Viktoryja Nułand. Fota: AR
— Majo pieršaje pytańnie tyčyłasia mižpartyjnaj padtrymki Ukrainy ŭ ZŠA, ale, zdajecca, Pałata pradstaŭnikoŭ užo adkazała na jaho, pryniaŭšy zakon ab lend-lizie 417 hałasami suprać 10.
— My nadzvyčaj zadavolenyja tym, što hetaja tema chvaluje ŭsiu Amieryku. Jana sapraŭdy abjadnała abiedźvie partyi, a prezident tolki što zapytaŭ u Kanhresa jašče 33 miljardy dalaraŭ ź biudžetu na padtrymku Ukrainy — na finansavańnie humanitarnych prahram, zabieśpiačeńnie charčovaj biaśpieki i na vyrašeńnie inšych prablem, sparodžanych hetaj vajnoj. My bačym padtrymku Kanhresa, jana adlustroŭvaje adzinstva amierykancaŭ u imknieńni dapamahčy advažnamu narodu Ukrany, jaki supraćstaić rasijskaj ahresii.
— Jakija ciapier asnoŭnyja zadačy kiraŭnictva ZŠA ŭ dačynieńni da Ukrainy?
— Naša meta — damahčysia, kab hetaja vajna zaviaršyłasia stratehičnaj parazaj dla Uładzimira Pucina. My žadajem, kab hetaja vajennaja avantura kaštavała jamu i jaho režymu nadmierna doraha. I, viadoma, my chočam, kab Ukraina nie tolki vyžyła, ale i kvitnieła jak demakratyčnaja niezaležnaja dziaržava, jakaja ŭmacoŭvaje svaje dobrasusiedskija adnosiny i ź Jeŭropaj, i z rasijskim narodam.
Rasijanie taksama nie zasłuhoŭvajuć usich pakut, jakija na ich zvalilisia z hetaj vajnoj: zabityja sałdaty ŭ trunach i miaškach, da ich žonak, maci i dziaciej, nastupstvaŭ ekanamičnych sankcyj. Ale pryčyna ŭsiaho hetaha — tolki rašeńnie Pucina pačać vajnu va Ukrainie zamiest taho, kab ukłaści ŭsiu svaju enierhiju va ŭmacavańnie samoj Rasii i jaje ekanomiki.
— Navat da pryniaćcia zakona ab lend-lizie Pucin i jaho asiarodździe, jak i łajalnyja Kramlu miedyja, nieadnarazova kazali ab tym, što realny supiernik Rasii — heta nie Ukraina, a ZŠA i NATA. Ciapier jany, napeŭna, ŭmacavalisia ŭ hetym mierkavańni. Ale kali Pucin i tak ličyć, što vajuje z ZŠA, što pieraškadžaje amierykancam ustupić u vajnu napramuju?
— Tak pracuje pierakručanaja psichałohija Pucina. Takuju viersiju historyi jon pradaje rasijskamu narodu, kab apraŭdać usie patračanyja na hetuju vajnu srodki, usie stračanyja ŭ joj žyćci, usie hihanckija straty rasijskaha vojska ŭ technicy. Va ŭsich hetych strat niama nivodnaj inšaj mety, akramia zadavalnieńnia jaho impieryjalistyčnych ambicyj za košt Ukrainy.
Jak vy viedajecie, na praciahu ŭžo mnohich miesiacaŭ, z taho času, jak my pačali nazirać padrychtoŭku da hetaj vajny, ZŠA razam z sajuźnikami pa NATA prapanoŭvali Rasii vyrašyć kanflikt dypłamatyčnym šlacham. My pradstavili rasijskamu boku vielmi padrabiaznuju prapanovu na dziesiaci staronkach ab zadavalnieńni taho, što nam tady zdavałasia źlohku paranaidalnaj turbotaj Pucina za svaju biaśpieku. Naprykład, ZŠA nikoli nie źbiralisia raźmiaščać va Ukrainie rakiety vialikaj dalokaści — ale my hatovyja byli abmiarkoŭvać i heta, i mnohaje inšaje.
Ale zamiest taho, kab viarnucca za stoł pieramovaŭ, Pucin pačaŭ vajnu. Jon moža ŭ luby momant adnavić dypłamatyčnaje vyrašeńnie hetaha kanfliktu — ale zamiest hetaha jon vybiraje štodzionnuju hibiel mnohich rasijskich junakoŭ, masavaje zabojstva ŭkraincaŭ i šmatlikija vypadki źvierstvaŭ z boku rasijskaj armii, jakija my ŭžo bačyli ŭ Bučy i Maryupali.
