Fota: Flickr.
U aŭtorak Złučanyja Štaty zajavili, što hatovyja ŭvieści surovyja siektaralnyja sankcyi. Naprykład, zabaranić u Rasiju ekspart vysokatechnałahičnych tavaraŭ z amierykanskaj mikraelektronikaj i prahramnym zabieśpiačeńniem (padobnyja sankcyi ZŠA ŭvodzili raniej suprać Kitaja). Taksama siarod mahčymych mier — abmiežavańnie dla rasijskich bankaŭ na raźliki ŭ dalarach, sankcyi na ekspart rasijskich enierhanośbitaŭ.
Rasijskija čynoŭniki kažuć, što ŭsio pad kantrolem, i Rasija hatovaja.
Amierykanskaja presa pryznaje: Rasija i praŭda źmienšyła za apošnija hady svaju zaležnaść ad dalara i skaraciła svoj dziaržaŭny doŭh da 20% ad VUP (dla paraŭnańnia, u ZŠA — 133%). Rasija taksama nazapasiła kałasalnyja mižnarodnyja reziervy z zołata i zamiežnaj valuty. U śniežni jany dasiahnuli rekordnaha ŭzroŭniu — 630 miljardaŭ dalaraŭ.
Taksama Rasija dasiahnuła peŭnych pośpiechaŭ z praduktovym embarha — heta stymulavała ŭnutranuju vytvorčaść.
Dla dyviersifikacyi svajoj ekanomiki Rasija pačała raźvivać adnosiny z Kitajem. U 2019 hodzie rasijanie pabudavali tudy bujny hazapravod, a tavaraabarot miž krainami pieravysiŭ 100 miljardaŭ dalaraŭ štohod.
Ale jość adzin siektar rasijskaj ekanomiki, jaki tak i zastaŭsia vielmi ŭraźlivym dla sankcyj — technałohii. U suśvietnaj industryi mikraschiem u asnoŭnym daminujuć kampanii z ZŠA i ich sajuźnikaŭ: ES, Tajvania i Paŭdniovaj Karei. U Rasii ŭsiaho niekalki paŭpravadnikovych zavodaŭ, dy i tyja staryja i adstałyja. Kraina tatalna zaležyć ad kamplektujučych i patentaŭ zachodnich kampanij.
Kantrol za ekspartam mikraelektroniki, u vypadku ŭviadzieńnia sankcyj, abmiažuje mahčymaści Rasii kuplać stanki, smartfony i inšuju bytavuju elektroniku. Sankcyi naniasuć vialiki ŭron rasijskaj ekanomicy i zrobiać niemahčymaj jaje madernizacyju.
Chacia Rasija i navučyłasia žyć va ŭmovach sankcyj paśla 2014 hoda, amierykanskaje vydańnie adznačaje, što heta doraha kaštavała ekanomicy.
VUP Rasii z 2014 hoda ros pavolniej, čym u siarednim pa śviecie. Rasiejcy stali biadniejšymi, čym da anieksii Kryma. Realnyja dachody ŭpali na 9,3% u paraŭnańni z dakrymskimi časami.
Na dumku analitykaŭ, namahańniaŭ Rasii budzie niedastatkova, kab źmiakčyć udar ad novych sankcyj.
Chacia dola dalara ŭ eksparcie tavaraŭ i pasłuh źniziłasia z 80% da 56%, amierykanskaja valuta pa-raniejšamu daminuje na miascovym valutnym rynku.
Brajan O'Tuł, ekśpiert pa sankcyjach u analityčnym centry Atlantic Council, zajaviŭ, što novyja sankcyi pryviaduć da vielizarnych ekanamičnych nastupstvaŭ.
Novyja sankcyi jašče nie pačali dziejničać, a rasijskija fondavyja rynki i rasijski rubiel užo mocna prasieli. Ekanamičnyja prablemy mohuć jašče bolš źnizić rejtynh adabreńnia Pucina, jaki ŭpaŭ z 90% u 2015 hodzie da 65% u śniežni 2021 hoda.
Kali administracyja Bajdena pierakryje dostup rasijskim bankam da dalara, heta abarvie ekanamičnyja suviazi Rasii z astatnim śvietam i pryviadzie da rezkaha skaračeńnia VUP, kaža Janis Kluhie, ekśpiert pa Uschodniaj Jeŭropie Niamieckaha instytuta mižnarodnych adnosin i biaśpieki. Bolšaja častka źniešniaha handlu, uklučajučy prodaž nafty i hazu, ažyćciaŭlajecca ŭ dalarach. Adbudziecca adtok kapitału, abvalicca rubiel, pačniecca šalonaja inflacyja.
Na 9 z 12 finansavych ustanoŭ, pieraličanych u zakonaprajekcie ab novych sankcyjach, prypadaje bolš za 40% miascovaha mižbankaŭskaha rynku i da 80% karparatyŭnaha kredytavańnia i finansavańnia. Kali na hetyja banki buduć nakładzienyja sankcyi, heta budzie vielmi balučaja miera.
Abmiežavańni ŭ dačynieńni da rasiejskich enerhietyčnych kampanij udarać niepasredna pa ekanomicy krainy. U Rasii naftahazavy siektar składaje da adnoj piataj VUP. Hornazdabyŭnyja i mietałurhičnyja kampanii taksama mohuć sutyknucca z kałasalnymi prablemami.
