Pra ŭciečku stała viadoma ŭ pačatku tydnia, kali na chakierskim forumie źjaviłasia abjava ab prodažy asabistych źviestak prykładna 100 miljonaŭ klijentaŭ kampanii T-Mobile.
Usiu bazu ŭzłomščyk acaniŭ u 6 bitkojnaŭ (kala 280 000 dalaraŭ ZŠA), zajaŭlajučy, što jana źmiaščaje ŭ tym liku IMSI, IMEI, numary telefonaŭ, imiony, PIN-kody biaśpieki. Taksama jość daty naradžeńnia prykładna 30 miljonaŭ čałaviek, a taksama ich numary pravoŭ kiroŭcy i numary sacyjalnaha strachavańnia.
Nieŭzabavie pradstaŭniki T-Mobile paćvierdzili, što ŭzłom sapraŭdy adbyŭsia. Jak zajavili ŭ kampanii, złamyśniki skrali zapisy, jakija naležać 48,6 miljona čałaviek, u tym liku ciapierašnich, byłych abo patencyjnych klijentaŭ T-Mobile.
«Važna adznačyć, što numary telefonaŭ, numary rachunkaŭ, PIN-kody, paroli abo finansavaja infarmacyja klijentaŭ i patencyjnych klijentaŭ nie byli skampramietavanyja ni ŭ adnym sa [skradzienych] fajłaŭ. Niekatoryja danyja klijentaŭ T-Mobile, jakija vykarystoŭvajuć sposaby apłaty pa fakcie, sapraŭdy ŭklučali imiony i proźviščy, daty naradžeńnia, numary sacyjalnaha strachavańnia i infarmacyju ab pravach kiroŭcy, paśviedčańniach asoby», — havorycca ŭ aficyjnaj zajavie.
Achviaram chakieraŭ prapanujuć 2 hady biaspłatnych pasłuh pa abaronie ad kradziažu asoby (z dapamohaj McAfee ID Theft Protection Service).
Jak paviedamiŭ Džeremi Kirk, redaktar Information Security Media Group, kampanii, jakaja śpiecyjalizujecca na kibierbiaśpiecy, chakier śćviardžaje, što znachodzicca ŭ Biełarusi. Ale inšaha paćviardžeńnia hetaj infarmacyi na hety momant niama.
