Anton, 24 hady, supracoŭnik biblijateki:
«Chvaluje asensavańnie, što ŭsio stračana. Dumka pra toje, što, imavierna, ci my ŭžo prahłynutyja ci nas prahłynuć u nastupnym. Ukrainskaja situacyja bje ŭ samaje serca. I kožny dzień pražyvajecca ź ciažkaściu ad navinaŭ adtul. I pry tym situacyja ŭ nas taksama nie źmianiłasia. Što ni dzień — zatrymańni, sutki, kryminalnyja spravy. Tema biaśpieki abvastryłasia, i baišsia hladzieć što zaŭhodna, bo nie viedaješ, ci nie pryznanaje jano ekstremisckim. Chvaluje rost cenaŭ. Razumieńnie, što sankcyi buduć iści i ŭ naš bok.
Budučynia nie pakrytaja tumanam, jana ŭ dymie. Mnie baluča ŭjavić i dumku pra stvareńnie siamji, bo bajusia jaje nie prakarmić, bojaź za dzicia, jakomu daviadziecca pryjści na śviet u taki čas.
Chvaluje dumka, što kali sistema vystaić, dziaciej buduć apracoŭvajuć, bo ciapier ideałohija i patryjatyzm stali častkaj Asnoŭnaha zakona».
Hanna, 42 hady, psichołah:
«Mianie chvaluje vajna, adsutnaść pačućcia biaśpieki, strach za siabie i dziaciej. Chvaluje vialikaja vierahodnaść ekanamičnaha defołtu, krach biznesu. Strach za budučyniu dziaciej. Razumieju, što bližejšym časam ni ŭ vučobie, ni ŭ realizacyi tut rabić niama čaho».
Paŭlina, 18 hadoŭ, studentka:
«Mianie chvaluje, što budzie z maimi blizkimi. Mnohija ź ich byli zatrymanyja, a takoje nie zabyvajecca. Heta navat nie chvalavańnie, a strach paŭtareńnia hetaha kašmaru. Jašče ja turbujusia pra toje, što ž budzie ŭ budučyni z ekanomikaj Biełarusi.
Ja dakładna viedaju, što nie chaču i nie budu źjazdžać z krainy. Iracyjanalnaje žadańnie, bo ja nie ŭjaŭlaju, jak tut zabiaśpiečyć siabie i svaich budučych dziaciej.
I ja nie mahu nie chvalavacca z-za vajny na terytoryi Ukrainy. Bahaćcie niedakładnaj infarmacyi ci vykručanych navyvarat faktaŭ tolki padlivajuć aleju ŭ ahoń».
Halina, 78 hadoŭ, piensijanierka:
«Mianie ciapier chvaluje tolki adno: jak chutka našy biełarusy raspluščać vočy i adkryjuć vušy, kab acanić rečaisnaść».
Andrej, 30 hadoŭ, kapirajtar:
«U pieršuju čarhu chvalujemsia praź situacyju va Ukrainie. Hetaja tema źjaŭlajecca asnoŭnaj u pryvatnych hutarkach. Kožny ranak pačynajecca z prahladu stužak navin u Telehramie i inšych krynicach. Biezumoŭna, pieršy šok užo minuŭ. Ale biez bolu hladzieć na sotni paviedamleńniaŭ pra hibiel ludziej niemahčyma. Psichałahična čytać zvodki vielmi ciažka. Niekatoryja ŭziali za praviła skrolić navinnyja stužki tolki raz na dzień, kab zastavacca u narmalnym psichałahičnym stanie.
Zrešty, šmat maich siabroŭ-pryjacielaŭ mužčynskaha połu dahetul apasajucca taho, što naša kraina moža być uciahnutaja ŭ vajnu. Chodziać čutki, što chłopcam prychodziać paviestki ŭ vajenkamat. Ale heta, na ščaście, zastajecca čutkami. Niekatoryja, u kaho była mahčymaść, na peŭny čas źjechali z krainy. Niekatoryja siadziać «na čamadanach» u čakańni horšaha. Adnak ciapier u hetym płanie stała bolš spakojna. Niekalki čałaviek navat viarnulisia z vymušanaj «paŭemihracyi».
Što tyčycca ekanamičnaha boku, to tut taksama pieršy šok užo za plačyma. Kurs valut trochi adkaciŭsia. Dalary ci jeŭra taksama možna nabyć, ale pryjdziecca abyści niekalki abmieńnikaŭ.
Vyklikajuć vialikuju turbotu ceny na spažyvieckija tavary. Naprykład, adnosna narmalnyja pamidory ŭ krupnych handlovych sietkach pradajucca za 10 — 12 rubloŭ, chacia jašče dva miesiacy tamu ich možna było nabyć za 6 — 8.
