Siońnia na bajavoje dziažurstva zastupili rasijskija S-400 u Hrodnie i Su-30SM u Baranavičach. Tym samym, z ulikam słoŭ Łukašenki ab tym «što, «mahčyma», dla Biełarusi nabuduć S-400, cyrk z prystaŭkaj «vučebna-» staŭ vidavočnym.
Raniej možna było mierkavać, što centry buduć navučalnymi, a bajavy składnik budzie tolki jak rezierv (pa anałohii ź inšymi vajskovymi navučalnymi centrami, jakija ŭ vajenny čas pieraŭtvoracca ŭ bajavyja častki), ale siońnia stała kančatkova zrazumieła, što rasijskaja vajskovaja prysutnaść bajavych čaściej u Biełarusi finalizavałasia na dadzienym etapie.
Paciešna było čytać arhumient niekatorych vajskoŭcaŭ, što Rasija nie pastavić za 5 km ad miažy S-400 na bajavoje dziažurstva, maŭlaŭ, heta kompleks surjoznaha značeńnia, jaki apyniecca ŭ miežach dasiažnaści stvolnaj artyleryi praciŭnika.
Pa-pieršaje, raźmiaščeńnie S-400 — heta bolš nie vajenny, a palityčny krok na dadzienym etapie. Sutnaść jaho — pašyryć svaju prysutnaść u Biełarusi i stvaryć dadatkovy punkt praniknieńnia, na jakim možna dalej pašyracca. Pa-druhoje, S-400 — heta nie radyjołakacyjnaja stancyja «Baranavičy», pa vajnie jaho možna pieramiaścić u inšy rajon. Pa-treciaje, uraźlivy rajon tolki pry raptoŭnym napadzie na terytoryju, pry nastupalnaj apieracyi, dzie najbližejšyja srodki paražeńnia supiernika buduć źniščacca, u tym liku taktyčnym desantam i avijacyjaj pad prykryćciom hetaha kompleksu, jon užo nie taki ŭraźlivy.
Pa-raniejšamu niama infarmacyi ab statusie rasijskich vajskoŭcaŭ va VBC. Padparadkoŭvajucca jany, vidavočna, Rasii. Pakolki ich status nie vyznačany, to navat z pahadnieńnia ab adzinaj rehijanalnaj sistemie supraćpavietranaj abarony Rasijskaj Fiederacyi i Respubliki Biełaruś nie jasna, kamu jany buduć padparadkoŭvacca ŭ mirny čas u vypadku nieabchodnaści źniščeńnia abjekta.
Samaje cikavaje budzie, kali RF sabje samalot na terytoryi Polščy abo Litvy, farmalna zajaviŭšy ab pahrozie napadu, naprykład. Atrymajecca, Biełaruś dała terytoryju dla naniasieńnia rasijskaha ŭdaru pa terytoryi Polščy z usimi vynikajučymi.
Najaŭnaść rasijskich S-400 pablizu biełaruskaj miažy pašyraje pieralik mahčymych pravakacyj, u tym liku i ŭciahvańni Biełarusi ŭ rehijanalny kanflikt.
Pastanoŭka S-400 na bajavoje dziažurstva ŭ dzień adkryćcia aktyŭnaj fazy vučeńniaŭ «Zachad-2021» vielmi charakterna. Stvaryli lišni sposab napružyć susiedziaŭ. Choć ja raniej kazaŭ, što pakul eskałacyja nie ŭ intaresach Rasii praź pieradvybarčy pieryjad i miesiac-druhi jość čas adnosna spakojny. Tym nie mienš, ryzyka zastajecca. Źviazana jana moža być z padzieńniem rejtynhaŭ «Adzinaj Rasii», adnym z tvaraŭ jakoj prasoŭvajuć Šajhu. Dla ŭźniaćcia rejtynhu — niepasredna pierad vybarami abo paśla dla advodu ŭvahi ad padzieńnia rejtynhu — mohuć u čarhovy raz uźniacca zbrojaj, inšyja sposaby ŭ vyhladzie ŭźniaćcia piensij i t.p. užo vykarystoŭvali. Choć sam fakt pašyreńnia vajskovaj prysutnaści ŭ Biełarusi — užo plusik dla ŭładaŭ RF i «Adzinaj Rasii».
Najaŭnaść S-400 — heta i sposab dalejšaha pašyreńnia prysutnaści. Naprykład, možna, jak u vypadku z rasijskim vuzłom suviazi ŭ nas u Vilejcy, — uzmacnić kompleksami radyjoelektronnaj baraćby. Dalej dla zabieśpiačeńnia biaśpieki ad dyviersijnych hrup možna dasłać rotu achovy i hetak dalej. U kančatkovym vyniku, jak u vypadku z rasijskimi vajskovymi abjektami ŭ Kirhizii ŭ 2017 hodzie, mahčyma abjadnańnie dvuch rasijskich abjektaŭ u nas i hetych vučebna-bajavych centraŭ u adzinuju rasijskuju bazu.
Darečy, nikoli nie bačyŭ sensu ŭ adroźnivańni rasijskich vajskovych abjektaŭ i vajskovych baz — heta ŭsio farmalistyka dla pravavoj publicystyki, važnaja tolki sutnaść — znachodžańnie rasijskich vojskaŭ.
U toj ža čas hetyja centry mohuć być i zhornutyja ŭ chutkim časie, usio zaležyć ad handlu Łukašenki i Pucina.
