Jak tłumačać krynicy «Našaj Nivy», aproč Šaporava z pracy zvolnili jašče niekalki supracoŭnikaŭ, pieravažna — kryminalnaha vyšuku. Niekalki ź ich ciapier u SIZA. Sam ža načalnik RAUS, jak i načalnik kryminalnaha vyšuku, pakul na svabodzie.
Pa našaj infarmacyi, pryčyna zvalnieńnia kiraŭnikoŭ RAUS u tym, što apieratyŭniki kryminalnaha vyšuku nibyta falsifikavali spravy apieratyŭnaj raspracoŭki. Heta jany rabili dla taho, kab pravodzić «apieratyŭna-vyšukovyja» mierapryjemstvy pa tych asobach, jakich za hrošy «zamaŭlali» zacikaŭlenyja.
Pry hetym miechanika schiemy takaja, što ŭ praceduru aŭtamatyčna akazvajecca ŭciahnutym i načalstva.
Chto ž zvyčajna zamaŭlaje takija spravy?
«Na aby-kaho spravy zavodzić nie buduć. Jak praviła, heta pradstaŭniki biznesu, kankurenty jakich chočuć atrymać dostup da dakumientacyi ci adciahnuć ad realnaj raboty. Zadača «pasadzić» nieabaviazkovaja», — havorać našy krynicy.
Jak heta vyhladaje na praktycy? Našy surazmoŭcy kažuć, što siłaviki inicyirujuć apieratyŭnuju raspracoŭku «zamoŭlenaha» čałavieka. Dla hetaha jany pišuć rapart ab zaviadzieńni spravy. Na padstavie «infarmacyi, što pastupiła». Sapraŭdnaść hetaj infarmacyi jany nibyta źbirajucca pravieryć.
«Rapart ab zaviadzieńni spravy apieratyŭnaj raspracoŭki zaćviardžaje načalnik RAUS ci jaho namieśnik — načalnik kryminalnaj milicyi, — adznačajuć krynicy. — Dalej vynosiacca pastanaŭleńni na kantrol u sietkach elektrasuviazi.
Potym apieratyŭniki atrymlivajuć u prakurora sankcyi i zapaŭniajuć zadańnie na praviadzieńnie kantrolu. A zatym zadańnie zaćviardžajuć u načalnika RAUS ci «načkryma» (načalnika kryminalnaj milicyi — zaŭv. «NN»).
Paśla hetaha papiery pieradajucca śpiecyjalistam Departamienta zabieśpiačeńnia apieratyŭna-vyšukovaj dziejnaści».
Jak kažuć surazmoŭcy «NN», paśla atrymańnia nieabchodnaj infarmacyi spravy apieratyŭnaj raspracoŭki, jak praviła, zakryvajucca, vykanaŭcy atrymlivajuć hrošy, a zakazčyki — abiacanaje.
«U Rasii daŭno isnuje takaja praktyka — zavodzić spravy apieratyŭnaha ŭliku za hrošy. U Biełarusi heta tolki pačynajecca. Takija vypadki zdaralisia i raniej, u tym ža Homieli kaliści byŭ mieharaznos za źlivy rytualnym kantoram infarmacyi pra pamierłych — historyja skončyłasia masavymi vymovami i niekalkimi kryminalnymi spravami dla siłavikoŭ.
Treba razumieć, što ŭ kožnym viedamstvie jość karupcyja, u kožnym jość ludzi, jakija «kruciacca». Voś u milicyi jany «kruciacca» pieravažna tak. Prabivy, źlivy, lipavyja apieratyŭnyja spravy — heta nie navina», — dadaje naš surazmoŭca.
Nahadajem, adnoj z samych rezanansnych historyj prasłuchovak u Biełarusi zdaryłasia ŭ 2015 hodzie z palitykam Anatolem Labiedźkam. Jon znajšoŭ u restarannaj survetnicy žučka. Akazałasia, što stavili jaho nie biełaruskija śpiecsłužby — KDB vyjšaŭ na hrupu adstaŭnikoŭ, jakaja prasłuchoŭvała čynoŭnikaŭ, siłavikoŭ, žurnalistaŭ.
Maštaby prasłuchovak byli takimi, što hetuju dziejnaść źviazali ź intaresam adnoj z susiednich krain, jakaja źviazana ź Biełaruśsiu damovaj ab niepraviadzieńni vyviedvalnaj dziejnajści, i tamu dziejničała rukami byłych śpiecsłužbistaŭ, jakija atrymali adukacyju ŭ Rasii.
