Ukrainskija aficery, u tym liku Viarchoŭny hałoŭnakamandujučy hienierał Valeryj Załužny (sprava) z antydronavymi sistemami EDM4S-UA 4. Fota Viktara Kryvienki / Facebook
Čałaviek, jaki staić na fatahrafii sprava — sam hienierał Valeryj Załužny, hałoŭnakamandujučy Uzbrojenymi siłami Ukrainy. Nieviadoma, kali i pry jakich abstavinach fatahrafija była zroblena. Pieršym jaje vykłaŭ u Sieciva ŭkrainski palityk Viktar Kryvienka, nie padaŭšy dadatkovaj infarmacyi.
Mahčyma, hetaje fota było zroblena ŭžo daŭno. Bo historyja hetych pryład va Ukrainie ŭžo davoli doŭhaja i zabłytanaja.
Prostaje rašeńnie prostaj prablemy
Abodva aficery trymajuć u rukach sistemu pad nazvaj EDM4S. Heta ručnoje prystasavańnie dla elektronnaj baraćby, dakładniej, dla źbivańnia na małych adlehłaściach prostych dronaŭ. Jana nie stralaje ŭ ich u zvyčajnym razumieńni hetaha słova, ale vypramieńvaje mocnyja pieraškody, jakija pavinny razarvać suviaź pamiž bieśpiłotnikam i jaho apierataram. Akramia taho, sistema pavinna pieraškadžać atrymańniu sihnała spadarožnikavaj navihacyi. Bolšaść hramadzianskich dronaŭ u takich umovach sprabujuć zrabić avaryjnuju pasadku ci viarnucca da miesca ŭźlotu.
EDM4S tolki vonkava nahadvaje zvyčajnuju vintoŭku, bo dla jaje kanstrukcyi vykarystoŭvalisia anałahičnyja elemienty, jak, naprykład, prykład abo dziaržalna. Niezvyčajna vyhladajuć vialikija čornyja elemienty na piaredniaj paneli pryłady — heta viečki, jakija chavajuć anteny, što vypramieńvajuć pieraškody. Apieratar pavinien nakiravać ich na bieśpiłotny latalny aparat, vykarystoŭvajučy zvyčajny pryceł, jak na vintoŭcy, i nacisnuć na spuskavy kručok, kab vyklikać pieraškody.
Heta nie niejkaja śpiecyjalna prydumanaja zbroja. Hetyja typy sistemaŭ užo šmat hadoŭ vykarystoŭvajucca va ŭsim śviecie, u asnoŭnym palicejskimi słužbami. Naprykład, dla abarony aeraportaŭ ad uźlotu nad imi nievialikich hramadzianskich dronaŭ, kiravanych kimści nieaściarožnym ci zapuščanych z drennymi namierami.
Mahčyma taksama vykarystańnie ich dla baraćby z dronami nad kancertami abo pratestami. U kantekście takoha vykarystańnia EDM4S rekłamujecca svaim aficyjnym vytvorcam, litoŭskaj kampanijaj NT-Service.
Choć EDM4S nie źjaŭlajecca stroha vajskovaj pryładaj i na rasijskich partałach dy forumach jaho nazyvajuć «bieskarysnaj cackaj», bo pryłada nieefiektyŭnaja suprać bujnych vajskovych raźviedvalnych bieśpiłotnych latalnych aparataŭ, hetaja sprava nie takaja vidavočnaja.
Realii vajny va Ukrainie takija, što abodva baki ŭ šyrokich maštabach vykarystoŭvajuć prostyja hramadzianskija bieśpiłotniki. Hetaje abstalavańnie niedarahoje i nie ciažkoje ŭ vykarystańni, tamu jano zvyčajna prymianiajecca dla atrymańnia infarmacyi pra pazicyi praciŭnika i naviadzieńnia artyleryjskaha abstrełu. Takim čynam, baraćba z takimi pryładami moža być spravaj žyćcia i śmierci dla nievialikich padraździaleńniaŭ.
Frantavaja patreba
Ukraincy zamovili EDM4S jašče zadoŭha da ciapierašniaj vajny, u 2019 hodzie. Heta było zroblena ŭ asnoŭnym z ulikam sutyknieńniaŭ na linii spynieńnia ahniu na Danbasie, dzie abodva baki rehularna vykarystoŭvali nievialikija hramadzianskija bieśpiłotniki. U tym liku dla skidańnia hranataŭ abo minaŭ. Adnak ukrainskija vajskoŭcy čakali niekalki śpiecyjalnych madyfikacyj u adpaviednaści sa svaimi patrebami, raspracoŭka jakich zaniała čas.
Pieršyja sistemy EDM4S z dadatkovym paznačeńniem UA musili być dastaŭlenyja ŭ listapadzie 2021 hoda. Pieršyja fatahrafii ŭkrainskich vajskoŭcaŭ na Danbasie z hetaj sistemaj pačali źjaŭlacca ŭ śniežni. Ukrainskaje Ministerstva abarony paviedamiła, što zamoviła ŭ ahulnym liku 37 EDM4S (niezrazumieła, ci to asobnych pryład, ci to niejkich kamplektaŭ pa niekalki štuk).
Adnak pastaŭki išli nie nadta hładka. Niezrazumieła, jak mienavita skłałasia situacyja, pakolki detali nie byli apublikavanyja, ale jak minimum častku EDM4S ukraincy chacieli zamović praz ahienctva zabieśpiačeńnia NATA. Mahčyma, dla taho, kab atrymać na ich finansavuju dapamohu.
U śniežni 2021 hoda ŭkraincy publična abvinavacili niemcaŭ u błakavańni raniej hetaj ździełki. Adnak u hutarcy z Financial Times ministr abarony Ukrainy Alaksiej Reźnikaŭ adznačyŭ, što zdoleŭ prymusić Bierlin pieradumać.
Pry hetym nieviadoma, nakolki litoŭskimi źjaŭlajucca EDM4S. Kampanija NT-Service zapeŭnivaje, što heta jaje ŭłasnaja raspracoŭka, raspracavanaja i vyrablenaja ŭ Litvie. Tym nie mienš, vy možacie sutyknucca ź infarmacyjaj, raźmieščanaj halinovymi partałami, što na samoj spravie heta praca izrailskaj kampanii Skylock. Litoŭskaje pradpryjemstva dla jaje tolki jak propusk u NATA, bo abstalavańnie vyrablajecca dziaržavaj-členam, a tamu padparadkoŭvajecca inšym zakonam, čym pryviezienyja z treciaj dziaržavy.
U kantekście Ukrainy takoje pasiarednictva taksama na ruku izrailcianam, urad jakich robić šmat, kab nie razdražniać Maskvu.
