Dzianis Jakubovič čytaje papieru, atrymanuju ŭ adkaz na jahonuju skarhu. Skryn ź videa.
Raniej u MUS paviedamili, što za napad na supracoŭnikaŭ milicyi byli zatrymanyja baćka i syn: mužčyna ŭčyniŭ stralaninu, kali milicyjanty pryjechali zatrymlivać jaho syna, jaki nibyta znachodzicca ŭ vyšuku. Svajaki zatrymanych raskazali pra siamju Jakubovičaŭ i pra toje, što zdaryłasia ŭ dvary doma ŭ Čyrvonaj Słabadzie 3 lutaha.
Pavodle infarmacyi blizkich svajakoŭ siamji, Dzianisa raniej zatrymlivali, potym jon lažaŭ u RNPC psichičnaha zdaroŭja ŭ Minsku, paźniej jaho i zusim adpuścili. Ale sprava nie źviazana ź jaho firmaj i pradprymalnickaj dziejnaściu.
«Nakolki nam viadoma, raniej pravodziłasia pravierka pa artykule 317 KK Biełarusi — nibyta, Dzianis jeździŭ biez pravoŭ i jaho niekalki razoŭ na praciahu hoda spyniali. Ale dakładna skazać, što tam było, my nie možam. Pobač nie znachodzilisia. Ale viedajem, što nie było składziena nivodnaha pratakoła.
Miesiacy z dva tamu jaho zatrymali na 72 hadziny — z 10 pa 13 śniežnia, jon znachodziŭsia ŭ IČU. Potym 15 dzion - u «Navinkach». Dzianisa ŭ vyniku adpuścili. Nijakich papier jamu nie było dadziena z nahody jaho zatrymańnia. Jon pisaŭ zvaroty z patrabavańniem, kab jamu vydali dakumienty, jakija buduć aformlenyja naležnym čynam ab tym, što pravodziłasia sudova-psichijatryčnaja ekśpiertyza ŭ dačynieńni da jaho, a taksama ŭ milicyju, kab tam taksama vydali dakumient ab tym, što jon znachodziŭsia ci nie znachodziŭsia troje sutak u IČU.
Paśla taho, jak jaho adpuścili, Dzianisu skazali pryjści ŭ milicyju. Jon byŭ zhodny, ale tolki paśla taho, kali pryjdzie pozva. Taksama jon pisaŭ listy ŭ roznyja instancyi: u MUS, Hienieralnuju prakuraturu i ŭ Administracyju prezidenta sa skarhami na dziejańni supracoŭnika Minskaha RASK.
Dzianis vielmi ŭparty i chacieŭ spraviadlivaści. Na videa jon čytaje adzin z adkazaŭ, što jahonuju zajavu razhledziać», — kažuć svajaki.
Jany adznačajuć: da 3 lutaha siamja ni ad kaho nie chavałasia, «viała zusim adkryty ład žyćcia».
«Jany spakojna žyli, jeździli na mašynie pa centralnych darohach, pakidali jaje na stajankach i parkoŭkach. A pra toje, što Dzianis znachodzicca ŭ vyšuku, nichto nie viedaŭ. Tak, u vyšuk jaho padali, kali jon paśla incydentu ŭ dvary źjechaŭ adtul. Zatrymali jaho na nastupny dzień», — kažuć svajaki.
Pa ich słovach, usio adbyłosia ŭviečary 3 lutaha. Dzianis, jahony baćka, a taksama inšyja členy siamji znachodzilisia na kuchni, kali pačuli niejkija huki z boku ŭvachodu.
«Dźviery byli začynienyja. Pieršaj dziŭnyja huki pačuła 9-hadovaja dačka, jana pajšła pahladzieć, što adbyvajecca, a ŭ hety momant u dom uvarvalisia ludzi. Jana prybiehła nazad, mocna kryčała. Nichto nijakich dakumientaŭ im nie pakazvaŭ. Unutry pačałasia bojka, potym usie vybiehli na dvor. Na videa vidać, što i Dzianis, i Uładzimir znachodziacca ŭ šokavym stanie. Jany prosiać pakazać dakumienty i spačatku nie razumiejuć, što adbyvajecca. Usie, viadoma, mocna spałochalisia. Dzianisa jašče doma, jak nam viadoma, ludzi, jakija pryjechali, pačali źbivać», — raspaviadajuć blizkija siamji.
U milicyi zajavili, što mužčynu, heta značyć baćku Dzianisa, razzbroili, ale va Uładzimira, i heta taksama vidać na kadrach videa, strelbu nichto nie zabiraŭ. Ciapier i baćka, i syn, znachodziacca ŭ SIZA. Raspačataja kryminalnaja sprava pa artykule 364 KK Biełarusi «Hvałt albo pahroza prymianieńnia hvałtu ŭ dačynieńni da supracoŭnika orhanaŭ unutranych spraŭ».
Raniej u MUS paviedamlali, što 38-hadovy mužčyna, jaki znachodzicca ŭ respublikanskim vyšuku jak abvinavačany pa kryminalnaj spravie, pryjechaŭ u Čyrvonuju Słabadu naviedać baćku. Apieratyŭniki daviedalisia pra heta i vyrašyli jaho zatrymać. Kali milicyjanty pryjechali, 65-hadovy baćka mužčyny vyjšaŭ na ich z karabinam «Sajha», udaryŭ adnaho prykładam i try razy streliŭ. Milicyjanty jaho abiazzbroili.
Čytajcie taksama:
«Vyskačyŭ baćka, zrabiŭ try streły». Milicyjanier z rezanasnaha videa ŭ Čyrvonaj Słabadzie raskazaŭ «Našaj Nivie» svaju viersiju padziej
«Ja ciabie hrochnu, nie vieryš?» Źjaviłasia VIDEA kanfliktu ź siłavikami na Salihorščynie, dzie baćka sa strelbaj abaraniaŭ syna
Pad Salihorskam dvoje mužčyn akazali ŭzbrojeny supraciŭ milicyjantam
