Źniščany rasijski tank u Bučy. Fota: Yaghobzadeh Alfred/ABACA / PAP
Pa słovach doktara Sakały, usio śviedčyć pra toje, što na ŭschodzie Ukrainy rasijanie voś-voś zavieršać vialikuju kancentracyju vojskaŭ, pierakinutych z paŭnočnaha frontu i z unutranych rajonaŭ krainy.
«Kali nastup hetych siłaŭ budzie paśpiachovym i adnosna chutkim, ja čakaju, što Kreml moža šukać niejkaje psieŭdamirnaje rašeńnie. Ad spynieńnia ahniu da niejkaj formy mižnarodnaj damovy, kab jana harantavała Pucinu vyjście z hetaj avantury z zachavańniem tvaru», — havoryć jon.
«Adarvańnie častki terytoryi Ukrainy tady možna budzie pradstavić dla ŭnutranaha vykarystańnia jak pośpiech, a taksama prajavić krychu dobraj voli i hatoŭnaści spynić bajavyja dziejańni jak pryčynu dla źmiakčeńnia zachodnich sankcyj, pierš čym jany całkam razburać rasijskuju ekanomiku», — dadaje ekśpiert.
Sakała nie chavaje: jon baicca, što mnohija koły na Zachadzie z palohkaj usprymuć taki varyjant. Na jaho dumku, Kitaj taksama, napeŭna, vydychnuŭ by.
«Kitaj užo pakutuje ad zbojaŭ u łancužkach pastavak, u tym liku praduktaŭ charčavańnia, i ŭ dadatak im jašče treba palityčna łaviravać pamiž padtrymkaj Rasii i niebiaśpiekaj trapić pad zachodnija handlovyja sankcyi», — padkreślivaje jon.
A kali rasijanie «zahruznuć» va Ukrainie? Doktar Sakała ličyć, što jość dva varyjanty. Situacyja, na jahonuju dumku, uskładnicca, kali čakany nastup rasijan zachłyniecca abo ŭkraincy pačnuć kontrataku, čaho nielha vyklučać.
«Heta, viadoma, dobra dla Ukrainy, ale Maskvie tady daviadziecca šukać alternatyŭnyja vajennyja rašeńni.
Bo niejak nie mahu sabie ŭjavić Pucina, jaki skazaŭ by: «Dobra, my sprabavali, ničoha nie vychodzić, prabačcie, my sychodzim adsiul».
Na treciuju sprobu suchaputnaj apieracyi jamu nie chopić siłaŭ i času. Rasijskaja armija bolš nie budzie macniejšaj, resursy zakančvajucca. Najpierš maralnyja, ale techničnyja i materyjalnyja taksama, a sankcyi buduć stanavicca ŭsio bolš žorstkimi», — kaža ekspert.
Tamu doktar Sakała śćviardžaje, što jość dva scenaryi.
Pieršy — varjacki, heta aznačaje prymianieńnie zbroi masavaha źniščeńnia.
«Varjacki, bo jon musić vyklikać nastupstvy, jakija paskorać krach Rasii i jaje ciapierašniaha režymu», — padkreślivaje jon.
Druhi — bolš racyjanalny, ale taksama žudasny.
«Heta pieranos akcentaŭ na asimietryčnuju dziejnaść, rost infarmacyjnych dyviersij, plus terakty suprać hramadzianskich abjektaŭ, jak va Ukrainie, tak i na Zachadzie.
I tak zvanaja «małaja vajna», heta značyć viartańnie da vykarystańnia «zialonych čałaviečkaŭ», sieparatystaŭ, dobraachvotnych atradaŭ roznych złačyncaŭ, jakija nie mohuć supraćstajać rehularnaj armii ŭ poli, ale dobra padtrymlivajuć destabilizacyju i chaos», — tłumačyć doktar Sakała.
«Tady Kreml moža admaŭlać svoj udzieł, śćviardžajučy, što jon nie spansuje hetuju dziejnaść. I takuju pazicyju achvotna padchapili b roznyja sajuźniki Kramla, patrabujučy admieny sankcyj. I ŭ Rasii źjaviŭsia b pieradych. Tym časam Ukraina skaciłasia b da statusu zaniapałaj dziaržavy», — dadaje daśledčyk.
Doktar Sakała padkreślivaje, što ŭ śviatle hetych scenaryjaŭ ni Ukraina, ni Zachad, prynamsi, taja jaho častka, jakaja zdolnaja da stratehičnaha myśleńnia,
nie maje inšaha vyjścia, jak prosta zmahacca da kanca. Nie svajho, viadoma, a režymu Pucina i impierskich ambicyj Rasii.
«Heta značyć: bolš zbroi dla ŭkraincaŭ, pryčym najlepšaj zbroi, plus bolš sankcyj suprać Rasiei, pryčym samych balučych. A kali hetaha niedastatkova, to samy čas padumać pra nastupnyja kroki. Mahčyma, nie siońnia, ale zaŭtra kalektyŭny Zachad pavinien dać rasijanam zrazumieć, što nie vyklučaje pramych vajennych dziejańniaŭ. Jakich? Ja b hetaha, akurat, nie kazaŭ. Niachaj pra heta padumajuć Pucin i jaho hienierały. I niachaj u ich budzie jašče adna pryčyna dla stresu i biassońnicy», — padkreślivaje doktar Sakała.
