Ministr transpartu Litvy Maryus Skuodzis zajaviŭ, što sa śniežnia hetaha hoda Litva spynić tranzit biełaruskich kalijnych uhnajeńniaŭ. Premjer-ministr Biełarusi Raman Hałoŭčanka siońnia zajaviŭ, što da śniežnia znojduć alternatyŭnyja rašeńni hetaha pytańnia.
— Pa našych padlikach, kali Litva prymie takoje rašeńnie samastojna, to, viadoma, jana paniasie straty. Kala 100 miljonaŭ jeŭra vyručki ad pieravozki biełaruskich hruzaŭ, — zajaviŭ Raman Hałoŭčanka. — Ale tym nie mienš jość alternatyvy. My ciapier znachodzimsia ŭ kantakcie ź inšymi partniorami.
Ekanamist Jarasłaŭ Ramančuk nie padzialaje aptymizmu premjer-ministra i kaža, što za paŭhoda znajści alternatyŭnyja porty niemahčyma:
«Svabodnych mahutnaściaŭ u inšych partach niama. Hrošaj na pošuk novych maršrutaŭ niama i naŭrad ci buduć».
Heta, pa słovach Ramančuka, pryviadzie da taho, što «Biełaruśkalij» nie zmoža vykanać svaje abaviazki pa kantraktach.
«Ci zmohuć rasijanie i kitajcy arhanizavać niejki transpartny šlach dla kalijnych uhnajeńniaŭ z zachavańniem ich koštu? «Biełaruśkalij» peŭny čas dempinhavaŭ na rynku. Ciapier z ulikam dastatkovych transpartnych vydatkaŭ košt moža być vyšejšym, čym u kankurentaŭ. Pytańnie: chto tady budzie kuplać kalij? Heta moža być stratna dla «Biełaruśkalija». Abo pradpryjemstva vybje ŭ biudžecie radok dla kampiensacyi strataŭ. Ale tady jano budzie siadzieć na šyi ŭ padatkapłacielščykaŭ».
Čytajcie taksama: «Hrošaj dla padtrymki zarpłat biudžetnikam nie budzie». Jak spynieńnie tranzitu kaliju paŭpłyvaje na ekanomiku
