Z 860 udzielnikaŭ ankietavańnia amal 57% rełakavalisia paśla 24 lutaha hetaha hoda, amal 40% — u 2020/2021 hadach.
Samaja papularnaja łakacyja — Polšča (41%). Na druhim miescy Hruzija (29,3%), na trecim Litva (10,5%).
Polšča
U Polšču rełakavalisia 350 śpiecyjalistaŭ. Kala 70% — midły i sieńjory. Bolšaść rełakantaŭ va ŭzroście ad 18 da 36 hadoŭ, 40% — raspracoŭščyki.
Amal pałova rełakantaŭ ličać, što pierajechali ŭ Polšču nadoŭha ci nazaŭždy. Čverć śpiecyjalistaŭ pakul nie vyznačyłasia, 10% płanujuć źmianić łakacyju. Tolki kala 3% śpiecyjalistaŭ płanujuć viarnucca ŭ Biełaruś u najbližejšy čas, 13% źbirajucca heta zrabić u doŭhaterminovaj pierśpiektyvie.
Što padabajecca
- Vialiki vybar charčovych i niecharčovych tavaraŭ, ceny.
- Servisy: zručnaja kamunikacyja ź dziaržaŭnymi orhanami praz elektronnyja servisy, płaciežnaja sistema Blik, technałahičnaść bankaŭskaha siektara, sučasnaja sistema dla zapisu da lekara.
- Sacyjalnaja śfiera i absłuhoŭvańnie: sistema adukacyi, miedycynskaje absłuhoŭvańnie, škoły i sadki, miascovaje samakiravańnie.
- Haradskaja infrastruktura, chutki i zručny hramadski transpart, infrastruktura dla ravarystaŭ.
- Nadvorje.
- Hory, mora, zamki, šmat pryhožych histaryčnych i sučasnych budynkaŭ.
- Pryhožaja i raznastajnaja pryroda.
- Adčynienyja miežy, lohka padarožničać.
- Svaboda słova, biaśpieka.
- Miascovaje nasielnictva.
Mierkavańni
«Jakaść ježy vyšej, čym u Biełarusi, asabliva miasa. Była pryjemna ździŭlenaja, što pradukty, jakija my spažyvali ŭ Biełarusi, tut kaštujuć značna tańniej. Naprykład, śmietankovy syr u Biełarusi kaštavaŭ kala 7-8 rubloŭ, a tut kaštuje 5 złotych (3,1 rubla).
«Dobraje staŭleńnie miascovych. Pierad pierajezdam čuŭ historyi pra ksienafobiju i krajni nacyjanalizm palakaŭ, ale sam za 15 miesiacaŭ žyćcia ni razu nie sutyknuŭsia. Nie śćviardžaju, što hetaha niama zusim, ale vidavočna mienš, čym pra heta raspaviadajuć. Taksama padabajecca staŭleńnie pracadaŭcaŭ da rabotnikaŭ. Niadaŭna pierajšoŭ užo da druhoha pracadaŭcy, i ŭ abodvuch było niehatyŭnaje staŭleńnie da prymusovych pierapracovak. U biahučaj firmie dali «zialonaje śviatło» tym, chto choča papracavać zvyš, ale nijakaha prymusu».
«U Polščy bolš mahčymaściaŭ dla ludziej ź invalidnaściu. Lohka možna ŭbačyć u kramie ślapoha čałavieka ci na invalidnym vazku biez supravadžeńnia».
«U Polščy ŭsie viedajuć anhlijskuju movu, navat pjanyja mužyčki na vulicy, jakija prosiać drobiaź».
«Bieź viedańnia polskaj biez prablem atrymaŭ usie patrebnyja dakumienty ŭ miascovaj administracyi. Ciažka ŭjavić takoje staŭleńnie ŭ administracyi ŭ Biełarusi. Hetak ža biez prablem adkryŭ IP, usie byli maksimalna hatovyja mnie dapamahčy».
«U Polščy mnostva aktyŭnaściaŭ: kancerty, bary z žyvoj muzykaj, haradskija śviaty. Byŭ navat na «Dažynkach kanoplaŭ».
