Kryścijan Eryksen. Fota: commons.wikimedia.org
Historyja Eryksena — mahčyma, adna z samych jarkich na tym turniry. 12 červienia 2021 hoda, padčas hulni ź Finlandyjaj, na 43-j chvilinie futbalist upaŭ na hazon i straciŭ prytomnaść. Na praciahu 10 chvilin miedyki i partniory datčanina pa kamandzie sprabavali jaho reanimiravać, i tyja dramatyčnyja kadry ablacieli ŭvieś śviet.
Tolki paźniej, kali hety hulec «Intera» (na toj čas) apynuŭsia ŭ špitali, stała viadoma, što ž było pryčynaj takoha niezrazumiełaha stanu hałoŭnaj nadziei datčan. Akazałasia, prosta padčas hulni ŭ Eryksena spyniłasia serca.
Sapraŭdnym hierojem taho dnia staŭ kapitan dackaj zbornaj Siman Kjer. Toj nie razhubiŭsia i dapamoh Eryksenu pryniać naležnaje stanovišča cieła: pieraviarnuŭ tavaryša na bok, pravieryŭ, kab jazyk nie błakavaŭ dychalnyja šlachi.
Potym, kali na pole vybiehli miedyki, Kjer zahadaŭ inšym dackim hulcam stać vakoł Eryksena i prykryć jaho ad vačej fanataŭ i žurnalistaŭ. I ŭsie dziesiać chvilin, pakul daktary zmahalisia za žyćcio Kryścijana, futbalisty zbornaj stajali vakoł jaho žyvym ščytom. Paźniej, kali da pola prybiehła ŭ ślazach dziaŭčyna futbalista, Sabryna, Kjer i inšy datčanin — Kaśpier Šmiejchiel — supakojvali jaje.
Pryčyna taho, što adzin ź lepšych dackich hulcoŭ ledźvie nie pamior na poli, — mijakardyt (zapaleńnie sardečnaj myšcy). Čaściej za ŭsio sustrakajecca mijakardyt, jaki maje infiekcyjnuju pryrodu, — naprykład, jon moža raźvicca paśla pieraniesienaj bakteryjalnaj ci virusnaj infiekcyi, taho ž kavidu.
Adnaŭleńnie
Kali stała zrazumieła, što z Kryścijanam usio budzie ŭ paradku, pačali hutaryć pra toje, ci mahčymy dla jaho paśla takich padziej praciah karjery ŭ futbole. Hiendyrektar «Intera» Džuzepe Marota pisaŭ, što kłub z aptymizmam hladzić na budučyniu datčanina, ale byli i inšyja mierkavańni: maŭlaŭ, dobra ŭžo toje, što Eryksena viarnuli da žyćcia, tamu spadziavacca jašče i na praciah karjery jamu nie varta.
Prynamsi, pra heta kazaŭ kardyjołah Sandžaj Šarma, jaki niekali pracavaŭ z Eryksenam u «Totenchamie»: «Ci ryzyknuć daktary znoŭ dazvolić jamu vyjści na pole z ryzykaj pamierci? Adkaz — nie. Dobraja navina zaklučajecca ŭ tym, što jon budzie žyć, a drennaja — u tym, što jon, vierahodna, padychodzić da kanca svajoj karjery».
Eryksen paźniej raspaviadaŭ, što na šlachu ŭ špital sam dumaŭ, nibyta jaho karjery kaniec. Ale praź niekalki dzion usio źmianiłasia. Futbalist prachodziŭ praź miedycynskija daśledavańni i ŭsio bolš razumieŭ, što nie ŭsio tak adnaznačna.
Fota: benchwarmers.ie
Miedyki pryjšli da vysnovy, što Eryksenu treba impłantavać kardyjostymulatar. Datčanin na heta pahadziŭsia, chacia i razumieŭ, što paśla takoj apieracyi nie zdoleje viarnucca ŭ «Inter» — italjanskija zakony zabaraniajuć ludziam z kardyjostymulataram zajmacca kantaktnymi vidami sportu. Kali b daktary zrazumieli, jak vypravić stan zdaroŭja hulca, i dastali ź jaho cieła kardyjostymulatar, zabaronu možna było b źniać, ale ž hetaha nie adbyłosia.
