Praces pačniecca ŭ 14:30 u sudzie Zavodskaha rajona (Partyzanski pr-t, 75A). Vy možacie pryjści padtrymać našych kaleh, ale pry sabie treba mieć pašpart.
Našaniŭcaŭ buduć sudzić pa ekanamičnym artykule nibyta za apłatu kamunalnych pasłuh pa taryfach dla dla fizičnych, a nie jurydyčnych asob. Maksimalnaje pakarańnie — da piaci hadoŭ abmiežavańnia albo pazbaŭleńnia svabody.
U realnaści hetaja sprava palityčnaja — sprava suprać usioj «Našaj Nivy».
8 lipienia 2021 hoda da čatyroch supracoŭnikaŭ vydańnia, a taksama ŭ buchhałteryju «Našaj Nivy» pryjšli ź pieratrusami. U toj ža dzień byŭ zabłakavany naš sajt. Razam z hałoŭnym redaktaram Jahoram Marcinovičam i redaktaram, kiraŭnikom adździeła markietynhu Andrejem Skurko na Akreścina zabrali hałoŭnuju buchhałtarku Volhu Rakovič i hałoŭnaha redaktara «Našaj historyi» Andreja Dyńko. Volhu adpuścili praz vosiem sutak utrymlivańnia ŭ niečałaviečych umovach. Andreja — praz 13 sutak. Niezabyŭny dośvied jon apisaŭ u balučym ese «Z butelkaj pad hałavoj». Ale Jahor i Andrej Skurko na svabodu tak i nie vyjšli. Na 14-ja sutki ich pieraviali ŭ SIZA na Vaładarskaha, dzie jany i ŭtrymlivalisia da hetaha času, užo bolš za siem miesiacaŭ.
Jahor Marcinovič i Andrej Skurko pryznanyja palityčnymi źniavolenymi. Jany trapili pad katok represij, jaki prajšoŭsia ci nie pa ŭsich niezaležnych vydańniach Biełarusi.
Ale «Naša Niva» vystajała, i praciahvaje słužyć svaim čytačam i Biełarusi.
My dziakujem kožnamu, chto na praciahu hetych siami miesiacaŭ padtrymlivaŭ źniavolenych našaniŭcaŭ, chto pisaŭ listy, chto adpraŭlaŭ pasyłki, chto pieravodziŭ hrošy, chto kazaŭ słovy padtrymki ich siemjam. Heta vielmi važna i heta vielmi šmat. Dziakuj!
Svabodu našaniŭcam!
