pavodle Andreja Chadanoviča
1. Chaj nia budzie ŭ ciabie bahoŭ,
akramia charastva radkoŭ.
Ale navat z tych, što vyjduć pryhoža i ščyra,
nie rabi, kali łaska, kumira.
2. Nie vymaŭlaj imia Hospada, Boha tvajho, marna:
banalnyja ryfmy naohuł hučać biazdarna,
dy asabliva škoda niaboh,
što biazdarna ryfmujuć «Boh».
3. Pamiataj dzień śviaty,
tolki subotu svaju vyznačaješ nie ty.
Šeść dzion pracuj i rabi ŭsiakija dziei tvaje,
pokul muza nie dastaje.
A ŭ «subotu» pryčepiacca ź niejkaju pracaj —
pasyłaj ich i muzu macaj.
4. Baćku svajho i maci svaju pavažaj —
i budzie ŭčynkam tvaim umałot i ŭradžaj,
ale hrafamanić pra mamu — vialikaje hora:
nie ŭ kožnaha vyjdzie nie horaj za dziadźku Ryhora.
5. Nie zabivaj simpatyčnych hierojaŭ:
chopić i tych, što prazaik nakroiŭ.
Lepiej čaściej bieražy sučbiellit
kłavišaju «delete».
6. Nie čyni pieralubu
z muzami papiarednikaŭ — vyścierahajsia kłubu
dla tych, kamu za…
Z taboj — maładziejšaja muza.
7. Nie kradź —
rukapisy nie harać:
piać chvilin paciešyŭsia płahijatam,
a paśla tvoj unuk adčuvaje siabie vinavatym.
8. Nie kažy iłžyvaha śviedčańnia, —
havaru maładomu krytyku:
tusavacca — nie chopić piečani,
kali ž chopić — idzi ŭ palityku.
9. Nie prahni domu tvorčaści blizkaha.
(Lepiej — ryžskaha ci paryžskaha.)
10. Nie prahni žonki čužoj, ni jaje paluboŭnika,
ni raba, ni rabyni jahonaj achoŭnika,
ni litaraturnych murynak,
što pracujuć na inšy rynak.
A na roznych vałoŭ i asłoŭ
uvohule škoda słoŭ.
Andrej Chadanovič — paet, pierakładčyk, fiłołah. Vykładčyk zamiežnaj litaratury, kiraŭnik «Pierakładnickaj majsterni» ŭ Biełaruskim kalehiumie. Staršynia Biełaruskaha PEN-centra. Aŭtar knih vieršaŭ «Staryja vieršy», «Listy z-pad koŭdry», «Ziemlaki, albo Biełaruskija limieryki», «Sto li100ŭ na tut.by», «Berlibry». Vieršy pierakładalisia na 8 movaŭ, a sam Andrej pierakładaje z šaści movaŭ.