«Dziakuj vialiki za vinšavańni z Dniom maci. U mianie niama zvyčki jaho śviatkavać. Hety dzień byŭ naznačany śviatam tolki ŭ 2006 hodzie. Tradycyjna pravasłaŭnyja adznačajuć [u hety dzień] Pakroŭ Śviatoj Baharodzicy. Hety dzień admietny dla mianie tym, što ŭ 2017 hodzie ja była ŭznaharodžana Ordenam maci.
Ja była aburanaja, što nie dazvolili ŭziać z saboj dziaciej, prasili dasłać fota vopratki, jakuju ja apranu, i tekst majoj pramovy dla ŭznaharodžańnia. Da hetych časoŭ škaduju, što nie adpraviła tekstu, bo słova mnie z-za hetaha nie dali. Zatoje ja ciapier dobra viedaju, jak rychtujucca ŭsie cyrymonii. Zatoje ja damahłasia, kab hučała biełaruskaja mova.
Ech! Da hetych časoŭ prykryja ŭspaminy. I biez ordena ja — ščaślivaja…»
…
«Tak dziŭna, što adbyvajecca stolki ŭsiaho tvorčaha, pazityŭnaha. Adnak u mianie ciapier taki nastroj, što stanoŭčyja, na pieršy pohlad, naviny mnoju ŭsprymajucca z sumam. Šmat hadoŭ u kastryčniku prachodziŭ Vosieński sałon, jaki arhanizoŭvaŭ Biełhazprambank. Voś i nabiehli dumki, jak było i jak stała.
Los «Našaj historyi» vyklikaje ślezy, asabliva, što adzin ź jaje redaktaraŭ — sapraŭdny śvietły, čuły, niejmavierna erudavany čałaviek znachodzicca tut.
Mnie škada kožnaha. Mnie balić serca za kožnaha. I heta nie fihura movy. Tabie, moža, padajecca, što ŭ mianie kiepski nastroj ci ja ŭpała ducham. Jakraz-taki naadvarot».
«Niahledziačy na ašałamlalnyja naviny, ja pierakonvajusia, što dla dasiahnieńnia žadanaj mety treba prykłaści namahańni, papracavać, być upartym i paśladoŭnym. I vielmi važna — vybar srodkaŭ! Ja pierakanana, što LUBOŬ pieramoža nianaviść i zło. Listy, jakija ja atrymlivaju, napoŭnieny ciapłom, zabotaj, nadziejaj na pieramohu DABRA. Nam usim treba prajści hety šlach. Jon ciažki, balučy, strašny. Adnak, jość i advarotny bok: my bolej nie asobnyja adzinki, a ŭzajemaźviazanyja, źjadnanyja adnoj maraj, uzrastaje ŭzajemapadtrymka i čułaść».
….
«Ja ciapier čytaju «Knihu radaści» Dałaj-łamy i Desmanda Tutu. Heta dyjałoh dałaj-łamy i arcybiskupa pra toje, jak dasiahnuć ščaścia. Čytaju z ałoŭkam. Idei knihi adpaviadajuć maim kaštoŭnaściam i pierakanańniam».
…
«Jura, jak buduć viadomy vyniki razhladu incydentu z Ryanair, napišy mnie, kali łaska. U nastupnym miesiacy budzie razhladacca i maja sprava. Maralna rychtujusia, što sud moža być zakryty. Užo ŭziała sabie za praviła nastrojvacca na horšyja varyjanty, spadziajučysia na lepšaje. Z Božaj dapamohaj usio budzie dobra».
***
Volhu Załatar zatrymali 18 sakavika. Jaje vystavili abvinačvańni pa art. 361-1 KK (Stvareńnie ekstremisckaha farmiravańnia), č. 1 i 2 art. 342 KK (Arhanizacyja i navučańnie dziejańniam, jakija hruba parušajuć hramadski paradak) i č. 6 art. 16 č. 1 art. 342 KK (Dapamahańnie ŭ arhanizacyi dziejańniaŭ, što hruba parušajuć hramadski paradak).
