«Ukraina nikoli z nami nie budzie vajavać: hetaja vajna praciahniecca maksimum try-čatyry dni. Tam nie budzie kamu suprać nas vajavać, — cytuje frahmienty intervju biełaruskaje dziaržaŭnaje ahienctva BiełTA.
— Tyja, kaho tam pakazvajuć z hetymi draŭlanymi aŭtamatami, jak jany trenirujucca… Dyk my zaraz vyjdziem z taboj u susiedniuju zału, zdymiem na mabilny telefon treniroŭku hetuju i pakažam, — skazaŭ Alaksandr Łukašenka. — I jak tolki ledź-ledź patychnuła, Vałodzia Zialenski adrazu truchnuŭ».
Alaksandr Łukašenka miarkuje, što na Zachadzie bajacca vajny ź siłami ADKB.
«U Jeŭropie budzie praściej. Jany što, hetaha nie bačać? Jany razumiejuć, što bieśpierśpiektyŭna z nami vajavać, pierš za ŭsio z Rasiejaj. My nie havorym ab jadziernaj ci niejkaj inšaj zbroi. Ale nas lepš nie čapać. Nas nie čapajcie», — zaścierahaŭ Łukašenka.
«Pakul jany tam razhornucca i pierašluć siudy niejkija vojski, my ŭžo budziem stajać kala Ła-Manša.
Jany heta viedajuć. U čym kaštoŭnaść ADKB: što my pakazali. Kolki siłaŭ u nas tam [u Kazachstanie] było — usiaho ničoha, ale my pakazali. A kali b treba — tam by pavialičylisia hetyja siły. My kala Ałmaty, a Pucin u Nursułtanie ŭziali aeraporty pad kantrol», — pachvaliŭsia Alaksandr Łukašenka.
Čytajcie taksama: ZŠA papiaredzili Biełaruś pra «rašučy i chutki adkaz», kali Ukrainu atakujuć z našaj terytoryi
Pra pahrozu novaha ŭvarvańnia Rasiei va Ukrainu zachodnija raźviedki zahavaryli ź listapada, paśla taho jak Maskva sabrała na miežach z Ukrainaj vialikija siły. Na siońnia jana praciahvaje pierakidać dadatkovyja čaści z Dalokaha Uschodu.
U pryvatnaści, rasijskija vajskoŭcy skancentravalisia i ŭzdoŭž biełaruska-ŭkrainskaj miažy. Aficyjnaj padstavaj nazyvajecca praviadzieńnie vučeńniaŭ «Sajuznaja rašučaść». Pavodle roznych acenak, u Biełaruś usiaho pierakinuć ad 9 tysiač (zajava biełaruskaha Minabarony) da 30 tysiač (acenka NATA) rasijskich vajskoŭcaŭ.
Minabarony Biełarusi nazvała metaj vučeńniaŭ acenku hatovaści sił Sajuznaj dziaržavy da abarony miežaŭ.
U pryvatnaści, u Biełarusi, siarod inšaha, razhornutyja rasiejskija źniščalniki Su-35, šturmaviki Su-25 i procirakietnyja sistemy S-400.
Zajaŭlena, što pieršaja častka vučeńniaŭ projdzie da 9 lutaha, druhaja — 10—20 lutaha.
Žychary Bresckaj i Homielskaj abłaściej Biełarusi paviedamlajuć ab prysutnaści rasijskich vajskoŭcaŭ i techniki kala roznych nasielenych punktaŭ. Dziasiatki fatahrafij i pastoŭ pra heta źjavilisia ŭ sacyjalnych sietkach i telehram-kanałach. Biełaruś taksama vyklikała na zbory šmatlikich reziervistaŭ.
Čytajcie taksama:
«Maleńkaja pieramožnaja vajna» z Ukrainaj: ci dapamahła b jana Łukašenku?
