Zatrymali abodvuch mužčyn jašče ŭvosień 2020 hoda. 22 kastryčnika pryjšli ź pieratrusam da Arcioma Parchamoviča, jaki pracavaŭ u «Biełtelekamie» śpiecyjalistam pa prodažach. 3 listapada 2020 hoda zatrymali Alaksieja Byčkoŭskaha — prosta na pracy.
Byčkoŭski i Parchamovič
«Muža źbili, kałacili da paŭśmierci pry zatrymańni, — raskazvaje «Našaj Nivie» Taćciana, žonka Alaksieja Byčkoŭskaha. — Bo ja havaryła z tymi, chto bačyŭ jaho paśla zatrymańnia, muž byŭ u žudasnym stanie, pa ich słovach.
Ja nie chaču navat havaryć, što ź im rabili — heta prosta pryniźliva dla jaho. Ale, mnie skazali, jaho bili elektrašokieram, jon hublaŭ prytomnaść…
Dzie jaho bili, ja nie viedaju. Ale ja havaryła z kalehami muža, jany raskazali, što siłaviki pasadzili jaho ŭ bus — i mašyna jašče davoli doŭha stajała prosta la budynka «Biełtelekama» na Matusieviča. Paśla tolki jaho dastavili ŭ Śledčy kamitet. A sam muž napisaŭ u adnym ź listoŭ pra darohu ŭ SK: «Ja dumaŭ, što prosta nie dajedu».
Nu i paśla ž było pakajalnaje videa, dzie bačna, jak jon vyhladaje.
A voś tak mužčyny vyhladali paśla zatrymańnia
Mnie pazvaniŭ advakat, kab ja pryniesła mužu rečy ŭ Śledčy kamitet. Ja pryjechała na mašynie ź dziećmi. Adzin ź siłavikoŭ sieŭ da mianie ŭ mašynu — i my pajechali ŭ našuju kvateru na pieratrus. Tam zabrali amal usiu techniku, techničnyja pryłady muža, naprykład, prybory z pracy, fłeški.
Paśla zatrymańnia Alaksieja źmiaścili na Akreścina, zatym — Vaładarka. Na Vaładarcy było bolš-mienš narmalna, ale ŭsio ž inšaje staŭleńnie da palityčnych. Byłyja sukamierniki muža raskazvali, što ŭ duš ci na dopyty «zvyčajnych» źniavolenych vodziać biez kajdankoŭ, a «palityčnych» abaviazkova ŭ kajdankach, a pieršy čas jašče i z sabakam».
Žonka Byčkoŭskaha kaža, što pra niejkuju pieradaču infarmacyi ŭ telehram-kanały jaje mužam jana nie viedała.
«Spačatku ja navat nie mieła nijakaj infarmacyi, za što muža zatrymali. I kali ŭžo daviedałasia — nie vieryła, nie razumieła, jak heta mahło być, — raskazvaje jana. — Nakolki ja viedaju ciapier, sam fakt usio ž byŭ. Ale i na Alaksieja, i na Arcioma paviesili prykładna pa 100 čałaviek, nibyta kožny źliŭ ich dadzienyja.
Ale, pa majoj infarmacyi, kolkaść na samaj spravie ŭ razy mienšaja. Muž i Arciom Parchamovič choć i pracavali ŭ adnym budynku, ale ŭ roznych padraździaleńniach, navat nie byli znajomyja.
A prachodziać pa adnoj spravie tolki tamu, što skidvali infarmacyju ŭ adzin telehram-kanał. Tam ža ŭ hetaj spravie fihuruje Safija Sapieha, praŭda, nie viedaju, u jakim statusie.
Toje, što ŭ spravie zhadvajecca pra niejkuju apłatu ŭ kryptavalucie — heta pra Parchamoviča, nie pra majho muža».
Byčkoŭski i Parchamovič hod praviali ŭ SIZA. Pravaabaroncy pryznali ich palitviaźniami. Spatkańniaŭ z rodnymi im nie davali.
Sud pa spravie pačaŭsia 25 listapada 2021 hoda. Abodvuch vinavacili pa vaśmi artykułach KK:
- art. 364 — «Hvałt albo pahroza ŭžyvańnia hvałtu ŭ dačynieńni da supracoŭnika orhanaŭ unutranych spraŭ»;
- č. 1 art. 366 — «Hvałt albo pahroza ŭ dačynieńni da słužbovaj asoby, jakaja vykonvaje słužbovyja abaviazki, ci inšaj asoby, jakaja vykonvaje hramadski abaviazak»;
- art. 365 — «Umiašańnie ŭ dziejnaść supracoŭnika orhanaŭ unutranych spraŭ»;
- art. 198 — «Pieraškoda zakonnaj prafiesijnaj dziejnaści žurnalista»;
- art. 352 — «Niepravamiernaje zavałodańnie kampjutarnaj infarmacyjaj»(redakcyja straciła siłu 26.05.2021);
- art. 389 — «Pahroza ŭ dačynieńni da sudździ abo narodnaha zasiadaciela»;
- č. 2 art. 203-1 — «Niezakonnyja dziejańni ŭ dačynieńni da infarmacyi ab pryvatnym žyćci i piersanalnych dadzienych»;
- č. 3 art. 130 — «Raspalvańnie rasavaj, nacyjanalnaj, relihijnaj albo inšaj sacyjalnaj varožaści abo varožaści».
