Čempijonskaja prapanova ŭsiaho adna. Inžynieru pa achovie pracy ŭ pinskim rajonnym ŽKH abiacajuć zarobak ad 417 rubloŭ i da 57 400! Praŭda, ŭ apisańni nie tłumačycca, jak možna zarabić 22,5 tysiačy diałaraŭ ŭ ekvivalencie na pracy ŭ adnoj ź viosak Pinskaha rajona. Pamyłka? Apiska? Tajamničy saŭhas-miljarder? Pakiniem heta na sumleńni słužby zaniataści i aŭtaraŭ vakansii.
Ale adznačym, što takich ekstremalnych viłak u prapanovach chapaje. Naprykład, kiroŭcu «Jandeks. Taksi» niejki pryvatnik abiacaje zarobak ad 1000 da 30 000 rubloŭ, aŭtaślesara šukajuć na pracu z zarpłataj 800-25 000 rubloŭ, a ŭ vakansii apieratara zapravačnych stancyj zarpłata, kali vieryć abjavie, moža składać ad 900 rubloŭ i až da 10 000.
Mieniedžar adździełu kłopatu na zarobak ad 16 da 31 tysiačy rubloŭ
Tamu razhledziem bolš adekvatnyja prapanovy. Niekatoryja vyhladajuć vielmi niečakana. Tak, u anłajn-škołu anhlijskaj movy patrebien «mieniedžar adździeła kłopatu» na zarobak ad 16 da 31 tysiačy rubloŭ.
«Zahružanaść 13 hadzin za dzień z ulikam pierapynku. Stabilny dachod u siarednim 33 000 rubloŭ, — abiacajuć u vakansii. — Asnoŭnaja zadača menedžara adździeła kłopatu ab klijentach — zabiaśpiečyć klijentu kamfortnyja i efiektyŭnyja ŭmovy navučańnia dla dasiahnieńnia jaho met u navučańni, daviedacca i zafiksavać čakańni ad navučańnia (padabrać abo źmianić dziejučy raskład zaniatkaŭ; vyrašać kropkavyja zapyty klijenta».
Kiraŭniku foreks-kampanii prapanoŭvajuć ad 12 da 24 tysiač rubloŭ
Tradycyjna davoli vialikaja kolkaść dobra apłačvajemych vakansij dla ajcišnikaŭ. Zarobki, u zaležnaści ad śpiecyjalnaści, prapanujucca ad 2 da 10 tysiač dalaraŭ. Najbujniejšyja prapanovy dla sieńjor-raspracoŭščykaŭ i inžynieraŭ apracoŭki danych. Ale tut, akramia stažu pracy, nieabchodnaja anhlijskaja i vialikim plusam budzie viedańnie niamieckaj.
Zarobak ad 1 da 10 tysiač dalaraŭ abiacajuć mieniedžeru pa lizinhu. Ale tut usio zaležyć ad jaho samoha — zarobak naŭprost zaležyć ad prodažaŭ.
Kiraŭniku «niadaŭna stvoranaj foreks-kampanii» prapanujuć zarpłatu ad 12 ta 24 tysiač biełaruskich rubloŭ. Ad pretendenta čakajuć vopyt pracy ad 5 hadoŭ, vyšejšuju jurydyčnuju abo ekanamičnuju adukacyju i «relevantny dośvied kiravańnia kampanijaj źviazanaj z «foreks-dziejnaściu».
Da 8 tysiač dalaraŭ abiacajuć mieniedžeru pa pryciahnieniu inviestaraŭ i i pijarščyku ŭ niejkim maładym startapie, źviazanym z błokčejnam i kryptavalutami. Ale tut abaviazkovaje patrabavańnie — viedańnie rynka kryptavalut.
Fasadčyka hatovyja ŭziać za 4600 jeŭra, ale ŭ Litvu
Niebłahija prapanovy dla dyrektaraŭ, ale tut patrebnyja niestandartnyja zamiežnyja movy. Kandydat ź viedańniem anhlijskaj i iŭryta, ź dziesiacihadovym stažam pracy ŭ mižnarodnaj kampanii i takim ža ŭ hulniavym biznesie moža raźličvać na 13 250 rubloŭ zarpłaty.
«Biełavija» šukaje kamandzira pavietranaha sudna. Latać pryjdziecca na Boinhu-737, abaviazkovaja anhlijskaja mova. Zarobak — 12 tysiač biełaruskich rubloŭ. Druhi piłot byŭ patrebien niekalki miesiacaŭ tamu. Jamu abiacali zarpłatu ad 9 tysiač rubloŭ.
Ad 3 200 da 4 600 jeŭra abiacajuć płacić fasadčyku. Ale praca ŭ Litvie. Pry hetym vakansija abiacaje žyllo, transpart da pracy i ruskamoŭnaha praraba. Važny niuans — apłata zdielnaja, zaležyć ad vykananaj pracy.
Ad 1 800 da 3 600 jeŭra moža zarabić i kiroŭca-mižnarodnik. Vachtavy mietad, pajezdki pa Jeŭropie, hatel za košt pracadaŭcy.
Načalnik adździeła hruzapieravozak u Turkish Airlines moža zarabić ad 8 800 da 10 00 rubloŭ za miesiac. Ale abaviazkovy staž i viedańnie tureckaj movy.
Kiraŭnik siamiejnym ofisam za 3 tysiačy dalaraŭ
«Viciebskžyłprajekt» šukaje kiraŭnika architekturna-budaŭničaha adździeła. Zarpłata — 10 tysiač rubloŭ.
Namieśnik dyrektara ŭ farmkampaniju taksama moža raźličvać na prystojny zarobak. Abiacajuć ad 9 tysiač rubloŭ. Patrabujecca farmaceŭtyčnaja adukacyja i vopyt u śfiery rekłamy.
A kiraŭniku pradstaŭnictva jeŭrapiejskaj kampanii, jakaja zajmajecca armaturaj dla vodazabieśpiačeńnia, abiacajuć ad 3 tysiač jeŭra zarpłaty.
«Zabiaśpiečanaja siamja, jakaja viadzie biznes u niekalkich jurysdykcyjach, šukaje kiraŭnika siamiejnym ofisam», — tak pačynajecca nastupnaja vakansija. Ad kandydata čakajuć «pabudovy rehularnych pracedur u siamiejnym ofisie, padrychtoŭki instrukcyj i ich vykanańnia pa nastupnych śfierach:
- upraŭleńnie hrašovymi srodkami i nieruchomaściu,
- uzajemadziejańnie ź inviestycyjnym biźniesam siamji,
- jurydyčnaje supravadžeńnie,
- padatki,
- zachoŭvańnie infarmacyi i biaśpiekadabračynnaść i fiłantropija».
I šmat čaho jašče. Pracoŭny dzień nie narmavany, zarobak — ad 3 tysiač dalaraŭ.
Ad 800 dalaraŭ i až da 4 tysiač abiacajuć «viadučamu pramych efiraŭ/videabłohieru/strymieru». Detali nie ŭdakładniajucca, nazva kampanii taksama. Ad pretendenta patrabujecca dobry internet, anhlijskaja mova i telefon z prystojnaj kamieraj. Na ŭsiaki vypadak nahadajem, što vebkam u Biełarusi padpadaje pad kryminalny artykuł ab vyrabie i raspaŭsiudzie porna.