Što nie padabajecca
- Biurakratyja.
- Šmat ukraincaŭ i biełarusaŭ.
- Darahaja arenda, prablemy z pošukam žylla.
- Relihijnaść: začynienyja kramy pa niadzielach, zabarona na aborty.
- Marudny i słaby servis.
- Jakaść i košt miedycynskich pasłuh.
- Ekałohija, jakaść pavietra.
- Zatory.
- Padatak.
- Moŭny barjer.
Mierkavańni
«Razdražniaje nieabaviazkovaść palakaŭ. My vam pieratelefanujem — i cišynia. Treba pastajanna ŭsich usiudy pinhavać (dziaržsłužby, bank, arendadaŭca i h. d.)»
«Uzimku sonca sadzicca ŭ try hadziny dnia, i heta vielizarnaja prablema, nakatvaje depresija. Servis va ŭsich miescach pakidaje žadać lepšaha. U dobrych restaranach vielmi doraha. Polskaja dajecca vielmi ciažka, ciažej, čym čakałasia. Majstroŭ pa manikiury dobrych niama. Niama dobrych joha-studyj».
«Siem hadoŭ žyvu ŭ Polščy. Ciapier vielmi biesić apošni zajezd biełarusaŭ. Niekatoraja kranalnaja infantylnaść i nierazumieńnie śpiecyfiki žyćcia ŭ ES, i ŭ Polščy ŭ pryvatnaści. «Ružovyja akulary», jakija z časam daviadziecca źniać. Pačać treba z taho, što tut IT — nie prestyžnaja ci vysokadachodnaja śpiecyjalnaść, tamu ŭzrovień žyćcia prykmietna skarektujecca. Pierśpiektyvy — «20 hadoŭ ipateki» (u lepšym vypadku)».
«Kiepskija sajty: niepryvabnyja i hlučnyja. Pryčym sajty dziaržstruktur dobryja, a sajty kram i servisaŭ — žach. Jašče ŭ Biełarusi pryvykli kantaktavać z sałonami pryhažości, restaranami i inšymi ŭstanovami praz Instagram, a tut Fejsbuk».
«Ja nie suprać pavyšeńnia padatkaŭ (jak u maim vypadku), ale suprać sumburu, jaki ŭźnikaŭ časta ŭ pracesie pryniaćcia novaha padatkovaha zakanadaŭstva. Pry pryjomie ŭ novuju firmu navat spračaŭsia z Payroll Manager, što traplaju pad adnu ź ilhot, choć jana ličyła, što nie. U vyniku ja mieŭ racyju. Vinavaču ŭ hetym nie jaje, a składanaść novych zakonaŭ, jakija jašče i mianialisia raz u paru tydniaŭ pierad kančatkovym ustupleńniem u siłu (i potym taksama, i da hetaha času). Sa znosin z kalehami-palakami zrazumieŭ, što takoha kštałtu błytanina ŭźnikaje z zajzdrosnaj rehularnaściu».
«Drennaja ekałohija, mała zialonych zon u horadzie, mahčymaści kupić pradukty ź fierm abo miascovych pryvatnych haspadarak. Mahčyma, heta pytańnie niedaśviedčanaści, ale anałahaŭ Kamaroŭki abo siezonnych rynkaŭ pakul nie znajšła. Jašče vielmi razdražniaje, što ŭ padtrymcy praktyčna ŭsich słužbaŭ niama anhłamoŭnych ahientaŭ. I ŭ cełym viedańnie anhlijskaj dla mnohich słužbaŭ nie vyhladaje takim pryjarytetnym, jak u Biełarusi».
Kaho (čaho) nie chapaje
- Baćkoŭ, bratoŭ i siaścior, siabroŭ, zvykłaha koła znosin, kata.
- Praduktaŭ: hłazuravanyja syrki, sušanaja ryba, čorny chleb, płambir, pielmieni, zhuščonka, dobraja harbata, ziefir, małočnyja pradukty.
- Wildberries, Ozon, anałaha Je-dastaŭki.
- Prahułak /tusovak u rodnym horadzie, Minskaha mora.
- Dačy, rybałki.
