Fota: Interfaks
«U ministra abarony ciapier šmat kłopataŭ, jak vy razumiejecie. Idzie śpiecyjalnaja vajennaja apieracyja. Kaniečnie, ciapier nie zusim čas dla miedyjnaj aktyŭnaści. Heta całkam zrazumieła», — prakamientavaŭ jaho źniknieńnie pres-sakratar prezidenta Rasii Dźmitryj Piaskoŭ, piša «Mieduza».
Jon abvierh paviedamleńni ab prablemach sa zdaroŭjem u ministra.
Pieršym na źniknienie Šajhu źviarnuŭ uvahu žurnalist «Miedyjazony» Dźmitryj Traščanin, paśla hetaha vydańnie «Ahienctva» padrabiazna vyvučyła, što adbyvałasia ź ministram u sakaviku.
U apošni raz Šajhu źjaŭlaŭsia ŭ navinach rasijskich ahienctvaŭ 11 sakavika — tady jon parazmaŭlaŭ sa svaim tureckim kaleham. U toj ža dzień Minabarony raskazvała pra vizit ministra ŭ Centralny vajenny kliničny špital — tam jon uručaŭ uznaharody vajskoŭcam, paranienym va Ukrainie.
18 sakavika na sajcie Kramla zhadvałasia, što Šajhu ŭdzielničaŭ u naradzie členaŭ Rady biaśpieki z Pucinym. Ale fota i videa z hetaj sustrečy nie publikavalisia. Tady ž na «Pieršym kanale» vyjšaŭ siužet pra toje, jak Šajhu ŭručaje ŭznaharody vajskoŭcam, ale karcinka ŭ im supadała ź videa, jakoje minabarony publikavała 11 sakavika.
Z taho dnia niama navin i pra kiraŭnika Hienštaba Uzbrojenych sił Rasii Valeryja Hierasimava.
Vyšejšaje kamandavańnie amierykanskaha vojska, uklučajučy ministra abarony Łojda Ościna, šmatrazova paśla pačatku vajny va Ukrainie sprabavała źviazacca pa śpiecyjalnym kanale z rasijskim ministram abarony Siarhiejem Šajhu i načalnikam Hienštaba Valeryjem Hierasimavym. Adnak rasijski bok adchilaje ŭsie sproby pieramovaŭ, paviedamlaje hazieta Washington Post.
Amierykanski bok kaža, što takija razmovy pamiž dźviuma najbujniejšymi jadziernymi dziaržavami patrebnyja, kab paźbiehnuć niepatrebnaj eskałacyi abo błytaniny — i ŭvohule mieć mahčymaść abmierkavać luboje niedastatkovaje razumieńnie. Asabliva va ŭmovach vajennych dziejańniaŭ, jakija praciahvajucca.
Raniej rasijskija ŚMI źviarnuli ŭvahu na toje, što ministr abarony RF Siarhiej Šajhu nie źjaŭlaŭsia ŭ publičnaj prastory z 11 sakavika. Nie źjaŭlajecca na publicy i Valeryj Hierasimaŭ.