Papularnyja italjanskija makarony zusim niadaŭna kaštavali dva rubli, a ciapier užo piać. Pa adčuvańniach, rezka padraśli ceńniki na bytavuju chimiju. Ź inšaha boku, deficytu tavaraŭ, mahu kazać tolki za stalicu, nie nazirajecca.
Kali padsumavać, to nastroi ŭ ludziej nie paničnyja, ale dastatkova tryvožnyja.
Mnohija prosta nie razumieiuć, jak pastupić u hetaj situacyi, i puskajuć chod padziej na «samaciok» — nibyta ničoha drennaha nie adbyvajecca. Ludziej zrazumieć možna. Začynicca ŭnutry siabie — takaja asablivaja psichałahičnaja reakcyja. Chtości šukaje varyjanty pracaŭładkavańnia ci vučoby za miažoj, dzie bolš mahčymaściaŭ. Bolš za ŭsio pužaje nieviadomaść. Nichto nie viedaje, kali ŭsio skončycca i jak heta adhukniecca dla krainy ŭ cełym i kožnaha ŭ pryvatnaści».
Natalla, 57 hadoŭ, vykładčyca:
«Mianie, ščyra kažučy, chvaluje tolki vajna i ŭvohule ŭsio, što adbyvajecca ŭ nas, va Ukrainie i Rasii. Usio astatniaje adyšło na druhi płan. Jašče ahulnyja etyčnyja pytańni chvalujuć. Čałaviečnaść, staŭleńnie da žyvioł».
Alisa, 30 hadoŭ, mieniedžar:
«Biaśpieka ludziej va Ukrainie i ŭ Biełarusi. Chvaluje rost cen, skaračeńnie pracoŭnaha dnia. Blizkija ŭžo za svoj košt navat biaruć vychadnyja. U cełym chvaluje dalejšy ŭzrovień žyćcia».
Mikałaj, 71 hod, piensijanier:
«Najbolš chvaluje toje, što adbyvajecca va Ukrainie. Z adnaho boku, vielmi škada ludziej, jakija hinuć, z druhoha — zachapleńnie mužnaściu ŭkraincaŭ. Słava Ukrainie!
I škada, što ja asabista nie mahu dałučyć da bataljona Kastusia Kalinoŭskaha».
Stanisłaŭ, 21 hod, student:
«Časam, kaniečnie, uźnikajuć dumki pra rost cen, zarobki. Ale na pieršym płanie bolš hłybokija pytańni.
Źjazdžać ci zastavacca? Kali źjazdžać, to kudy, i jak realizavać siabie na novym miescy? Naš vielmi cichi pratest — heta zdrada i bajaźlivaść ci razumny kłopat pra ŭłasnuju biaśpieku? Chvaluje nianaviść u dačynieńni da zvyčajnych biełarusaŭ.
Z adnaho boku, ukraincy ciapier majuć prava złavacca i kryŭdzicca na nas, bo jany ŭ ekstremalnych umovach. Ale heta vielmi sproščanaja karcina. Častkova biełarusy taksama achviary vialikaj vajny. I majuć racyju tyja, chto pytaje: a jak biełarusaŭ u 2020 padtrymali? Akramia vykazvańnia zakłapočanaści, płakataŭ i kancertaŭ. Ale ciapier my nie majem prava kidać niejkija abvinavačvańni ŭkraincam.
Turbuje pastupovy praces straty suvierenitetu. Raniej vykaraniałasia biełaruščyna, ciapier rasijskaja armija vykarystoŭvaje našu ziamlu».
Piotr, 33 hady, ajcišnik:
«Kali karotka, to: jak vyžyć? Vialikaja biada z pracaj! Skazać, što zaciahnuli pajasy, to ničoha nie skazać. Chočacca bracca za aŭtamat ci źjaždžać z krainy».
Luboŭ, 36 hadoŭ, supracoŭnica banka:
«Vajna. Heta adzinaje, što ŭ majoj hałavie. Ja nie razumieju, jak žyvuć maje znajomyja, jakija abstrahavalisia ad usiaho i žyvuć tolki prablemami, dzie b smačna pajeści i saładziej vypić. Ciapier ja vielmi vyrazna baču našu ciomnuju budučyniu, i kali jana stanie śvietłaj — niezrazumieła. U mianie ŭsio. Sumna, ale jak jość».
Čytajcie taksama:
«Tolki dziejańnie ratuje». Spytali ŭ viadomych biełarusaŭ, jak pieražyć hetyja časy
