U pačatku žniŭnia Rada kiraŭnikoŭ Mižnarodnaha valutnaha fondu zaćvierdziła raźmierkavańnie 650 miljardaŭ dalaraŭ dla pieraadolvańnia post-kavidnaha kryzisu. Biełarusi pavinny pieraličyć 950 miljonaŭ dalaraŭ. Srodki ad MVF vydajucca nie čystymi hrašyma, a «čekami», jakija možna abmianiać na piać realnych valut: dalary, jeŭra, juani, funty i jeny.
Apazicyja sprabuje pierakanać MVF, što nielha vydzialać dapamohu, pakul va ŭładzie Łukašenka.
Apazicyja: hrošy mohuć vykarystać na represii
«Raźmierkavańnie nabudzie moc 23-ha žniŭnia, my nie pakidajem namahańniaŭ pieraškodzić atrymańniu hetaha «čeka», tym bolš, što ŭ śviecie jość precedenty, takija jak Vieniesueła i Mjanma, dzie ŭrady, jakija nie pryznanyja lehitymnymi, nie atrymlivali hrošy ad MVF», — adznačaŭ u kamientary «Našaj Nivie» Valeryj Kavaleŭski, pradstaŭnik ofisa Cichanoŭskaj pa mižnarodnych pytańniach, były funkcyjanier Suśvietnaha banka.
21 žniŭnia Śviatłana Cichanoŭskaja nakiravała listy kiraŭniku MVF i ministru finansaŭ ZŠA. Jana zaklikaje zabaranić dostup režymu da srodkaŭ, pakul u Biełarusi nie buduć praviedzienyja novyja vybary. U svaim zvarocie Cichanoŭskaja pierakonvaje, što hrošy mohuć vykarystać na represii suprać naroda.
«Tut vielmi važnaja pazicyja palitykaŭ tych krain, jakija aficyjna nie pryznali Łukašenku zakonna abranym prezidentam, pakolki jany zdolnyja farmavać mierkavańnie i danosić svaju pazicyju da ŭpaŭnavažanych pradstaŭnikoŭ svaich krain u MVF, kab tyja vykarystali svoj hołas dla łabiravańnia jakraz taki kontrzachadaŭ i niedapuščeńnia dla biełaruskaha ŭrada prava vykarystoŭvać raźmierkavanuju dla Biełarusi kvotu», — tłumačyŭ u intervju «Našaj Nivie» kiraŭnik Narodnaha antykryzisnaha ŭpraŭleńnia Pavieł Łatuška.
Jak ułada reahuje na zakliki zabłakavać dostup da srodkaŭ MVF?
U praŭładnych ŚMI ŭsio čaściej źjaŭlajucca prapanovy ŭvieści adkaznaść za zakliki da sankcyjaŭ.
«Pierakanany, parłamient pavinien na vosieńskaj siesii vyrašyć hetaje pytańnie, — zajaviŭ deputat Aleh Hajdukievič. — Sučasny śviet — heta hibrydnyja vojny. Adzin z elemientaŭ hibrydnaj vajny — heta sankcyi. U dačynieńni da našaj krainy jany ŭviedzienyja niezakonna, nasupierak lubym mižnarodnym normam».
Mižnarodnyja finansavyja instytuty admaŭlajucca ad supracoŭnictva ź Biełaruśsiu. Pryčyna — palityčny kryzis, jaki praciahvajecca paśla prezidenckich vybaraŭ — 2020. Na pačatak 2021 hoda ŭ aktyŭnaj pracy ŭ Biełarusi byli prajekty na 1 miljard dalaraŭ ad Suśvietnaha banka. Ciapier SB praciahvaje toje, što ŭžo było pačata, naprykład prajekty pa baraćbie z pandemijaj abo madernizacyi vyšejšaj adukacyi. «Novych prajektaŭ, jakija byli b pieradadzieny na zaćviardžeńnie Radzie dyrektaraŭ, niama», — adkazali ŭ banku na zapyt Deutsche Welle.
Jeŭrapiejski bank rekanstrukcyi i raźvićcia inviestavaŭ u Biełaruś kala 3 miljardaŭ jeŭra, u vyhladzie vyklučeńnia supracoŭničali ź dziaržpradpryjemstvami.
«My nie inviestavali ŭ novyja prajekty ŭ dziaržsiektary z pačatku 2020 hoda i nie płanujem rabić heta ŭ niedalokaj budučyni», — zajaviŭ pradstaŭnik JEBRR.
Prajekty z pryvatnym biznesam pakul praciahvajucca.
