«24 lutaha 2022 hoda nas usich znoŭ — jaki raz paśla lutaha 2020 hoda (pačatku pandemii) — «pierajechaŭ buldozier». I, zdajecca, turystyčny rynak užo nabyŭ peŭny «imunitet». Taksama źjaviłasia adčuvańnie, što «buldozier», mahčyma, budzie praciahvać rabić svaju čornuju spravu, a trymacca treba. Jak havorycca — u čakańni lepšych časoŭ.
Takim čynam, što adbyvajecca ŭ hetyja hadziny ź biełaruskimi turystami i turystyčnymi prahramami?
Ciapier hrupy našych turystaŭ, jakija znachodziacca ŭ Bukavieli, Truskaŭcy, Lvovie, Kijevie, sprabujuć viarnucca z Ukrainy na radzimu. Pakolki ŭsie biełaruska-ŭkrainskija pierachody začynienyja, biełarusy buduć pierachodzić ukraina-polskuju miažu (palaki paabiacali dać prachod biez šenhien-viz) i zatym viartacca ŭ Biełaruś praz polska-biełaruskuju miažu.
Rehularnyja rejsy ź Biełarusi ŭ Jehipiet vylatajuć praktyčna pa raskładzie, samalot «Biełavija» robić vialiki kruk, ablatajučy Ukrainu (praz Aktaŭ), i dastaŭlaje turystaŭ na adpačynak.
Rejsy ŭ Hruziju ździajśniajucca pa raskładzie — na Flightradar taksama bačna, što trajektoryja rejsaŭ u Tbilisi prachodzić praz terytoryju Kazachstana — ź vialikim ablotam Ukrainy.
Rehularnyja rejsy «Biełavija» ŭ Dubaj iduć pa raskładzie.
Adno z samych haračych pytańniaŭ — admienienyja rejsy arabskaha łoŭkostera Flydubai ŭ Dubaj i Turkish Airlines — u Stambuł.
Flydubai na hety momant dasłaŭ turapierataram admieny rejsaŭ da 8 sakavika, ale ŭsio moža źmianicca, mahčyma, źjaviacca dadatkovyja rejsy, prahrama moža viarnucca, albo admiena jaje budzie praciahnutaja na jašče bolšy termin (u takich abstavinach pieramieny adbyvajucca štohadzinu). Jak viadoma, rejsy Flydubai zabiaśpiečvajuć paloty biełarusaŭ nie tolki niepasredna ŭ AAE, ale i sa stykoŭkami — na Maldyvy, Šry-Łanku, Zanzibar. U isnujučych umovach pieravozčyk prapanavaŭ varyjant dastaŭki i adpraŭki biełaruskich turystaŭ praz Maskvu.
Taksama admieny rejsaŭ zrabiŭ turecki nacyjanalny pieravozčyk, jaki ździajśniaje paloty pamiž Minskam i Stambułam, — Turkish Airlines. Pavodle infarmacyi na hety momant, admienienyja rejsy na dva dni — 24 i 25 lutaha. Avijakampanija ŭ hetyja hadziny vyrašaje pytańni ź pieranosami rejsaŭ. Turapieratary rajać turystam, jakija znachodziacca ŭ Stambule, źviartacca niepasredna ŭ avijakampaniju.
Respublikanski sajuz turystyčnych arhanizacyj jašče raz źviartajecca da turystyčnaha rynku, klijentaŭ i ahientaŭ — pa mahčymaści, zachoŭvać spakoj i nie paddavacca panicy.
Davajcie vyrašać prablemy pa miery ich pastupleńnia i kiravacca tolki aficyjnymi i pravieranymi danymi.
Situacyja mianiajecca kožnuju hadzinu. Tamu paśla atrymańnia pravieranych danych ad avijakampanij turapieratary buduć pra ŭsio infarmavać rynak.
Ciapier anulacyja turaŭ rańniaha braniravańnia i prahram z vyletami 25.02.2022 i dalej mahčymaja tolki sa štrafnymi sankcyjami. Tamu turapieratary prosiać ahienctvy pastaracca pierakanać klijentaŭ nie prymać paśpiešnych rašeńniaŭ pa prahramach pačynajučy z sakavika i dalej — na leta».
