Fota: pustosh / depositphotos.com
Deputat Viarchoŭnaj Rady Alaksiej Hančarenka napisaŭ u Tvitary:
«Chutčej za ŭsie, z 14.02 z 16:00 pa Kijevu pavietrany ruch u Ukrainie budzie prypynieny.
U Brytanii najbujniejšaja strachavaja ŭžo razasłała paviedamleńni, što z 14.02 z 14:00 pa Łondanu spyniajecca strachoŭka hramadzianskich samalotaŭ, jakija znachodziacca z pavietranaj prastory Ukrainy».
Uładalnikam samalotaŭ, jakija zdajucca ŭ lizinh, užo nibyta zabaroniena lotać u pavietranaj prastory Ukrainy.
Učora skasavała svaje rejsy ŭ Ukrainu niderłandskaja kampanija KLM, ukrainskaja kampanija Sky Up siońnia była vymušanaja pasadzić svoj lizinhavy samalot z Funšała na partuhalskaj Madejry ŭ Kišyniovie, prahnazujecca taksama admova ad rejsaŭ z boku kampanii Air France.
Hiermanskaja avijakampanija Lufthansa taksama abmiarkoŭvaje mahčymaść spynieńnia avijaznosin z Ukrainaj. Pra heta paviedamiŭ pradstaŭnik avijapieravozčyka, piša RIA «Novosti».
«Lufthansa vielmi ŭvažliva sočyć za situacyjaj va Ukrainie. Prypynieńnie avijaznosin razhladajecca, ale na ciapierašni momant pa hetaj spravie nie pryniata jakich-niebudź rašeńniaŭ», — skazaŭ jon.
Sama Ukraina ŭ zakryćci pavietranaj prastory nad svajoj terytoryjaj sensu nie bačyć. Daradca ofisa Uładzimira Zialenskaha Michaił Padalak prakamientavaŭ heta tak:
«Samy važny momant zaklučajecca ŭ tym, što sama Ukraina nie bačyć sensu ŭ zakryćci nieba. Heta nonsens. I, na moj pohlad, heta nahadvaje niejkuju častkovuju błakadu».
Pavodle jaho słoŭ, kali kankretnyja avijapieravozčyki vyrašyli źmianić raskład palotaŭ, to heta nie maje nijakaha dačynieńnia da rašeńniaŭ abo palityki Ukrainy.
Ministerstva infrastruktury Ukrainy taksama aficyjna zajaviła:
«Infarmacyja ab zakryćci pavietranaj prastory Ukrainy nie adpaviadaje rečaisnaści. Zakryćcio pavietranaj prastory źjaŭlajecca suvierennym pravam Ukrainy, rašeńnie nie prymałasia».
Pa ich dadzienych, bolšaść avijakampanij praciahvajuć pracavać. Ale ŭkrainskija ŭłady pryznali prablemu niekatorych pieravozčykaŭ «z vahańniami na strachavych rynkach».
Dziaržava «hatovaja padtrymlivać avijakampanii i płanuje dać dadatkovyja finansavyja harantyi dla padtrymki avijarynku». Ułady Ukrainy raźličvajuć na chutkuju stabilizacyju situacyi i hatovyja ŭ vypadku patreby pryvieźci hramadzianaŭ dadomu.
Čytajcie taksama:
Niderłandskaja avijakampanija KLM prypyniła paloty ŭ Kijeŭ
Samalot ukrainskaj avijakampanii musiŭ pryziamlicca zamiest Kijeva ŭ Kišyniovie
