Ludzi narakajuć na toje, što nie majuć nijakich umoŭ dla pracy. Jany, maŭlaŭ, pravodziać za rulom pa 14—16 hadzin biez snu i ježy, bienzin i zapčastki daražejuć, mašynu treba ramantavać, a tym, chto jeździć na arandavanaj, jašče i apłačvać arendu. A «Jandeks» u toj ža čas źnižaje taryfy, skardziacca kiroŭcy.
Hałoŭnaje patrabavańnie taksistaŭ — pavialičyć minimalny košt pasadki (za 3 km) da 2,5 rubloŭ, košt za kiłamietr šlachu pa horadzie da 50 kapiejek, a za horadam da 75 kapiejek, pierahledzieć umovy płatnaha čakańnia i viarnuć harantavany dachod u 190 rubloŭ.
«Kali paraŭnoŭvać z Žodzina, to tam harantavany dachod za dzień ciapier 190 rubloŭ za 40 zamoŭ, a tut 150 za 45 dla brendavanych i 135 dla tych, chto jeździć biez nalepak. Z harantyi štodnia my płacim 50 rubloŭ za arendu, 40 za zapraŭku (mietan), 24% addajem parku, a nam zastajecca kala 30 rubloŭ i heta za 16 hadzin! Akramia taho, za absłuhoŭvańnie mašyny my taksama płacim sa svajoj kišeni», — raskazvajuć aburanyja kiroŭcy.
Pavodle ich, ciapier taksi stała tańniejšaje za hramadski transpart. Šmat vypadkaŭ, kali ludzi vyklikajuć taksi, bo na im jeździć tańniej, čym na aŭtobusie.
Kiroŭcy pryznajucca: kab narmalna zarabić, jany pracujuć pa 16 hadzin bieź pierapynkaŭ. Pavodle ich, vialikaja kolkaść avaryj z udziełam «Jandeks-Taksi», abumoŭlenaja stomlenaściu ad praciahłych źmien, na jakija jany vychodziać kožny dzień.
Taksisty žartujuć, što z takimi taryfami «Jandeks-Taksi» pierasiadzie z aŭto na rovary, bo mašynu absłuhoŭvać zanadta doraha.
«Pierš za ŭsio, my chočam ludskaha staŭleńnia da siabie. My dapamahajem ludziam, nam heta padabajecca, ale praca pavinna adpaviedna apłačvacca».
Heta nie pieršaja zabastoŭka kiroŭcaŭ słužby «Jandeks» u Babrujsku, try hady tamu jany taksama bastavali. Jak kažuć strajkoŭcy, situacyja tolki paharšajecca i paćvierdžańnie tamu — kolkaść mašyn, jakija stajać ranicaj (u 2 razy bolš, čym u 2019 hodzie).
Kab pryciahnuć bolš uvahi da prablemy, jakija sami vyklikajuć mašyny na parkoŭku praz mabilnuju prahramu. Bolšaść z tych, jakija pryjazdžajuć, daviedaŭšysia pra sapraŭdnuju pryčynu vykliku, zastavalisia padtrymać kalehaŭ, a źjazdžali tolki tyja, chto chacieŭ zarabić na situacyi, jakaja skłałasia.
Pres-słužba «Jandeks Go» najaŭnaść prablem admaŭlaje. Śćviardžajecca, što ŭ Babrujsku taryf aptymizavany takim čynam, kab, z adnaho boku, častkova kampiensavać źmianieńnie cenaŭ na paliva i absłuhoŭvańnie aŭtamabilaŭ, a z druhoha, košt pajezdak zastavaŭsia pa-raniejšamu dastupny dla karystalnikaŭ.
Dachod ža kiroŭcaŭ u horadzie, pa ichnich raźlikach, za apošni hod nie tolki nie źnižaŭsia, ale i vyras prykładna na 13%. Kiroŭcy Babrujska zarablajuć, pavodle «Jandeks Go», u siarednim 12,9 rubloŭ u hadzinu ŭ «ekanomie» (suma ŭžo paśla vyličvańnia kamisii servisu)».
