Vietrapark u fiederalnaj ziamli Brandenburh na paŭnočnym uschodzie Hiermanii.
Adnaŭlalnyja krynicy enierhii (AKE) viarnuli sabie rolu najvažniejšaha vytvorcy elektryčnaści ŭ Hiermanii.
U amal zavieršanym 1-m kvartale 2022 hoda jany vypracavali, pavodle papiarednich acenak, kala 74,5 młrd kiłavat-hadzin (kVt∙h) elektraenierhii. Heta prykładna na 25% bolš, čym u anałahičny pieryjad 2021 hoda.
Za pieršyja dva miesiacy hoda AKE zabiaśpiečyli ŭ siarednim 54% spažyvańnia elektraenierhii ŭ FRH: 47% u studzieni i 62% u lutym.
Takija dadzienyja apublikavała 28 sakavika Fiederalnaje abjadnańnie pradpryjemstvaŭ enierha— i vodazabieśpiačeńnia (BDEW) i Centr daśledavańniaŭ soniečnaj i vadarodnaj enierhii fiederalnaj ziamli Baden-Viurtembierh (ZSW).
U pieršyja dva miesiacy 2022 hoda rezki rost vytvorčaści «zialonaj» elektryčnaści adbyŭsia dziakujučy mocnym viatram i asabliva z-za troch urahanaŭ, jakija navalilisia na terytoryju Hiermanii.
U vyniku ŭ lutym niamieckaja vietranaja enierhietyka pastaviła rekord, upieršyniu ŭ svajoj historyi vypracavaŭšy za miesiac 20,6 młrd kVt∙h.
A ŭ druhoj pałovie sakavika praciahły antycykłon vyklikaŭ šmatdzionnaje biaschmarnaje nadvorje. Jano, u svaju čarhu, zabiaśpiečyła značny rost vypracoŭki enierhii soniečnymi elektrastancyjami, a taksama nieźličonymi soniečnymi panelami na dachach žyłych damoŭ, ofisnych budynkaŭ i haspadarčych pabudoŭ.
Takim čynam, niamieckija adnaŭlalnyja krynicy enierhii (akramia vietru i sonca, heta bijamasa i trochi hidraenierhietyki) znoŭ vyrvalisia napierad u spabornictvie z tradycyjnaj elektraenierhietykaj (miascovy bury i impartny kamienny vuhal, reštki atamnaj enierhietyki i ŭ niaznačnaj stupieni nafta).
Rekord byŭ pastaŭleny ŭ 2020 hodzie, kali hety pakazčyk dasiahnuŭ niečuvanych datul 47,1%. A voś u 2021 hodzie dola AKE ŭ vytvorčaści elektraenierhii źniziłasia, pa dadzienych Fiederalnaha statystyčnaha viedamstva FRH (Destatis), da 42,4%.
«Vysokaja dola adnaŭlalnaj enierhii ŭ pieršyja miesiacy hetaha hoda nie pavinna ŭvozić nas u zman: raźvićcio AKE idzie ŭsio ž zanadta pavolna».
Tak prakamientavała atrymanyja dadzienyja hienieralny dyrektar BDEW Kierścin Andree. Da taho ž vytvorčaść hetaja pakul što niestabilnaja i nadta zaležyć ad kapryzaŭ nadvorja.
Tym nie mienš, pavodle słoŭ Andree,
«vajna va Ukrainie i źviazanyja ź joj aściarohi z nahody enierhazabieśpiačeńnia Jeŭropy vielmi nahladna pakazvajuć, nakolki važna chutčej zdabyć niezaležnaść ad vykapniaŭ enierhanośbitaŭ, a tym samym taksama ad impartnych pastavak z Rasii».
