Za 2020 hod, jaki byŭ dla Biełarusi nie tolki pandemijnym, ale i pratesnym, dziarždoŭh krainy pavialičyŭsia na 29% u paraŭnańni z papiarednim hodam.
Asnoŭnuju dolu ŭ hrafiku pahašeńnia daŭhavych abaviazacielstvaŭ składajuć kredyty Rasii i Kitaja. To-bok novyja rasijskija kredyty buduć, chutčej za ŭsio, nakiravanyja na pahašeńnie staroha doŭhu pierad hetymi dźviuma krainami.
Biełaruś źjaŭlajecca dla Rasii najbujniejšym dziaržaŭnym daŭžnikom. Pavodle źviestak Suśvietnaha banka, zapazyčanaść Biełarusi pierad Rasijaj u kancy 2019 hoda składała 8,1 młrd dalaraŭ.
8 vieraśnia stała viadoma, što va ŭradzie Rasii abdumvajuć novyja varyjanty padtrymki Biełarusi.
Minfin Biełarusi taksama vypuskaje dziaržaŭnyja ablihacyi, jakija tarhujucca na roznych biržach, u tym liku i na jeŭrapiejskich.
Pry adsutnaści dostupu da zamiežnych rynkaŭ i sankcyj ES u dačynieńni da novych vypuskaŭ biełaruskich ablihacyj urad Biełarusi budzie i dalej spadziavacca na miždziaržaŭnyja kredyty i moža vykarystoŭvać dostup da rasijskaha rynku kapitału.
U mai stała viadoma, što dla refinansavańnia svajoj zamiežnaj zapazyčanaści ŭrad Biełarusi płanuje taksama pryciahnuć na Maskoŭskaj biržy 100 młrd rasijskich rubloŭ šlacham raźmiaščeńnia ablihacyj.
Biełaruś kuplaje ŭ Rasii haz pa lhotnych cenach, a naftu i naftapradukty z nulavymi pošlinami. Takija schavanyja subsidyi źjaŭlajucca najbolš istotnaj častkaj finansavaj padtrymki Biełarusi z boku Rasii.
Pry hetym apošnija hady, adznačajuć analityki ahienctva S&P, abjom enierhietyčnych subsidyj skaraciŭsia z-za padatkovaha manieŭru ŭ rasijskim naftavym siektary.
Pa danych analitykaŭ rasijskaha Instytuta enierhietyki i finansaŭ, u 2020 hodzie rasijskija enierhietyčnyja subsidyi ŭpali da minimalnych 0,9% VUP z-za skaračeńnia fizičnych abjomaŭ pastavak i padzieńnia suśvietnych cen na naftu i pryrodny haz. Ale ŭ 2021 hodzie pamier ekspartnych pošlin viarnuŭsia da 5,7% VUP — za košt pavieličeńnia roźnicy ŭ cenach na bolš tanny rasijski haz dla Biełarusi i cany na haz u Jeŭropie.
U vyniku abjom enierhietyčnych subsidyj dla Biełarusi ŭ 2021 hodzie składzie 3,5 młrd dalaraŭ, adznačaje namieśnik kiraŭnika ekanamičnaha departamienta Instytuta enierhietyki i finansaŭ Siarhiej Kandraćjeŭ. Usiaho z 2012 hoda enierhietyčnyja subsidyi dla Biełarusi pieravysili 50 młrd dalaraŭ.
Z maja hetaha hoda aceńvać abjom enierhietyčnych subsidyj, dadzienych Rasijaj, budzie składana, tamu što ŭrad Biełarusi pierastaŭ publikavać danyja pa imparcie i eksparcie nafty, naftapraduktaŭ i pryrodnaha hazu. Kandraćjeŭ miarkuje, što heta źviazana z uviedzienymi sankcyjami ZŠA suprać biełaruskaha enierhietyčnaha siektara.
Finansavaja padtrymka Rasii apošnija hady źnižajecca z-za pamianšeńnia abjomu enierhietyčnych subsidyj, adznačajuć analityki S&P.
Va ŭmovach sankcyj i zakrytych źniešnich rynkaŭ rasijskija kredyty zastajucca adnym ź niešmatlikich krynic źniešniaha finansavańnia Biełarusi.
Dla Rasii kredyt u 1,5 młrd dalaraŭ, jaki jana vydaje Biełarusi, heta niekrytyčnyja hrošy, miarkuje dyrektarka Biełaruskaha Centra ekanamičnych daśledavańniaŭ Kaciaryna Barnukova.
Z Barnukovaj zhodny rasijski ekanamist Jaŭhien Hontmachier. «Biełarusi hetyja 1,5 młrd dapamahajuć zakryć mnohija dzirki, jakija źjaŭlajucca ŭ Łukašenki. Dla Rasii heta nievialikija hrošy», — kaža Hontmachier.
Dla Rasii ŭdzieł u intehracyjnych prajektach ź Biełaruśsiu i ŭsia finansavaja padtrymka — heta čystaja palityka, zaŭvažaje ekanamist Jaŭhien Hontmachier, tamu što dla rasijskaj ekanomiki biełaruskaja nie maje značeńnia. Biełaruś nie vyrablaje ničoha takoha, čaho ŭ Rasii niama ci nielha bolš vyhadna kupić u inšych krainach, kaža Hontmachier.
Rasija ŭ asobie Pucina nie zacikaŭlenaja ŭ tym, kab Biełaruś addaliłasia ad Rasii, jak heta sprabujuć zrabić Ukraina, Małdova, Hruzija, tamu Rasija vymušanaja vieści pieramovy, miarkuje ekanamist.
