Pra heta zajaviŭ žurnalistam u piatnicu ŭ Jerevanie premjer-ministr Biełarusi Raman Hałoŭčanka, padvodziačy vyniki praviedzienaha pasiadžeńnia Jeŭrazijskaha mižuradavaha savieta, piša TASS.
«Ź liku pačynajuć źbivacca ŭ hetych pakietach [sankcyj]. Kolki ich tam — piać, šeść ci siem. My na hetuju temu nie refleksujem. Nami pastajanna viadziecca praca pa pierabudovie pracy ekanomiki Biełarusi z ulikam tych ryzyk, jakija składajucca dla nas, i z ulikam tych nielehitymnych i niespraviadlivych abmiežavańniaŭ», — skazaŭ Hałoŭčanka.
Premjer zapeŭniŭ, što ŭrad robić «usio dla taho, kab ekanamičnyja ahienty ŭ krainie i nasielnictva nie adčuli hetaha, ich umovy žyćcia i funkcyjanavańnia nie pahoršylisia».
«Jakija mietady my vykarystoŭvajem i jakija instrumienty? Heta pavinna zastacca našym nou-chau», — skazaŭ Hałoŭčanka. Jon kanstatavaŭ, što ekanomika spraŭlajecca z uviedzienymi Zachadam abmiežavańniami. «Ekanamičnyja vyniki našaj pracy za dzieviać miesiacaŭ vyhladajuć dosyć pierakanaŭča, i heta samy lepšy adkaz», — skazaŭ premjer.
Inšaja sprava, pavodle jaho słoŭ, što «niemahčyma zrazumieć tych, chto zaklikaje da pastajannaha ŭzmacnieńnia žorstkaści sankcyj, heta nie paddajecca tłumačeńniu». «Darečy, maje kalehi, u pryvatnaści staršynia ŭrada Rasii, asobna spynilisia na tym, što miery, jakija prymianiajucca ŭ dačynieńni da našaj krainy, źjaŭlajucca absalutna nielehitymnymi i supiarečać mižnarodnamu pravu», — adznačyŭ premjer.
Pa jaho słovach, sankcyi pieratvarylisia «va ŭniviersalny srodak zapałochvańnia tych, chto nie zhodny z naviazanaj madellu pavodzin dla krainy, i heta novaja realnaść». «Ale JEAES — heta taja placoŭka, unutry jakoj dziejsnaść hetych instrumientaŭ cisku imkniecca da nula, heta adzin z hałoŭnych efiektaŭ našaha ŭdziełu ŭ JEAES», — adznačyŭ premjer-ministr.
