Kanhres ZŠA stojačy vitaje prezidenta Zialenskaha. 16 sakavika. Fota: J. Scott Applewhite, AP
Ukraina i Rasija dasiahnuli istotnaha prahresu na pieramovach, piša infarmavanaje brytanskaje vydańnie sa spasyłkaj na try asoby, datyčnyja da pieramovaŭ.
Klučavoje ŭ im — što nie tolki budzie spynieny ahoń, ale rasijskija vojski buduć vyviedzienyja z Ukrainy. Umovy Maskvy: Kijeŭ pahodzicca zamacavać svoj niejtralny status i budzie vyznačany pamier Uzbrojenych sił Ukrainy.
Praryŭ u pieramovach adbyŭsia ŭ paniadziełak, paśla taho, jak stała jasna, što rasijskija vojski niasuć vialikija straty, a nastup zabuksavaŭ.
Uzamien za abiacańnie nie ŭstupać u NATA i nie raźmiaščać zamiežnyja vajennyja bazy na svajoj terytoryi Kijeŭ choča atrymać harantyi biaśpieki ad ZŠA, Brytanii i Turcyi, kažuć krynicy.
Sutnaść zachodnich harantyj i ich prymalnaść dla Maskvy jašče mohuć stać kamieniem spatykańnia, piša vydańnie. Inšy sprečny punkt — status ukrainskich terytoryj, zaniatych rasijskimi siłami ŭ 2014 hodzie, tak zvanych «DNR» i «ŁNR». Nahadajem, što Budapiešcki miemarandum 1994 hoda nie pieraškodziŭ Rasii adarvać častki Ukrainy ŭ 2014-m.
Michajła Padalak, daradca prezidenta Zialenskaha i ŭdzielnik pieramovaŭ, skazaŭ The Financial Times, što ŭmovaj luboha pahadnieńnia budzie «vyvad vojskaŭ Rasijskaj Fiederacyi z terytoryi Ukrainy, zachoplenaj paśla 24 lutaha» jak na ŭźbiarežžy Čornaha i Azoŭskaha moraŭ, tak i pad Kijevam.
Pres-sakratar Pucina Dźmitryj Piaskoŭ zajaviŭ u sieradu, 16 sakavika, što ŭ asnovie damoŭlenaści moža być datrymańnie Ukrainaj niejtralnaha statusu na ŭzor Aŭstryi ci Šviecyi.
U apošnija dni Rasija praciahvała avijaŭdary i abstreły ŭkrainskich haradoŭ, adnak ukrainskija vojski na asobnych kirunkach pierajšli ŭ kontrnastup.
Admova ad raźmiaščeńnia zamiežnych vajskovych baz nie budzie vialikaj sastupkaj z boku Ukrainy, bo ŭkrainskaje zakanadaŭstva i ciapier zabaraniaje najaŭnaść baz.