Dalej datčanin pravioŭ niekalki miesiacaŭ biez futboła. I aktyŭna pačaŭ adnaŭlacca. Viadoma, naprykład, što jon treniravaŭsia z moładzievaj kamandaj hałandskaha kłuba «Ajaks», kab viarnucca ŭ formu.
U studzieni 2022 hoda, jašče nie majučy novaha kantrakta, Kryścijan upieršyniu pačaŭ publična kazać pra svajo viartańnie na pole: «Daktary skazali, što ŭsio ŭ paradku. Maja meta — syhrać na Čempijanacie śvietu 2022 hoda ŭ Katary. Ja zaŭsiody byŭ naceleny na heta. Mnie pa siłach viarnucca».
Trochi paźniej, u siaredzinie studzienia, źjavilisia čutki pra novy kłub Eryksena. Hučali teoryi, što jon apyniecca ŭ mienš statusnym čempijanacie, čym italjanski — naprykład, pačnie hulać za niejkuju dackuju ci niderłandskuju kamandu. Ale hulec padpisaŭ (chacia i paśla daskanałych miedyčnych daśledavańniaŭ) kantrakt z «Brentfardam» — kłubam Anhlijskaj premjer-lihi. I 26 lutaha vyjšaŭ u jaho formie na pole padčas aficyjnaj hulni z «Ńjukasłam», čym jašče raz prademanstravaŭ, da jakich pieramoh nad saboj moža pryvieści sapraŭdnaja vola da žyćcia.
Vychad Eryksana na pole ŭ składzie «Brentfarda»
Jak raskazvaŭ datčanin u pačatku hoda, jon atrymaŭ tysiačy listoŭ i kvietak ad fanataŭ u znak padtrymki. Jašče doŭha paśla «ŭvaskrašeńnia» Eryksenu pisali ludzi, i jon padziakavaŭ kožnamu, z kim paznajomiŭsia asabista.
Možna było b padumać, što padpisańnie Eryksena — prosta pryhožaja pijar-akcyja dla «Brentfarda», nie samaha paśpiachovaha i viadomaha z anhlijskich kłubaŭ. Ale ž datčanin, vidać, nie hatovy siadzieć na łavie zapasnych. Jon nabiraje formu i ŭžo zdoleŭ prademanstravać u adnym z matčaŭ rezultatyŭnaje dziejańnie — addaŭ halavy pas.
15 sakavika stała viadoma, što Eryksen narešcie viartajecca i ŭ nacyjanalnuju zbornuju — kamandu, padčas matča ŭ jakoj jon amal nie pamior. 26 sakavika datčanie adyhrajuć tavaryskuju hulniu ź Niderłandami na stadyjonie «Amsterdam-Arena», dzie Kryścijan pačynaŭ darosłuju karjeru. A 29 sakavika zbornuju čakaje matč ź Sierbijaj, taksama tavaryski, što projdzie na tym samym stadyjonie ŭ Kapienhahienie, dzie datčanina viartali z taho śvietu.
Danija rychtujecca da Čempijanata śvietu — 2022, i ciapier Eryksen jašče na krok nabliziŭsia da jaho. U siaredzinie lutaha jon raspavioŭ žurnalistam VVS pra svajo adnaŭleńnie. Datčanin kazaŭ, što vialikaj ryzyki dla jaho futboł zaraz nie niasie. «Ja ničoha nie bajusia», — z takim nastrojem spartoviec, za jakoha chvalavaŭsia ŭvieś śviet, viartajecca ŭ futboł.
Chto taki Kryścijan Eryksen, jaki straciŭ prytomnaść na Jeŭra?
«Jon izalavaŭ siabie sam užo daŭno». Čamu nie škada biełaruski sport, jakija trapiŭ pad sankcyi. Mierkavańnie
Bankructva kłubaŭ, ucioki hulcoŭ. Jak dehradavaŭ biełaruski futboł
