vydatnych naboraŭ «Adnolkavyja škarpetki»©, muž bolš nie turbujecca: chaj sabie kolki źnikła ŭ čeravie mašyny -- usio adno majem jašče šmat absalutna adnolkavych asobnikaŭ. Ciapier nazirać za mašynnym prańniem zrabiłasia dla muža asałodaj: na 20-hodździe šlubu jon navat padaryŭ mnie starter».
Hołas za kadram: «Dasyłajcie na naš adras usiaho-tolki 50 u.a. i my adymčym vam na dom fantastyčny nabor «Adnolkavyja škarpetki»© +šmatmetavuju kardonku +100-pracentnuju kapronavuju nitku. I ŭ dadatak: absalutna darmavy katałoh našych tavaraŭ, siarod jakich:
Elektryčny čajnik, jaki PRACUJE
Nabor stałovaha posudu, jaki ČYSTY
i chit siezonu: aŭtamabil, jaki JOŚĆ (absalutna luboj marki!).
Pavał Kaściukievič
Hladzi jašče:
10 zapavietaŭ rekłamnika (pavodle Andreja Hniota).
