Raman Abramovič.
Raniej heta samaje vydańnie pisała pra toje, što Abramovič sapraŭdy ŭdzielničaje ŭ takich pieramovach, a Uładzimir Zialenski z hetaj pryčyny navat prasiŭ ZŠA nie ŭvodzić sankcyi ŭ dačynieńni da biznesoŭca.
Va ŭčarašnim intervju rasijskim žurnalistam Zialenski nie paćvierdziŭ i nie abvierh hetyja źviestki. A siońnia brytanski tabłoid Daily Mail napisaŭ, što, vystupajučy ŭ jakaści pasiarednika pamiž Zialenskim i Pucinym, Abramovič «lotaŭ pamiž Stambułam, Maskvoj i Kijevam» i sustrakaŭsia z čalcom ukrainskaj pieramoŭnaj hrupy Rustemam Umieravym i pres-sakratarom prezidenta Turcyi Redžepa Erdahana Ibrahimam Kałynam. Padčas hetaj sustrečy Kałyn vystupiŭ ź idejaj, što Krym i Danbas pavinny znachodzicca ŭ doŭhaterminovaj arendzie ŭ Rasii.
Paśla hetaha, jak paviedamlaje Daily Mail, Abramovič i Umieraŭ tranzitam praz Polšču pryjechali ŭ Kijeŭ, dzie sustrelisia ź Zialenskim. Zatym Abramovič znoŭ adpraviŭsia ŭ Turcyju, a potym u Maskvu, dzie nibyta pieradaŭ Uładzimiru Pucinu napisanyja Zialenskim ad ruki prapanovy pa ŭrehulavańni kanfliktu.
Pavodle novych źviestak The Wall Street Journal, paśla sustrečy ź Zialenskim u Kijevie ŭ Abramoviča źjavilisia takija simptomy, jak pačyrvanieńnie i reź u vačach, łuščeńnie skury na tvary i rukach. Vydańnie paviedamlaje, što ŭ asiarodździ biznesoŭca schilnyja padazravać u arhanizacyi atručvańnia «jastrabaŭ» u Kramli, jakija chočuć sarvać mirnaje ŭrehulavańnie pamiž Rasiejaj i Ukrainaj.
Infarmacyju ab simptomach atručvańnia ŭ Abramoviča i Umierava paśla sustrečy ź Zialenskim paćviardžaje taksama daśledčaja hrupa Bellingcat, jakuju «paprasili dapamahčy pryciahnuć ekśpiertaŭ chimičnaj zbroi dla ekśpiertyzy abstavin taho, što zdaryłasia».
Pa dadzienych Bellingcat, simptomy atručvańnia źjavilisia ŭ Abramoviča ŭviečary, kali jon viarnuŭsia ź pieramovaŭ u svaju kijeŭskuju kvateru. Va Uładzimira Zialenskaha pry hetym padobnych simptomaŭ zafiksavana nie było.
«Pa słovach dvuch apytanych ekśpiertaŭ pa chimičnaj zbroi i lekara, simptomy bolš za ŭsio adpaviadajuć varyjantam parfirynaŭ, arhanafasfataŭ abo bicykličnych rečyvaŭ. Kančatkovuju vysnovu zrabić niemahčyma z pryčyny adsutnaści śpiecyjalizavanaha łabaratornaha abstalavańnia pobač z paciarpiełymi», — piša Bellingcat u tvicie nižej.
Da liku arhanafasfataŭ staviŭsia jad, jakim byŭ atručany Alaksiej Navalny, vynikała z publikacyj pa vynikach jaho lačeńnia ŭ Bierlinskaj klinicy ŭ 2020 hodzie.
Daradca Ofisa prezidenta Ukrainy Michaił Padalak, kali jaho pra heta zapytalisia, aficyjna čutki nie paćvierdziŭ:
«Usie siabry pieramoŭnaj hrupy pracujuć siońnia ŭ zvyčajnym režymie. U infarmacyjnym poli ciapier šmat infarmacyjnych śpiekulacyj, roznych kanśpirałahičnych viersij i elemientaŭ toj ci inšaj infarmacyjnaj hulni. Tamu jašče raz paŭtaru — členy pierahavornych hrup pracujuć siońnia ŭ štatnych režymach», — paviedamiŭ Padalak.
U toj ža čas pradstaŭnik Ramana Abramoviča paćvierdziŭ BBC, što ŭ pačatku sakavika ŭ aliharcha prajavilisia simptomy atručvańnia padčas mirnych pieramovaŭ u Kijevie. Ale zaraz Abramovič užo pačuvajecca narmalna i praciahvaje ŭdzielničać u pieramovach.
