Samachodnaja artyleryjskaja ustanoŭka «Cezar» na šasi Tatra T815. Fota: fmi.dk
22 krasavika Fłarans Parli, ministarka abarony Francyi, paviedamiła, što prezident Makron daručyŭ pieradać Ukrainie samachodnyja artyleryjskija ŭstanoŭki «Cezar». Heta našmat bolš praktyčnaja padtrymka, čym publikacyja poŭnych dramatyzmu fotazdymkaŭ paśla składanych telefonnych pieramovaŭ z Pucinym.
Kankretnaja kolkaść ustanovak nie nazyvajecca, adnak pa dadzienych vydańnia Ouest-France havorka viadziecca pra pieradaču 12 adzinak techniki z reziervaŭ francuzskaj armii.
Samachodnaja artyleryjskaja ŭstanoŭka «Cezar», stvoranaja ŭ Francyi — adna z najlepšych u śviecie ŭ svajoj katehoryi. Jana staić na ŭzbrajeńni Čechii, Danii, Tajłanda, Indaniezii i Saudaŭskaj Aravii.
Standartnaja dla NATA harmata 155 mm zabiaśpiečvaje, pry vykarystańni aktyŭna-reaktyŭnych snaradaŭ, naniasieńnie ŭdaraŭ pa celach na adlehłaści da 45 km. Braniravańnie kabiny nie samaje mahutnaje — abaraniaje ad kulaŭ kalibru 7.62 mm, zatoje vaha ŭstanoŭki mienšaja za 18 ton, što dazvalaje vykarystoŭvać samaloty dla pierakidańnia hetaj techniki. Pa darohach «Cezar» moža pieraadolvać da 600 km z chutkaściu da 80 km/h. Pa-za darohami chutkaść da 50 km/h. Ekipaž składajecca z 4—5 čałaviek. Sučasnaja sistema kiravańnia ahniom, u skład jakoj uvachodziać prymač GPS, radar i balistyčny błok kiravańnia, robić hetuju zbroju vielmi trapnaj. Zapas snaradaŭ nie nadta vialiki — 18 štuk, ale heta mohuć być u tym liku zvyšsučasnyja snarady M982 Excalibur, vykarystańnie jakich praktyčna harantuje źniščeńnie celi ź pieršaha strełu. Sistema moža stralać z chutkaściu da 6 snaradaŭ na chvilinu.
Va ŭmovach, kali rasijskaja armija nie dasiahnuła absalutnaha panavańnia ŭ pavietry i luboje prymianieńnie avijacyi pahražaje stratami avijatechniki, mienavita artyleryja robicca asnoŭnym instrumientam vajny. I tut pieramožcam stanie toj, chto chutčej, trapniej i z maksimalna dalokaj dystancyi nanosić udary.
Voś čamu Ukraina prasiła ŭ Zachadu artyleryjskija sistemy. Sučasny standart artyleryi NATA — 155 mm, rasijski — 152,4 mm. I heta akurat toj vypadak, kali pamier maje značeńnie — 2,6 mm roźnicy ŭ kalibry kanviertujucca ŭ vyniku ŭ niekalki kiłamietraŭ roźnicy pa dalnaści. Sučasnyja artyleryjskija sistemy Paŭnočnaatłantyčnaha aljansu mohuć vieści ahoń, znachodziačysia pa-za miežami dasiažnaści dla rasijskaj artyleryi.
Pieršymi pra pastaŭki takoha ŭzbrajeńnia zajavili Estonija, Słavakija, Vialikabrytanija i ZŠA. Ciapier pryjšła čarha Francyi.
Pavodle niekatorych acenak, ahułam ukraincy mohuć atrymać — ci ŭžo atrymali — bolš za dźvie sotni stvałoŭ.
Čytajcie taksama:
Słavaččyna pradaje Ukrainie «Zuzany», jakija bjuć na 50 km
Ukraina pieramahaje ŭ bitvie bieśpiłotnikaŭ
Krainy Zachadu abiacajuć Ukrainie ciažkuju artyleryju. Bojeprypasy iduć niaspynnym patokam