«Zhodna viersii abvinavačvańnia, byłyja supracoŭnki «Biełtelekama» ŭ 2020 hodzie pieradali administrataram ekstremisckich telehram-kanałaŭ piersanalnyja i inšyja asabistyja dadzienyja bolš čym 150 asob ź liku kiraŭnikoŭ i supracoŭnikaŭ roznych pravaachoŭnych orhanaŭ, sudździaŭ, žurnalistaŭ, rabotnikaŭ śfiery adukacyi i miedycyny, hramadskich dziejačaŭ, — pisała «Viasna» pra pačatak suda. — Śledstvam ustanoŭlena, što «Arciom Parchamovič i Alaksiej Byčkoŭski natchnilisia zaklikami destruktyŭnych telehram-kanałaŭ i, pavieryŭšy ŭ svaju biespakaranaść i ananimnaść, pieradavali dla vykarystańnia ŭ destruktyŭnych telehram-kanałach piersanalnyja i inšyja asabistyja dadzienyja klijentaŭ, da jakich mieli dostup.
Varta adznačyć, što rabotniki arhanizacyi nieadnarazova vykazvali svajo žadańnie akazać sadziejničańnie ŭ złačynnaj dziejnaści i inicyjatyŭna vychodzili na kantakt z administratarami kanałaŭ. U niekatorych vypadkach jany atrymlivali śpis, u jakim mahło znachodzicca 15-20 čałaviek, paśla čaho apracoŭvali dadzienyja i adpraŭlali administrataram vynikovy varyjant z kanfidencyjnaj infarmacyjaj na kožnaha čałavieka sa śpisu».
Byčkoŭskaha i Parchamoviča vinavacili, što jany pieradali piersanalnyja źviestki pra 200 i bolš supracoŭnikaŭ orhanaŭ unutranych spraŭ i inšych dziaržaŭnych słužačych administrataram ekstremisckich telehram-kanałaŭ:
«Pieradadzienyja źviestki byli raźmieščanyja ŭ publičnym dostupie, a supracoŭniki i ich siemji byli padvierhnutyja bulinhu, u kahości paciarpieła majomaść».
Praces zakryli pa chadajnictvu prakurorki Natalli Sakałovaj «u metach biaśpieki siamji paciarpiełaha i jaho asabistych dadzienych, a taksama ŭ metach nieraspaŭsiudu ekstremisckich materyjałaŭ». Palitviaźni vystupali suprać, ale sudździa zrabiła pasiadžeńnie zakrytym. U adkaz na hetaje rašeńnie Parchamovič zaapładziravaŭ, za što atrymaŭ papiaredžańnie ad sudździ.
«Na sudzie Alaksiej pryznaŭ vinu častkova: što vykarystaŭ infarmacyju. Ale pra pahrozy siłavikam, ekstremizm jon ničoha nie pryznavaŭ, — kaža žonka Byčkoŭskaha. — Arciom vinu nie pryznavaŭ.
Ale dali im absalutna adnolkava, pa 11 hadoŭ kałonii, plus jany musiać spłacić vialikija kampiensacyi paciarpiełym — tym, čyje dadzienyja jany pieradavali.
Sudździa začytvała: kamu 500 rubloŭ, kamu 1000, kamu 2 tysiačy. Tyja, u kaho pasada panižej prasili mienšyja sumy, tyja, u kaho pasada vyšej — bolš. Miarkujučy pa pošlinie, ciapier moj muž musić spłacić kala 30 tysiač dalaraŭ. Arciom Parchamovič — trochi mienš.
Muž zakryty čałaviek, pa im nie budzie bačna, što jamu kiepska, tamu jon nie vykazaŭ emocyj padčas ahučvańnia prysudu. Arciom Parchamovič taksama trymaŭsia narmalna.
Ale da mianie prychodzili listy, u jakich muž pisaŭ, što ŭ šoku, bo prakuror prosić 12 hadoŭ. I heta pry tym, što toje pieršaja sudzimaść, častkovaje pryznańnie viny…
Kali sudździa skazała: «11 hadoŭ» u muža śloz nie było, ale było bačna, što jamu niaprosta. U abvinavačańni było 8 artykułaŭ, ale padčas vyraku sudździa ahučyła tolki try ci čatyry, pa jakich skazała, što muž vinavaty. Siarod ich dakładna byŭ artykuł 130 KK (raspalvańnie varožaści)».
Ciapier Taćciana, žonka Alaksieja Byčkoŭskaha, zastałasia adna z dvuma małymi dziećmi: 5 i 2 hadoŭ.
«Heta muž moj, kudy mnie padziecca, budu čakać. Jon ža zrabiŭ toje, što zrabiŭ, nie z metaj fizičnaj raspravy, a z metaj hramadskaha asudžeńnia — kab praz heta spyniŭsia hvałt nad ludźmi», — kaža žančyna.
Čytajcie jašče:
«Patuzaŭsia z padnačalenym». Za što buduć sudzić padpałkoŭnika ź Iŭja, jaki vystupiŭ suprać hvałtu
