«Siem čałaviek pastupiła [paśla abstrełu]. Ź ich dzicia ŭ ciažkim stanie z maci ciažarnaj nakiravanyja ŭ Navazybkaŭskuju CRB. Dvoje darosłych u ciažkim stanie, i jašče troje ŭ siarednim stanie», — raspaviali ŭ pryjomnym adździaleńni balnicy.
«U vyniku abstrełu paciarpieli dva žyłyja damy, siarod žycharoŭ jość paciarpiełyja», — napisaŭ hubiernatar rehijona Alaksandr Bahamaz ŭ Telegram.
Paśla SK Rasii zajaviŭ, što abstreł pasiołka ŭ Branskaj vobłaści byŭ avijaŭdaram
«Z vykarystańniem dvuch bajavych viertalotaŭ, zabiaśpiečanych ciažkim nastupalnym uzbrajeńniem, vajskoŭcy USU niezakonna ŭvarvalisia ŭ pavietranuju prastoru Rasijskaj Fiederacyi. Ruchajučysia na małoj vyšyni, dziejničajučy naŭmysna, jany zrabili nie mienš za 6 avijaŭdaraŭ pa žyłych damach u pasiołku Klimava Klimaŭskaha rajona Branskaj vobłaści», — paviedamiła viedamstva.
U vyniku paškodžanyja šeść damoŭ, paranienyja siem čałaviek. SK raspačaŭ kryminalnuju spravu.
Kamientaroŭ z boku Ukrainy pakul nie było.
Taksama ŭłady paviedamili, što škoły pamiežnych rajonaŭ Branskaj vobłaści pierachodziać na dystancyjnaje navučańnie z 15 krasavika.
Učora Minabarony RF pryhraziła nanieści ŭdary pa «centrach pryniaćcia rašeńniaŭ», u pryvatnaści pa Kijevie, u vypadku «dyviersij» i naniasieńnia ŭdaraŭ ukrainskimi vojskami pa abjektach u Rasii. Daradca kiraŭnika Ofisa prezidenta Ukrainy Alaksiej Arastovič zajaviŭ siońnia, što na luby streł RF pa ŭkrainskich orhanach kiravańnia moža być udar u adkaz.
