Jehipiet
Ciapier turapieratar kansaliduje čartarnyja prahramy ŭ napramku Jehipta — u Churhadu i Šarm-eš-Šejch. Akramia Aerabiełservisa, na rejsach jak apieratary pracujuć kampanii Coral Travel, ANEX Tour, Fun&Sun Belarus (ex TUI Belarus) i inšyja.
Rejs ź Minska ŭ Churhadu ažyćciaŭlajecca raz na dziesiać dzion. Z krasavika častata vyletaŭ trochi źmienicca — rejsy buduć ažyćciaŭlacca raz na 9 i 12 dzion.
Paloty ŭ Šarm-eš-Šejch da niadaŭniaha času ažyćciaŭlalisia try razy ŭ tydzień, ciapier — dva razy. Mahčyma, prahrama budzie aptymizavanaja, i palacieć ź Minska ŭ Šarm-eš-Šejch taksama možna budzie 1 raz na 10 dzion.
Karektyvy ŭ prahramy ŭnosiacca pastajanna. Paśla zakryćcia dla palotaŭ poŭdnia Rasii, samaloty ź Minska ŭ Jehipiet lotajuć pa dosyć praciahłym maršrucie — z ablotam praz Kazachstan i dazapraŭkaj u Aktau. Čas u darozie składaje 8 hadzin 30 chvilin u adzin bok (z ulikam pasadki ŭ Kazachstanie). Dapłata za taki ablot składaje 170 dalaraŭ na adnaho čałavieka.
Raniej u Jehipiet ź Biełarusi lotali čartary, jakija kansalidavali turapieratary «Tez Tur» i Join UP, paśla 24 lutaha hetyja prahramy byli źniatyja. «Tez Tur» prypyniŭ vykanańnie jehipieckich prahram z 5 sakavika pa 15 krasavika, i pakul infarmacyi pra dalejšyja płany turapieratara nie pastupała. Ukrainski turapieratar Join UP raspaŭsiudziŭ apaviaščeńnie ab nadychodzie abstavin niepieraadolnaj siły (fors-mažor).
Turcyja
Akramia čartarnaj prahramy ŭ Jehipiet, na pieryjad «vysokaha siezona Aerabiełservis płanuje čartary ŭ Turcyju — padkreślivajučy, što zapłanavanyja prahramy mohuć źviedać źmieny ŭ suviazi ź niestabilnaj ahulnaj situacyjaj.
Pavodle płanaŭ, 17 krasavika pavinien startavać pieršy čartar Aerabiełservisa ŭ Antalju. Usiaho ŭ krasaviku zapłanavana 5 rejsaŭ ź Minska na hety turecki kurort. Z maja — kolkaść rejsaŭ budzie pavialičanaja.
«Pakul nieviadoma, ci buduć abloty pa šlachu ŭ Turcyju i źviazanyja z hetym dapłaty», — kamientuje turapieratar. Kali ŭ rehijonie budzie pa-raniejšamu niespakojna, to z ulikam ablotu čas u palocie ź Minska da Antalji składzie 6 hadzin 5 chvilin tudy i — 5 hadzin 50 chvilin pa šlachu nazad. Pramiežkavyja pasadki i dazapraŭki nie płanujucca.
«Pahladzim pa zahruzcy — raspaviadajuć u Aerabiełservisie. — Spadziajomsia, usie razam, ahulnymi namahańniami, adolejem chacia b minimalnuju prahramu». Akramia palotaŭ u Antalju, Aerabiełservis taksama zajaviŭ čartarnyja prahramy na takija tureckija kurorty, jak Bodrum, Iźmir, Dałaman (sa startam łancužkoŭ u kancy maja).
Pavodle infarmacyi, pradstaŭlenaj kampanijaj «Tez Tur», palotnaja prahrama kansalidatara ŭ Antalju ź Minska startuje 17 krasavika.
Akramia čartarnych prahram u Jehipiet i Turcyju, Turfirmy taksama realizujuć tury na rehularnych rejsach «Biełavija» ŭ Hruziju i AAE.