Heta hańba dla ŭsioj vialikaj rasijskaj nacyi i reputacyi Rasii, adkaznaść za jakuju niasie tolki Pucin. My tut uvohule ni pry čym. Ale, zrazumieła, my hatovyja abaraniać niavinnych achviar hetaj vajny. My hatovyja dapamahčy ŭkraincam budavać svaju niezaležnuju dziaržavu — a Pucin, navat praz 30 hadoŭ paśla zakančeńnia Chałodnaj vajny, śćviardžaje, što va Ukrainy naohuł niama prava na isnavańnie.
— Jość mierkavańnie, jakoje ja ŭžo dastatkova časta čuju, pryčym ad ludziej, jakich składana zapadozryć u zališnich simpatyjach da Pucina ci Kramla. Jano zvodzicca da taho, što kali Pucin užo pakazaŭ, što nie hatovy spyniacca ni pry jakich umovach, to novyja pastaŭki zbroi va Ukrainu tolki zaciahvajuć vajnu — i, adpaviedna, pakuty ukraincaŭ.
— I kudy vas pryvodzić takaja łohika? Što Ukraina pavinna prosta padniać ruki i skazać: zabirajcie našu krainu, naš suvierenitet? Ale jany nie žadajuć žyć u krainie, jakaja padobnaja na pucinskuju Rasiju. Jany žadajuć być niezaležnymi i achoŭvać svaje miežy, u ich jość takoje prava.
Pakul ukraincy hatovyja zmahacca za heta, my hatovyja dapamahčy im abaraniacca. Ale viernaje i advarotnaje. Pucin u hetaj vajnie ŭžo straciŭ takuju kolkaść vajennaj techniki, nie kažučy ŭžo pra tysiačy sałdackich žyćciaŭ, što dla nas vidavočna, biaskonca jon tak praciahvać nie moža.
Fota: AR
Nie vierym my i ŭ toje, što rasijski narod hatovy viečna ciarpieć niahody, jakija vypali na ich dolu. Tamu my praciahniem dapamahać ukraincam u raźliku na toje, što albo Pucin, albo rasijski narod rana ci pozna adumajucca.
— Nakolki, na vašu dumku, racyjanalna dziejničaje Pucin? Ci šukaje jon niejkaje vyjście z hetaj vajny, jakoje dazvolić jamu zachavać tvar?
— Nijakich sihnałaŭ pra toje, što jon sprabuje znajści niejkaje vyjście, my nie bačym.
Rasijskaja pierahavornaja pazicyja — heta tatalny cynizm. Jany nastojvajuć na poŭnaj kapitulacyi Ukrainy, a padčas pieramovaŭ jaho hienierały bambiać ukrainskija harady i błakujuć Maryupal. Čałaviek, jaki naradziŭsia ŭ Leninhradzie nieŭzabavie paśla błakady, u jakoj zahinuli jaho svajaki, nie moža nie razumieć, što takoje vajennaja abłoha horada ź mirnymi žycharami.
— A jaki sens tady naohuł u pieramovach?
— Kali jon nie hatovy zakančvać vajnu, chaj abjavić pieramirje, ukraincy viernucca za stoł pieramovaŭ chacia b z uśviedamleńniem taho, što Rasija hatovaja dobrasumlenna adstojvać dypłamatyčnaje rašeńnie. Zamiest hetaha vajna praciahvajecca, jon patrabuje nie bolš ni mienš jak poŭnaj kapitulacyi Ukrainy i navat nie daje vyvieźci mirnych žycharoŭ z Maryupala. Ale jon by moh spynić usio heta za chvilinu. Tak budzie lepš dla samoj Rasii — nie kažučy ŭžo pra Ukrainu i astatni śviet.
— Nakolki surjozna ŭ ZŠA ŭsprymajuć pahrozy jadziernaj vajnoj, jakija na rasijskim dziaržaŭnym telebačańni, naprykład, hučać užo praktyčna kožny dzień?
— Heta ŭ najvyšejšaj stupieni biezadkaznyja pavodziny dla krainy — pastajannaha člena Rady biaśpieki AAN. Nie daj boh, kab Pucin ci jaho hienierały realna byli hatovyja pryniać takoje rašeńnie.
Na žal, ad pačatku hetaha kanfliktu my ŭžo zrazumieli, što pahrozy, jakija zychodziać ad Pucina, varta ŭsprymać surjozna. Tamu ZŠA i našy sajuźniki rychtujucca i da takoha raźvićcia padziej. Ale kali dojdzie da hetaha, heta budzie vajennaje złačynstva takich maštabaŭ, ad nastupstvaŭ jakoha ni jon sam, ni Rasija ŭžo nikoli nie adyduć. Dakładna nie pry našym z vami žyćci.
