Płakat z vyjavaj Hanny Frank (habrejskaj dziaŭčynki, jakaja zahinuła ŭ Aśviencimie) u Breście kala placoŭki, dzie išło budaŭnictva. Fota: virtualbrest.ru
Try hady tamu ŭ centry Bresta pačali budaŭnictva elitnaha žyłoha kompleksa «Prybužski kvartał». Na terytoryi bolš za 0,8 ha źnieśli staryja budynki, vyjšli na budaŭničuju placoŭku i navat pačali prodaž žyllovych ablihacyj.
Ale ŭ lutym 2019 hoda na miescy rabot znajšli pareštki viaźniaŭ bresckaha hieta — usiaho kala 1200 čałaviek.
Sprava ŭ tym, što mienavita ŭ hetym rajonie ŭ hady vajny znachodzilisia tak zvanyja rasstrelnyja dvary, dzie ŭ 1942 hodzie masava zabivali bresckich habrejaŭ. Bolšaść ź ich vyvieźli ŭ Bronnuju haru pad Biarozaj, dzie rasstralali, ale šmat chto chavaŭsia ŭ horadzie. Tam ich šukali i zabivali.
Znojdzienyja pareštki pierapachavali na mohiłkach pry ŭdziele habrejskaj abščyny Bresta, budaŭnictva žylla spynili. Zabudoŭščyk to byŭ nie suprać praciahvać dalej, ale hramadski rezanans vymusiŭ ułady skasavać damovu.
Aktyvisty navat ładzili zbor podpisaŭ za toje, kab uvohule zabaranić tam uźviadzieńnie budynkaŭ i stvaryć miemaryjalny skvier u honar 30 000 bieraściejcaŭ habrejskaj nacyjanalnaści. Da Druhoj suśvietnaj vajny jany składali bolš za pałovu žycharoŭ horada.
Tym nie mienš, u vykankamie nie prysłuchalisia da mierkavańnia častki mieścičaŭ, i ŭčastak z katłavanam znoŭ vystavili na aŭkcyjon. Zhodna z umovami, pieramožca tarhoŭ pavinien dabudavać žyły kompleks — čatyrochpaviarchovy dom sa spadarožnaj infrastrukturaj. U śniežni 2021 hoda adbyłasia pieršaja sproba znajści inviestara, u studzieni 2022 hoda — druhaja, ale nichto pakul što nie zacikaviŭsia prapanovaj uładaŭ.
Mer Bresta Alaksandr Rahačuk kazaŭ, što sproby likvidavać doŭhabud u centry horada praz prodaž abjekta praciahnuć i nadalej. I voś 22 lutaha na placoŭcy «Bresckaha haradskoha centra pa kiravańni nieruchomaściu» adbudziecca novy aŭkcyjon z panižeńniem pačatkovaj cany na 50%. Ciapier jana składzie 1 miljon 381 tysiaču 171 rubiel. Novy ŭłaśnik pavinien budzie nie paźniej za paŭhoda paśla zaklučeńnia damovy pačać budaŭničyja raboty.
Vidać, kab paśpieć da kanca Hoda histaryčnaj pamiaci.
Čytajcie taksama:
Historyk Alaksandr Frydman: U Izraili zakon «Ab hienacydzie biełaruskaha naroda» vyklikaŭ abureńnie
Biełaruski historyk: «Zakon «Ab hienacydzie biełaruskaha naroda» — heta čysta represiŭny zakon»
U Hod histaryčnaj pamiaci hałoŭnymi buduć nie historyki, a prakurory
Łukašenka abviaściŭ 2022-hi Hodam histaryčnaj pamiaci. Za historykaŭ užo tryvožna
